ឯកអគ្គរាជទូតជប៉ុនប្រចាំកម្ពុជា ៖ ជប៉ុន ​នឹងបន្តផ្ដល់ជំនួយដល់កម្ពុជាបន្តទៀត

ឯកអគ្គរាជទូតជប៉ុនប្រចាំកម្ពុជា បានអះអាងថា រដ្ឋាភិបាលជប៉ុន ​នឹងបន្តផ្ដល់ជំនួយដល់រាជរដ្ឋាភិបាលកម្ពុជាបន្តទៀត។ ការអះអាងនេះ បានធ្វើឡើងក្នុងវេទិកាពិភាក្សារបស់សារព័ត៌មាន «កម្ពុជាថ្មី» កាលពីថ្ងៃទី ១៤ ខែមិថុនា ឆ្នាំ ២០២៣ ខណៈឆ្នាំនេះជាខួបលើកទី ៧០ នៃទំនាក់ទំនងកម្ពុជា-ជប៉ុន។

នៅក្នុងឱកាសនេះ លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា​ បានរំលឹកពីទំនាក់ទំនងការទូតជប៉ុន និងកម្ពុជា ចាប់តាំងពីឆ្នាំ ១៩៥៣ មកដល់បច្ចុប្បន្ននេះ។​ ចាប់តាំងពីទំនងទំនងការទូតមក រដ្ឋាភិបាលជប៉ុន បានជួយរាជរដ្ឋាភិបាលកម្ពុជាក្នុងការកសាងហេដ្ឋារចនាសម្ព័នជាបន្តបន្ទាប់ ដោយដំបូងជំនួយទីមួយនោះ គឺស្ពានមិត្តភាពកម្ពុជា-ជប៉ុន ជ្រោយចង្វារ ឬ «នីហុនបាស៊ី‍»​ ត្រូវបានកសាងនៅឆ្នាំ ១៩៦៣ បន្ទាប់មកត្រូវបានបំផ្លាញនៅផ្នែកកណ្ដាល ដោយសារសង្រ្គាមត្រជាក់នៅកម្ពុជា។

ក្រៅពីនេះមាន ស្ពានគីហ្សូណា និងស្ពានត្រឹបាសា ឬស្ពានអ្នកលឿង​ ឆ្លងកាន់ទន្លេមេគង្គ ដូចមានបោះពុម្ពក្នុងក្រដាសប្រាក់ ៥០០រៀលផងដែរ។ លោកថា ទាំងនេះបានបញ្ជាក់ពីទំនាក់ទំនងល្អរវាងកម្ពុជា-ជប៉ុន។ លោកបន្ដទៀតថា កម្ពុជាគឺជាមិត្តដ៏ល្អរបស់ជប៉ុន ហើយក៏ជាប្រទេសដែលបានបញ្ជូនកងទព័ឲ្យទៅចូលរួមរក្សាសន្ដិភាព​ច្រើនជាង ៨ពាន់នាក់ ក្រោមឆ័ត្រអង្គការសហប្រជាជាតិ។

ក្នុងគម្រប់ខួបទី​ ៧០ ឆ្នាំនៃទំនាក់ទំនងកម្ពុជា-ជប៉ុន លោក អ៊ូអិណុ អាត់ស៊ូស៊ី បានឲ្យដឹងថា រដ្ឋាភិបាលជប៉ុន នឹងបន្តផ្ដល់ជំនួយដល់រាជរដ្ឋាភិបាលកម្ពុជា នូវជាជំនួយផ្នែកសម្ភារៈ ក៏ដូចជា​ជំនួយផ្សេងៗទៀត។ ជាក់ស្ដែង ជប៉ុននឹងផ្ដល់ជំនួយដល់កម្ពុជា ក្នុងការជីកស្ដារកំពង់ផែទឹកជ្រៅនៅខេត្តព្រះសីហនុ ស្ដារ និងជីកឲ្យមានជម្រៅជាងមុន ដើម្បីឲ្យនាវាធំៗងាយស្រួលចូលចតដោះដូរទំនិញ ព្រមទាំងជំរុញការធ្វើពាណិជ្ជកម្មបន្ថែមទៀត។

សូមរំលឹកថា​ ទំនាក់ទំនងការទូតរវាងកម្ពុជា និង​ជប៉ុន បើគិតមកទល់ពេលនេះគឺមានរយៈពេល ៧០​ឆ្នាំ មកហើយ។ ចំណងមិត្តភាពដ៏រឹងមាំនេះ នឹងបន្តដោយភាពល្អប្រសើរជាបន្តបន្ទាប់ទៀត៕  

អត្ថបទ៖ សួស សិត