Connect with us

ព័ត៌មានជាតិ

ទោះសម្ដេចតេជោមិនបន្តធ្វើនាយករដ្ឋមន្ត្រី នាយករដ្ឋមន្ត្រីគណបក្សប្រជាជន ត្រូវបន្តចុះសួរសុខទុក្ខប្រជាជន

បានផុស

នៅ

សម្តេចអគ្គមហាសេនាបតីតេជោ ហ៊ុន សែន នាយករដ្ឋ​មន្ត្រីនៃព្រះរាជាណាចក្រកម្ពុជា មានប្រសាសន៍ថា បើទោះបីថាសម្ដេចតេជោបន្តធ្វើនាយករដ្ឋមន្ត្រី ឬមិនបន្តធ្វើនាយករដ្ឋមន្ត្រី គឺឱ្យតែនាយករដ្ឋមន្ត្រី ចេញពី គណបក្សប្រជាជនកម្ពុជា ត្រូវតែចុះជួបសំណេះសំណាល សួរសុខទុក្ខប្រជាជន បន្តពី សម្ដេចតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងនេះ ធ្វើឡើងក្នុង ពិធីចុះជួបសំណេះសំណាលជាមួយកម្មករ និយោជិតសរុបជាង ១ម៉ឺន ៦ពាន់នាក់ទៀត មកពីរោងចក្រ សហគ្រាសនានា នៅក្នុងស្រុកគងពិសី ខេត្តកំពង់ស្ពឺ នៅព្រឹកថ្ងៃអាទិត្យ ទី៤ ខែមិថុនា ឆ្នាំ២០២៣ នេះ។

សម្ដេចតេជោ ហ៊ុន សែន មានប្រសាសន៍ថា នេះជាជំនួប ម្ខាងជានាយករដ្ឋមន្ត្រីដឹកនាំប្រទេស ម្ខាងទៀតជាជំនួបរវាងជីតា និងចៅ ឪពុក និងកូន ពូ ឬអ៊ំ និងក្មួយ ព្រោះមិនមែនជារឿងអ្វីដាច់ដោយឡែកទេ។ ត្រង់ប្រទេសនានា ប្រធានាធិបតី នាយករដ្ឋមន្ត្រីរបស់គេ ដើរជួប ឬមិនជួបប្រជាជនគេ នោះជារឿងរបស់គេ។

សម្ដេចតេជោ ហ៊ុន សែន មានប្រសាសន៍បន្តថា៖ “តែរឿងរបស់ខ្មែរជាការចាំបាច់ ដើម្បីដើរសួរសុខទុក្ខ ហើយរឿងនេះបានក្លាយជាកាតព្វកិច្ច របស់គណបក្សកាន់អំណាចតែម្ដង។ បើទោះបីថា ខ្ញុំបន្តធ្វើនាយករដ្ឋមន្ត្រី ឬមិនបន្តធ្វើនាយករដ្ឋមន្ត្រី ឱ្យតែនាយករដ្ឋមន្ត្រី ចេញពី គណបក្សប្រជាជនកម្ពុជា ត្រូវតែបន្តធ្វើកិច្ចការ បន្តពី ហ៊ុន សែន។ ប្រជាធិបតេយ្យប្រជាជន គឺមានសារៈសំខាន់ខ្លាំងណាស់ ដែលជាមូលដ្ឋានគ្រឹះរបស់ ហ៊ុន សែន ធ្វើសកម្មភាព រយៈពេលកន្លងទៅ តាំងពីដំណាក់កាល វេទិការជាមួយកសិករនៅតាមវាលស្រែ មកវេទិការរាជរដ្ឋាភិបាលជាមួយវិស័យឯកជន មកវេទិការរាជរដ្ឋាភិបាលជាមួយកម្មករ កម្មការិនី”។

សម្ដេចតេជោ ហ៊ុន សែន មានប្រសាសន៍បន្ថែមថា រឿងអស់នេះហើយដែលយើងអាចឈ្វេងយល់គ្នា ស្គាល់ចិត្តថ្លើមគ្នា និងអាចរស់នៅជាមួយគ្នា ដោយសុខដុមរមនា ជឿជាក់ថា ប្រទេសរបស់យើងនឹងទទួលបានសេចក្ដីសុខ។

គួរបញ្ជាក់ថា សម្តេចតេជោនាយករដ្ឋមន្ត្រី ធ្លាប់បានអញ្ជើញជួបជាមួយកម្មករ និយោជិត នៅស្រុក​គងពិសី ខេត្តកំពង់ស្ពឺនេះមួយដងរួចមកហើយ កាលពីថ្ងៃទី១៩ ខែកញ្ញា ឆ្នាំ២០១៨។ សម្រាប់ការជួបសំណេះសំណាលជាលើកទី២ នៅព្រឹកនេះ មានកម្មករ និយោជិតចូលរួមសរុបចំនួន ១៦ ៤៤១ នាក់ មកពីរោងចក្រ សហគ្រាសចំនួន ១១។ រោងចក្រ សហគ្រាសចំនួន១១ ដែលកម្មករ និយោជិតចូលរួមសំណេះសំណាលនេះ ជាប្រភេទរោងចក្រផលិត​ស្បែក​ជើង​ចំនួន១០ និងផលិតកាបូបចំនួន១។ ផលិតផលរបស់រោងចក្រទាំងនេះ គឺនាំចេញ​ទៅ​ទីផ្សារអន្តរជាតិ ជាពិសេសសហគមន៍អឺរ៉ុប សហរដ្ឋអាម៉េរិកប្រទេសកាណាដា ប្រទេសជប៉ុន។ល។

នៅខេត្តកំពង់ស្ពឺ ឆ្នាំ២០២៣ មានរោងចក្រ សហគ្រាស៣៨៥ មានកម្មករនិយោជិតប្រមាណ ១៦ម៉ឺននាក់។ ក្នុងនោះរោងចក្រ សហគ្រាសវិស័យកាត់ដេរចំនួន ១៩១ មានកម្មករនិយោជិតសរុបជិត ១៥ ម៉ឺននាក់ និងជាខេត្តទី២ ដែលមានការអភិវឌ្ឍរោងចក្រ សហគ្រាសច្រើន៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម