រាជរដ្ឋាភិបាលកម្ពុជាទទួលជំនួយរថយន្តក្រុងប្រភេទថ្មីចំនួន១ ០០០គ្រឿងពីភាគីកូរ៉េ

រាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ បានទទួលជំនួយរថយន្តក្រុងប្រភេទថ្មីចំនួន១ ០០០ គ្រឿងពីក្រុមហ៊ុន ប៊ូ យ៉ុង ខ្មែរII ខូអិលធីឌី របស់កូរ៉េដើម្បីបែងចែកបន្តជូនទៅគ្រប់រដ្ឋបាលរាជធានី-ខេត្ត ក្នុងព្រះរាជាណាចក្រកម្ពុជា។

ការផ្តល់ជំនួយរថយន្តក្រុងប្រភេទថ្មីចំនួន១ ០០០គ្រឿងនេះ ត្រូវបានចុះហត្ថលេខាលើអនុស្សរណៈនៃការយោគយល់រវាងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ ជាមួយក្រុមហ៊ុន ប៊ូ យ៉ុង ខ្មែរ II ខូអិលធីឌី នៅរសៀលថ្ងៃទី២៩ ខែមិថុនា ឆ្នាំ២០២៣រវាងអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងរាជរដ្ឋាភិបាលកម្ពុជា ជាមួយលោកបណ្ឌិត LEE JOON KEUN ប្រធានក្រុមប្រឹក្សា​ភិបាលក្រុមហ៊ុន ប៊ូ យ៉ុង ខ្មែរ II ខូអិលធីឌី (BOOYOUNG KHMER II Co.,Ltd) ដែលជាបុត្រសម្ព័ន្ធរបស់ក្រុមហ៊ុន BOOYOUNG GROUP នៃសាធារណរដ្ឋកូរ៉េ។

យោងតាមសេចក្ដីជូនដំណឹងសម្រាប់សារព័ត៌មានស្តីពីការចុះហត្ថលេខាលើអនុស្សរណៈអំពីការផ្តល់ជំនួយរថយន្តក្រុង ប្រភេទថ្មី ចំនួន១ ០០០ គ្រឿង ជូនរាជរដ្ឋាភិបាលកម្ពុជាបានឱ្យដឹងថា ក្រុមហ៊ុន ប៊ូ យ៉ុង ខ្មែរ II ខូអិលធីឌី បានបញ្ជា​ទិញពីរោងចក្រផលិតរថយន្តដោយផ្ទាល់ នូវរថយន្តក្រុងប្រភេទថ្មី ដែលមានលេខម៉ូដែល JMMC Co-star bus 6M (Model JX6602VD) ចំនួន១ ០០០ គ្រឿង ដោយការផ្តល់ជូនរាជរដ្ឋាភិបាលកម្ពុជា ជា០៣ដំណាក់កាលគឺ៖ ក្នុងឆ្នាំ ២០២៣ នូវរថយន្តចំនួន៤០០ គ្រឿង ក្នុងឆ្នាំ២០២៤ រថយន្តចំនួន៣០០ គ្រឿង និងក្នុងឆ្នាំ២០២៥ ចំនួន៣០០គ្រឿង។

អនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាតេជោនាយករដ្ឋមន្ត្រី រថយន្តក្រុងទាំងនេះ នឹងត្រូវ​បែង​​ចែកបន្តជូនទៅគ្រប់រដ្ឋបាលរាជធានី-ខេត្ត ក្នុងព្រះរាជាណាចក្រកម្ពុជាដោយរដ្ឋបាលរាជធានី-ខេត្ត រៀបចំជាយន្តការក្នុងការផ្តល់ “សេវាដឹកជញ្ជូនសាធារណៈ” ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ នៅតាមមូលដ្ឋានរាជធានី-ខេត្ត ។

ក្រុមការងារអន្តរក្រសួងសម្រាប់សម្របសម្រួលក្នុងការអនុវត្តគម្រោងនេះ បាននិងកំពុងរៀបចំនីតិវិធី និងយន្តការក្នុងសម្របសម្រួល ទទួល គ្រប់គ្រង និងចាត់ចែងរថយន្ត ព្រមទាំង រៀបចំ “យន្តការផ្តល់សេវាដឹកជញ្ជូនសាធារណៈ”
ជូនប្រជាជននៅតាមមូលដ្ឋាន យន្តការទុកដាក់ ថែទាំ និងជួសជុលរថយន្តនៅពេលដែលពេលរថយន្តមកដល់កម្ពុជាក៏ដូចជាពេលទទួលបានរថយន្តទៅប្រើប្រាស់ តាមរដ្ឋបាលរាជធានី ខេត្តដោយអាចយកតាមបទពិសោធន៍របស់រដ្ឋបាលរាជធានីភ្នំពេញឬតាមជម្រើសសមស្របផ្សេងទៀត ។

ជាមួយនឹងការចូលរួមចំណែកលើកស្ទួយសេដ្ឋកិច្ចកម្ពុជាតាមរយៈការដាក់ទុនវិនិយោគទុនឯកជននៅក្នុងព្រះរាជា​ណាចក្រ​កម្ពុជា ក្រុមហ៊ុនBOOYOUNG KHMER II Co.,Ltd ដែលជាបុត្រសម្ព័ន្ធរបស់ក្រុមហ៊ុន BOOYOUNG GROUP នៃសាធារណរដ្ឋកូរ៉េបានមកដាក់ទុនវិនិយោគលើវិស័យជាច្រើន ចាត់តាំងពីឆ្នាំ២០០៧ មកដូចជាលើផ្នែក​អលនវត្ថុ ខុនដូ បុរី សណ្ឋាគារ តារាងវាយកូនគោល សេវាទូរគមនាគមន៍ សាលារៀន សាកលវិទ្យាល័យ និងធនាគារ ជាដើម ។

ក្រុមហ៊ុនក៏បានចូលរួមឧបត្ថម្ភដល់កិច្ចការមនុស្សធម៌ និងកិច្ចការសង្គមជាច្រើននៅកម្ពុជាដូចជា សាងសង់សាលារៀនចំនួន៣០០ខ្នង ឧបត្ថម្ភរថយន្តក្រុងចំនួន២០០គ្រឿងជូនរដ្ឋបាលរាជធានីភ្នំពេញ និងចូលរួមកិច្ចការមនុស្សធម៌ តាមរយៈកាកបាទក្រហមកម្ពុជា និងសមាគមគ្រូពេទ្យស្ម័គ្រចិត្ត សម្តេចតេជោ ជាច្រើនទៀត៕

អត្ថបទ៖ សំអឿន