កម្ពុជា ដាក់ឱ្យដំណើរប្រព័ន្ធប្រតិបត្តិការទូទាត់​ឆ្លងគ្រឹះស្ថានតាមបណ្ណឥណពន្ធ​លើគ្រប់ម៉ាស៊ីន​ ATM

ធនាគារជាតិនៃកម្ពុជា ដាក់ឱ្យដំណើរការប្រព័ន្ធមួយឈ្មោះថា ខេមបូឌានស៊ែស្វីច ហៅកាត់ CSS ដើម្បីជាមធ្យោបាយ​ងាយស្រួល សម្រាប់អតិថិជនរបស់គ្រឹះស្ថានធនាគារ និងហិរញ្ញវត្ថុទាំងអស់ ធ្វើប្រតិបត្តិការទូទាត់ឆ្លង​គ្រឹះស្ថាន​តាមប័ណ្ណទូទាត់ឥណពន្ធលើគ្រប់ម៉ាស៊ីន ATM ឬ ឆូតកាត POS របស់គ្រឹះស្ថានជាសមាជិក សំដៅធ្វើ​សមាហរណកម្មជាមួយប្រទេសក្នុងតំបន់។

ថ្លែងក្នុងពិធីដាក់ឱ្យដំណើរការជាផ្លូវការប្រព័ន្ធខេមបូឌានស៊ែស្វីចនៅព្រឹកថ្ងៃទី៤កក្កដានេះ លោកស្រី ជា សិរី ទេសាភិបាលរងធនាគារជាតិនៃកម្ពុជា បានមានប្រសាសន៍ថា ការអភិវឌ្ឍប្រព័ន្ធ CSS នេះជាគំនិតផ្តួចផ្តើមថ្មីមួយទៀត របស់ធនាគារជាតិនៃកម្ពុជា ក្នុងការសម្រួលប្រតិបត្តិការទូទាត់សងប្រាក់ តាមរយៈប័ណ្ណទូទាត់នៅប្រទេសកម្ពុជា ដែលអាចឱ្យអតិថិជនធ្វើប្រតិបត្តិការតាមប័ណ្ណទូទាត់ឥណពន្ធ CSS លើម៉ាស៊ីនATM ដូចជា ការដកសាច់ប្រាក់ ការពិនិត្យសមតុល្យ ការបោះពុម្ពរបាយការណ៍សង្ខេប ការប្រើប្រាស់សេវាទូទាត់ រហ័ស និងការប្ដូរលេខសម្ងាត់។ ទន្ទឹមនេះ អតិថិជន ក៏អាចធ្វើប្រតិបត្តិការតាមប័ណ្ណទូទាត់ឥណពន្ធ CSS លើម៉ាស៊ីនឆូតកាត POS ដូចជា ការទិញទំនិញ ការពិនិត្យសមតុល្យ ការដកសាច់ប្រាក់ ការបញ្ជូនមូលនិធិ ត្រលប់មកវិញ ក៏ដូចការអនុញ្ញាត​ឱ្យគ្រឹះស្ថានផ្តល់សេវាទូទាត់សងប្រាក់ចូលរួមជាសមាជិកប្រព័ន្ធនេះ ដែលនឹងរួមចំណែកលើកកម្ពស់បរិយាបន្នហិរញ្ញវត្ថុ ធ្វើឱ្យការប្រើប្រាស់សេវាហិរញ្ញវត្ថុកាន់តែមានភាពងាយស្រួល និងទូលំទូលាយ។

លោកស្រីសង្ឃឹមថា ការដាក់ឱ្យដំណើរការប្រព័ន្ធ CSSនេះ នឹងផ្តល់ជម្រើសបន្ថែមទៀតសម្រាប់អតិថិជន​ធ្វើប្រតិបត្តិការទូទាត់ឆ្លងគ្រឹះស្ថានធនាគារ និងហិរញ្ញវត្ថុបង្កើនតម្លាភាព​តាមរយៈការទូទាត់ជាអេឡេចត្រូនិច​កាត់បន្ថយចរាចរណ៍សាច់ប្រាក់ នៅលើទីផ្សារបង្កើនប្រសិទ្ធភាពក្នុងការប្រើប្រាស់ធនធានហិរញ្ញវត្ថុ និងរួម​ចំណែកអភិវឌ្ឍសេដ្ឋកិច្ចឌីជីថលស្របតាមគោលនយោបាយរបស់រាជរដ្ឋាភិបាល។

