ឯកឧត្តម ឌី វិជ្ជា ជិះកង់ ម៉ូតូ និងបើកកង់បី ដឹកសមាជិកហែក្បួនឃោសនាបោះឆ្នោត ក្នុងក្រុងស្វាយរៀង

ឯកឧត្តម ឌី វិជ្ជា បានជិះកង់ ជិះម៉ូតូ ជាពិសេស បានបើករ៉ឺម៉កកង់បីដោយខ្លួនឯងដឹកសមាជិក សមាជិកាគណបក្សប្រជាជនកម្ពុជាហែក្បួនឃោសនាបោះឆ្នោតនៅពាសពេញក្រុងស្វាយរៀង ខេត្តស្វាយរៀង នៅព្រឹកថ្ងៃសៅរ៍នេះ។ ព្រឹកថ្ងៃសៅរ៍នេះ គឺជាថ្ងៃចាប់ផ្តើមយុទ្ធនាការឃោសនាបោះឆ្នោតជ្រើសតាំងតំណាងរាស្រ្ត នីតិកាលទី៧ ដែលមានរយៈពេល២១ថ្ងៃ។

ក្នុងទឹកមុខញញឹមយ៉ាងរីករាយ ឯកឧត្តម ឌី វិជ្ជា បានបង្ហាញពីភាពសាមញ្ញ និងស្និតស្នាលជាមួយសមាជិក សមាជិកា និងអ្នកគាំទ្រគណបក្សប្រជាជនកម្ពុជាជាច្រើនរយនាក់នៅក្នុងការហែក្បួនឃោសនាបោះឆ្នោតនៅក្នុងក្រុងស្វាយរៀង។ វត្តមានរបស់ឯកឧត្តម ឌី វិជ្ជា នេះ ធ្វើឲ្យសមាជិក សមាជិកា និងអ្នកគាំទ្រគណបក្សប្រជាជនកម្ពុជានៅក្នុងក្រុងស្វាយរៀង ខេត្តស្វាយរៀង មានភាពកក់ក្តៅ និងបានចូលរួមហែក្បួនឃោសនាយ៉ាងសប្បាយរីករាយ ភ្លេចអស់ការនឿយហត់ទាំងឡាយ។

គួរបញ្ជាក់ថា នៅថ្ងៃទី១ នៃយុទ្ធនាការឃោសនាបោះឆ្នោតនេះ ខេត្តស្វាយរៀង ក៏ដូច រាជធានីភ្នំពេញ និងខេត្តដទៃៗទៀតដែរ បានបើកយុទ្ធនាការឃោសនាធំ ដោយមានអ្នកចូលរួមប្រមាណជាង១ម៉ឺន៥ពាន់នាក់ឯណោះដែលដឹកនាំដោយសម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារចុះជួយមូលដ្ឋាន ខេត្តស្វាយរៀង។ សម្តេចកិត្តិសង្គហបណ្ឌិត ម៉ែន សំអន បានបង្ហាញក្តីរំពឹងថា សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ នៅថ្ងៃទី២៣ ខែកក្តដា ឆ្នាំ២០២៣ ខាងមុខនេះ គណបក្សប្រជាជនកម្ពុជា នឹងទទួលបានអាសនៈ១០០% ពោល គឺ៥អាសនៈលើ៥អាសនៈតែម្តងនៅក្នុងខេត្តស្វាយរៀងនេះ៕