សម្ដេចតេជោ ហ៊ុន សែន ៖ តើកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញ មានដាក់ពាក្យថា ត្រូវតែមានបក្សប្រឆាំងហ្នឹងទេ?

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ក្នុងកិច្ចព្រមព្រៀងសន្តិភាពទីក្រុងប៉ារីស និងក្នុងរដ្ឋធម្មនុញ្ញរបស់កម្ពុជា មិនបានចែងថា ត្រូវតែមានគណបក្សប្រឆាំងណាមួយចូលរួមការបោះឆ្នោតនោះទេ ដោយគ្រាន់​តែចែងអំពីលទ្ធិប្រជាធិបតេយ្យសេរីពហុបក្សប៉ុណ្ណោះ។ ការលើកឡើងរបស់សម្ដេចតេជោ ហ៊ុន សែន បានធ្វើឡើងក្នុងពិធីសំណេះ សំណាលជាមួយកីឡាករ-កីឡាការិនីអាស៊ានប៉ារ៉ាហ្គេមលើកទី ១២ នៅល្ងាចថ្ងៃទី ២៦ ខែឧសភា ឆ្នាំ ២០២៣នេះ។  

សម្ដេចតេជោ ហ៊ុន សែន បានថ្លែងថា ក្រោយពី គ.ជ.ប និងក្រុមប្រឹក្សាធម្មនុញ្ញ បានបដិសេធការចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោតមក មានគណបក្សប្រឆាំងមួយ បាននិយាយថា ខុសកិច្ចព្រមព្រៀងសន្តិភាពទីក្រុង ប៉ារីស និងខុសរដ្ឋធម្មនុញ្ញ ជាដើម។ ប៉ុន្តែទាំងរដ្ឋធម្មនុញ្ញរបស់កម្ពុជា និងកិច្ចព្រមព្រៀងសន្តិភាពទីក្រុងប៉ារីស មិនបានកំណត់ថា ត្រូវតែមានគណបក្សប្រឆាំងណាមួយ​នោះទេ។

សម្ដេចតេជោ ហ៊ុន សែន ថ្លែងបែបនេះថា «ឥឡូវហ្នឹង តាំងនិយាយហើយ ខុសរដ្ឋធម្មនុញ្ញ ខុសកិច្ចព្រមព្រៀងប៉ារីស មើលឥឡូវចង់និយាយបន្តិចមើលអាកន្លែងហ្នឹង បក្សនយោបាយមួយ ឬបក្សនយោបាយពីរ ដែលគេទាត់ចោលមិនព្រមចុះឈ្មោះឲ្យនោះ គេថា ខុសកិច្ចព្រមព្រៀងប៉ារីស ខុសរដ្ឋធម្មនុញ្ញ ឥឡូវសួរបន្តិចទៅចុះ លោកឯងឆ្លើយឲ្យរួច ក្នុងកិច្ចព្រមព្រៀងប៉ារីសមានដាក់ពាក្យ ត្រូវតែមានបក្សប្រឆាំងទេ? ក្នុងរដ្ឋធម្មនុញ្ញបច្ចុប្បន្នថាត្រូវតែមានបក្សប្រឆាំង ហើយឈ្មោះថា អាភ្លើងចន្លុះហ្នឹងទេ?»។

សម្ដេចតេជោ ហ៊ុន សែន បានថ្លែងបន្តថា ក្នុងកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញ គ្រាន់តែបានសរសេរថា លទ្ធិប្រជាធិបតេយ្យសេរីពហុបក្សប៉ុណ្ណោះ ដោយមិនបានសរសេរកំណត់ថា ត្រូវតែមានបក្សប្រឆាំងណាមួយចូលរួមការបោះឆ្នោតនោះទេ។

សម្ដេចតេជោ ហ៊ុន សែន លើកឡើងថា «គេគ្រាន់តែនិយាយលទ្ធិប្រជាធិបតេយ្យ សេរីពហុបក្សតើ គេអត់កំណត់ថា ត្រូវតែមានបក្សប្រឆាំងទេ គេកំណត់ថា ប្រជាធិបតេយ្យ សេរីពហុបក្ស គេនិយាយប៉ុណ្ណឹងតើ ម៉េចអ្នកឯងថា ខុសជាមួយកិច្ចព្រមព្រៀងប៉ារីស ខុសជាមួយរដ្ឋធម្មនុញ្ញ រដ្ឋធម្មនុញ្ញបានចែងទេ?»៕