លោក ចរ សុភាព ប្រធានគណៈកម្មាធិការទូទាត់នៃសមាគមធនាគារនៅកម្ពុជា ចាត់ទុកប្រព័ន្ធមួយនេះ ចូលរួម​ចំណែក​ទប់ស្កាត់នូវការកើតឡើងជាយថាហេតុ ដូចជា ការទទួលបាននូវសាច់ប្រាក់ក្លែងក្លាយ រហែក ប្រឡាក់ និងក្រដាសប្រាក់​ដែលមានបញ្ហាផ្សេងៗ ជាច្រើនទៀត ព្រមទាំងជួយឱ្យអ្នកប្រើប្រាស់ចំណេញពេលវេលា មានទំនុកចិត្ត និងមាន​សុវត្ថិភាព ដោយអតិថិជនទាំងអស់ អាចធ្វើការទូទាត់ទំនិញតាមរយៈម៉ាស៊ីនឆូតកាត(POS) ការដកសាច់ប្រាក់​ពីម៉ាស៊ីនអេធីអឹម(ATM) បានពីគ្រប់គ្រឹះស្ថានហិរញ្ញវត្ថុឯកជន មានទាំងធនាគារ និងស្ថាប័នមីក្រូហិរញ្ញវត្ថុ ដែលជា​សមាជិកចូលរួមទាំងអស់នៅទូទាំងប្រទេស។

លោកបានបន្តថា បច្ចុប្បន្ន គ្រឹះស្ថានធនាគារ និងមីក្រូហិរញ្ញវត្ថុ ដែលជាសមាជិករបស់ CSSនេះ មានសរុប៥៦គ្រឹះស្ថាន ក្នុងនោះ សមាជិកផ្ទាល់ជាធនាគារពាណិជ្ជចំនួន៤៨ គ្រឹះស្ថានហិរញ្ញវត្ថុ ទទួលប្រាក់បញ្ញើចំនួន៥ និងសមាជិកមិន​ផ្ទាល់ជាធនាគារពាណិជ្ជមានចំនួន៣។

ចំណែកលោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជាបានទទួលស្គាល់ថា ការដាក់ឱ្យ​ដំណើរការប្រព័ន្ធ CSSនេះ ពិតជាមានសារសំខាន់ខ្លាំងណាស់ក្នុងការលើកកម្ពស់វិស័យ​ហិរញ្ញវត្ថុទាំង​មូលតាម​រយៈការពង្រីកវិសាលភាពប្រតិបត្តិការរបស់គ្រឹះស្ថានធនាគារនិងហិរញ្ញវត្ថុ។

យ៉ាងណាក៏ដោយ លោកសុខ វឿន បានស្នើសុំធនាគារជាតិនៃកម្ពុជា ជួយសម្របសម្រួលជាមួយគ្រឹះស្ថានជាសមជិក​ទាំងអស់ដើម្បីបង្កើតជាស្តង់ដារមួយក្នុងការកំណត់កម្រិតចំនួនទឹកប្រាក់អតិបរិមាក្នុង១ថ្ងៃ និងទំហំសាច់​ប្រាក់ដែលអាច​ដកបានក្នុង១ប្រតិប្តិការពីម៉ាស៊ីន អេ ធី អឹម នីមួយៗ របស់គ្រឹះស្ថានជាសមាជិកឱ្យមានសង្គតភាព ដើម្បីឱ្យអតិថិជន​ងាយស្រួលចងចាំ និងងាយស្រួលក្នុងការធ្វើប្រតិបត្តិការ៕

អត្ថបទ ៖ សំអឿន