តើកម្មការិនីដែលមានផ្ទៃពោះ នឹងទទួលបានអត្ថប្រយោជន៍អ្វីខ្លះ?

ដើម្បីធានាដល់សុខភាពសាធារណៈសម្រាប់ស្ត្រីមានផ្ទៃពោះដែលកំពុងបម្រើការងារនៅតាមរោងចក្រ-សហគ្រាសនៅក្នុងវិស័យវាយនភណ្ឌ រាជរដ្ឋាភិបាលកម្ពុជាបានពង្រីកវិសាលភាពនូវអត្ថប្រយោជន៍ការងារ និងលើកកម្ពស់កិច្ចគាំពារសង្គម ជាបន្តបន្ទាប់។    

នាឱកាសចុះសំណេះសំណាលជាមួយកម្មករ-កម្មការនីនៅតាមរោងចក្រ-សហគ្រាស ក្នុងឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសពង្រីកវិសាលភាពជួយដល់ស្ត្រីជាកម្មការិនីមានផ្ទៃពោះ ដោយទទួលបានសាច់ប្រាក់ឧបត្ថម្ភចាប់ពីពេលមានផ្ទៃពោះ រហូតដល់កូនមានអាយុ២ឆ្នាំ។ សម្ដេចតេជោ ហ៊ុន សែន បញ្ជាក់ថា តាមរយៈការឧបត្ថម្ភសាច់ប្រាក់សម្រាប់កម្មការិនីមានផ្ទៃពោះ គឺដើម្បីកាត់បន្ថយអត្រាមរណមាតា និងទារក ក៏ដូចជាដើម្បីពង្រឹងការផ្ដល់អាហារូបត្ថម្ភសម្រាប់ស្ត្រីមានផ្ទៃពោះ និងកូន។

បើតាមរបាយការណ៍របស់លោក អ៊ិត សំហេង រដ្ឋមន្ត្រីក្រសួងការងារ កម្មវិធីឧបត្ថម្ភសាច់ប្រាក់បន្ថែមសម្រាប់កម្មការិនីមានផ្ទៃពោះនេះនឹងចាប់អនុវត្តនៅខែសីហា ឆ្នាំ២០២៣តទៅ។ ក្នុងនោះ មុនពេលសម្រាលនឹងទទួលបានប្រាក់ឧបត្ថម្ភចំនួន៤លើក ដោយក្នុង១លើកបានប្រាក់ចំនួន៨ម៉ឺនរៀល និងពេលសម្រាល ទទួលបានប្រាក់ឧបត្ថម្ភចំនួន៨០ម៉ឺនរៀលសម្រាប់កូនមួយ បើក្នុងករណីកូនភ្លោះពីរ ទទួលបានប្រាក់ឧបត្ថម្ភចំនួន១លាន២សែនរៀល ខណៈកូនភ្លោះបី នឹងទទួលបានរហូតដល់១លាន៦សែនរៀល ព្រមទាំងប្រាក់ឧបត្ថម្ភផ្ទាល់របស់សម្ដេចតេជោចំនួន៥លានរៀល។

មិនត្រឹមតែប៉ុណ្ណោះ គឺនៅក្រោយពេលសម្រាល រហូតដល់កូនមានអាយុ២ឆ្នាំ ក៏នឹងទទួលបានប្រាក់ឧបត្ថម្ភចំនួន១០ លើកថែមទៀត ខណៈការឧបត្ថម្ភមុន និងក្រោយពេលសម្រាលនេះ មិនធ្លាប់មានពីមុនឡើយ។ កម្មវិធីឧបត្ថម្ភសាច់ប្រាក់នេះទើបតែមាននៅក្រោយពេលសម្ដេចតេជោនាយករដ្ឋមន្ត្រី ចុះជួបសំណេះសំណាលជាមួយកម្មករ-កម្មការិនីប៉ុណ្ណោះ។ បន្ថែមពីនេះ អត្ថប្រយោជន៍សម្រាប់កម្មការិនីមានផ្ទៃពោះ គឺត្រូវបានអនុញ្ញាតឲ្យឈប់សម្រាករយៈពេល៩០ថ្ងៃ តាមច្បាប់ការងារ ដោយទទួលបានប្រាក់ឈ្នួល១២០% (៥០% ទទួលបានពីនិយោជក និង៧០% ទទួលបានពីបេឡារបបសន្តិសុខសង្គម (ប.ស.ស)។

សូមជម្រាបថា គិតក្នុងឆ្នាំ២០២៣នេះ កម្មករ-កម្មការិនីក្នុងវិស័យវាយនភណ្ឌ មានប្រាក់ឈ្នួលអប្បបរមា ២០០ដុល្លារក្នុងមួយខែ។ បន្ថែមពីលើប្រាក់ឈ្នួល កម្មករនិយោជិក ក៏ទទួលបានអត្ថប្រយោជន៍បន្ថែមមួយចំនួនផងដែរ រួមមាន៖ ប្រាក់រង្វាន់ធ្វើការទៀងទាត់ ១០ដុល្លារ ប្រាក់ធ្វើដំណើរ និងស្នាក់នៅ ៧ដុល្លារ ប្រាក់អតីតភាពការងារ ចន្លោះពី២ដុល្លា ដល់១១ដុល្លា ប្រាក់ថ្លៃបាយនៅពេលបន្ថែមម៉ោង ២ពាន់រៀលក្នុងមួយថ្ងៃ (ប្រហែល១០ដុល្លារក្នុងមួយខែ) ប្រាក់បន្ថែមម៉ោង គិតជាមធ្យម ២៦ដុល្លារ និងការពិនិត្យព្យាបាលជំងឺដោយគិតបង់ប្រាក់។

ជាពិសេសនេះ រាជរដ្ឋាភិបាល ក៏បានរៀបចំច្បាប់ស្ដីពីរបបសន្តិសុខសង្គមថ្មី ដើម្បីឲ្យកម្មករមានប្រាក់សោធននិវត្តន៍ ដែលបានអនុវត្តកាលពីថ្ងៃទី១ ខែកក្កដា ឆ្នាំ២០២២ ផងដែរ៕

ដោយ៖ ធឿន វ៉ាន់សុង