ព័ត៌មានជាតិ

សម្ដេចតេជោ ៖ ក្រសួង និង អាជ្ញាធរ ពាក់ព័ន្ធ ត្រូវចាត់វិធានការជាបន្ទាន់ និង ម៉ឺងម៉ាត់ ចំពោះជនខិលខូចដែលឆ្លៀតឱកាសកាប់ ទន្ទ្រានព្រៃឈើ ក្នុងពេលរដ្ឋាភិបាលកំពុងរវល់ កិច្ចការបោះឆ្នោត

បានផុស

៣ years មុន

នៅ

ថ្ងៃចន្ទ ៥ មិថុនា ២០២៣

ដោយ

ភ្នំពេញ ៖ នាយប់ថ្ងៃទី៥ ខែមិថុនា ឆ្នាំ២០២៣នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារជាពិសេសមួយទាក់ទិននឹងការកាប់បំផ្លាញព្រៃឈើ ដែលជាសម្បត្តិធនធានជាតិ ពីសំណាក់ជនខិលខូច ដែលឆ្លៀតឱកាសក្នុងពេលដែលរាជរដ្ឋាភិបាលកំពុងតែជាប់រវល់ ទៅលើកិច្ចការងារការបោះឆ្នោត។

សម្ដេចតេជោបានមានប្រសាសន៍ថា តាមការសង្កេតនឹងទទួលបានព័ត៌មានជាបន្តបន្ទាប់ ក្នុងរយៈពេលកន្លងទៅ និងពេលនេះ ដោយសារជិតកៀកបោះឆ្នោតពួកខិលខូចបានចាប់ផ្ដើមធ្វើសកម្មភាពទន្ទ្រានកាប់យកដីធ្លីរបស់រដ្ឋដែលជាសម្បត្តិធនធានរបស់ជាតិ យើងតែងសង្កេតឃើញថា ជារៀងរាល់ពេលឱ្យតែមានការបោះឆ្នោតអំពើល្មើសច្បាប់ទាក់ទងនឹងការកាប់បំផ្លាញព្រៃឈើ និងកាប់យកទន្ទ្រានយកដីគឺតែងតែកើតមាន។

សម្ដេចមានប្រសាសន៍ទៀតថា ដូច្នេះខ្ញុំសូមរំលឹកចំពោះក្រសួងដែលមានការពាក់ព័ន្ធ ជាពិសេសក្រសួងបរិស្ថាន ក្រសួងកសិកម្មរុក្ខាប្រមាញ់និងនេសាទ ក៏ដូចជាអាជ្ញាធរដែនដីគ្រប់លំដាប់ថ្នាក់ត្រូវបញ្ចេញកម្លាំងរារាំងគ្រប់លទ្ធភាពទាំងអស់ដើម្បីបំផ្លាញចោលនូវពួកខិលខូច ដែលឆ្លៀតឱកាសនៅពេលវេលាដែលរាជរដ្ឋាភិបាលកំពុងជាប់រវល់ទៅលើកិច្ចការទាក់ទងនឹងការបោះឆ្នោត ហើយគេលួចទៅកាប់បំផ្លាញព្រៃឈើបញ្ហាទាំងអស់នេះ គឺត្រូវពឹងផ្អែកទៅលើការខិតខំប្រឹងប្រែងរបស់ឯកឧត្ដមលោកជំទាវ ដែលជាអភិបាលខេត្តដែលមានព្រៃឈើទាំងនោះ សុំយកចិត្តទុកដាក់ធ្វើការងារនេះ ហើយខ្ញុំក៏សូមអំពាវនាវចំពោះប្រជាពលរដ្ឋទាំងឡាយសូមមេត្តាគោរពច្បាប់និងសុំកុំទន្ទ្រានយកដីរបស់រដ្ឋ។

សម្ដេចបានសង្កត់ធ្ងន់ថា ខ្ញុំក៏សូមដាក់ចេញនូវបទបញ្ជាម៉ឺងម៉ាត់ដើម្បីចាប់យកមេខ្លោងទាំងឡាយដែលបំពានច្បាប់ទាំងនោះយកមកផ្តន្ទាទោសតាមច្បាប់ យើងមិនអាចលើកលែង ហើយយោគយល់ដើម្បីតែគ្រាន់តែសន្លឹកឆ្នោតសម្រាប់មនុស្សប៉ុន្មាននាក់នោះទេ។ យើងត្រូវធ្វើការងារដើម្បីការពារនូវធនធានធម្មជាតិព្រៃឈើ និងដីធ្លីរបស់រដ្ឋយើងមិនអាចយោគយល់រាល់សកម្មភាពទាំងឡាយណាដែលល្មើសច្បាប់នៅក្នុងពេលវេលាដែលរាជរដ្ឋាភិបាលកំពុងជាប់រវល់ ហើយខ្ញុំក៏សូមអំពាវនាវឲ្យអ្នកដែលមានប្រាក់កាក់ ឬ អ្នកមានអំណាច ដែលឈរពីខាងក្រោយខ្នងនៃជនខិលខូច ឬប្រើប្រាស់ជនខិលខូចទាំងនេះ ដើម្បីយកទៅកាប់ទន្ទ្រានយកព្រៃឈើ ឲ្យដកខ្លួនចេញជាបន្ទាន់ប្រសិនបើមានការស្រាវជ្រាវទៅឃើញថា មានការពាក់ព័ន្ធជាប់ជាមួយនឹងមន្ត្រីណា ឬ អ្នកមានប្រាក់កាក់ណាក៏ដោយ រាជរដ្ឋាភិបាលនឹងមិនអត់ឱន ហើយក៏មិនលើកលែងចំពោះសកម្មភាពនៅពីក្រោយខ្នងនោះផងដែរ។

ទទួលបាននូវបទបញ្ជានេះសូមឯកឧត្ដម លោកជំទាវ ចាត់វិធានការជាបន្ទាន់បញ្ជូនកម្លាំងដើម្បីបង្ក្រាបនូវភាពអនាធិបតេយ្យក្នុងការកាប់ទន្ទ្រានយកដីព្រៃ យកកាប់បំផ្លាញព្រៃឈើដើម្បីយកដីធ្លី ត្រូវធ្វើកិច្ចការងារនេះជាបន្ទាន់ ដោយមិនពន្យារពេលហើយកិច្ចការងារនេះ ត្រូវធ្វើដូចភ្លៀងរលឹមមិនអាចឲ្យកើតឡើងងើបឡើងសាជាថ្មីដើម្បីបំផ្លាញទៅដល់ព្រៃឈើនិងដីធ្លីរបស់រដ្ឋនោះឡើយ៕