ក្រុមហ៊ុនសវនកម្មឯករាជ្យ ចុះស្រង់ព័ត៌មានបន្ថែម​ពីក្រុមហ៊ុន ម៉ន ដានី ១សប្ដាហ៍ទៀត នឹងចេញលទ្ធផល

និយ័តករអាជីវកម្មអចលនវត្ថុ និងបញ្ចាំ (ន.អ.ប.) បានផ្តល់ដំណឹងដល់អតិថិជន ដែលបានទិញលំនៅឋាន និងដីឡូតិ៍នៅក្នុងគម្រោង២៩ របស់ក្រុមហ៊ុន ម៉ន ដានី រៀល អ៊ីស្ទេត ឯ.ក ថា បន្ទាប់ពីទទួលបានពាក្យស្នើសុំ​អន្តរាគមន៍ពីភាគីពាក់ព័ន្ធ ន.អ.ប. បានរៀបចំក្រុមការងារ ដោះស្រាយវិវាទ និងបានប្រជុំពិភាក្សា​អស់ពេលជាច្រើន​លើកច្រើនសារ និងចុងក្រោយបានឯកភាពឱ្យក្រុមហ៊ុនសវនកម្មឯករាជ្យចុះពិនិត្យផ្ទៀងផ្ទាត់ព័ត៌មាន និងឯក​សារកិច្ចសន្យាលក់ទិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមនិយ័តករអាជីវកម្មអចលនវត្ថុ និងបញ្ចាំ លទ្ធផលបឋម នៃការធ្វើសវនកម្មបានដាក់ប្រជុំក្រុមការងារ​ដោះស្រាយ​វិវាទ កាលពីថ្ងៃទី២២ ខែមិថុនា ឆ្នាំ២០២៣ ប៉ុន្តែ ដោយអតិថិជនខ្លះមិន​ទាន់បានផ្ដល់ព័ត៌មានដល់​ក្រុមហ៊ុនសវន​កម្មឯករាជ្យ ដូច្នេះអង្គប្រជុំបានសម្រេចឱ្យ ក្រុមហ៊ុនសវនកម្ម ចុះស្រង់ព័ត៌មានបន្ថែម ដោយទុកពេលជូន ១សប្ដាហ៍។

ទន្ទឹមនឹងការចុះស្រង់ព័ត៌មានបន្ថែម របស់ក្រុមហ៊ុនសវនកម្មឯករាជ្យ និយ័តករអាជីវកម្មអចលនវត្ថុ និងបញ្ចាំ បានស្នើដល់អតិថិជនទាំងអស់ ត្រូវអត់ធ្មត់ និងរក្សាភាពស្ងប់ស្ងាត់ មិនត្រូវចូលរួមធ្វើបាតុកម្មនោះទេ ដោយទុកពេលជូន ន.អ.ប. ធ្វើការជាមួយភាគីពាក់ព័ន្ធ សម្របសម្រួល និងដោះស្រាយ វិវាទរវាងម្ចាស់ដី និងក្រុមហ៊ុនម៉នដានីជូនបងប្អូន។

និយ័តករអាជីវកម្មអចលនវត្ថុ និងបញ្ចាំ អះអាងថា នឹងជូនដំណឹងដល់បងប្អូនអតិថិជនទាំងអស់នូវ​លទ្ធផលនៃការ​សម្រប​សម្រួលយ៉ាងយូរមុនថ្ងៃទី០៧ ខែកក្កដា ឆ្នាំ២០២៣។

ដើម្បីការពារផលប្រយោជន៍របស់អតិថិជន និងភាគីពាក់ព័ន្ធ កន្លងមក ន.អ.ប. បានស្នើឱ្យ ក្រុមហ៊ុន ម៉ន ដានី រៀល អ៊ីស្ទេត ឯ.ក បញ្ឈប់សកម្មភាពអាជីវកម្មគម្រោងទី២៩ របស់ខ្លួន ក្រុមហ៊ុន ដែលមានទីតាំងស្ថិតនៅភូមិចំការស្បូវ ភូមិដំណាក់មានជ័យ ភូមិដុតកំបោរ ភូមិភាក្សា ឃុំព្រះនិព្វាន ស្រុកគងពិសី ខេត្តកំពង់ស្ពឺ។ ការបញ្ឈប់នេះដោយសារ​ក្រុមហ៊ុន ម៉ន ដានី រៀល អ៊ីស្ទេត ធ្វើអាជីវកម្មអភិវឌ្ឍលំនៅឋានដោយពុំមានអាជ្ញាបណ្ណពី ន.អ.ប និងកំពុងមានវិវាទ​ជាមួយ​ម្ចាស់ដី។ នេះបើតាមនិយ័តករអាជីវកម្មអចលនវត្ថុ និងបញ្ចាំ៕