លោក គឹម សន្តិភាព៖ បោះឆ្នោតឱ្យបក្សប្រជាជន គឺដើម្បីទប់ស្កាត់ក្រុមប្រឆាំងនឹងសន្តិភាព

សមាជិកគណៈកម្មាធិការកណ្ដាលគណបក្សប្រជាជនកម្ពុជា លោក គឹម សន្តិភាព បានលើកឡើងថា ការបោះឆ្នោតឱ្យគណបក្សប្រជាជន គឺដើម្បីទប់ស្កាត់ក្រុមប្រឆាំងនឹងសន្តិភាព ទើបកម្ពុជារក្សាបាននូវសន្តិភាពជានិរន្តរ៍។ លោកថ្លែងបែបនេះក្នុងពិធីលើកកម្ពស់សកម្មជនបក្សជាឃោសនិកឆ្នើមរបស់គណបក្ស នៅស្រុកពញាក្រែក ខេត្តត្បូងឃ្មុំ កាលពីថ្ងៃទី៧ ខែកក្កដា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គឹម សន្តិភាព លើកឡើងថា ការបោះឆ្នោតជាតិជាសកល នីតិកាលទី៧នេះ គឺមានគណបក្សនយោបាយចូលរួមប្រកួតប្រជែងចំនួន ១៨គណបក្ស ដែលក្នុងនោះ គណបក្សប្រជាជនកម្ពុជា ស្ថិតនៅលេខរៀងទី១៨ ជាលេខរៀងកូនពៅ និងមានរូបសញ្ញាទេវតាបាចផ្កាជាសម្គាល់។ ដូច្នេះ លោក បានស្នើសុំ និងលើកទឹកចិត្តដល់សមាជិកសមាជិកា និងប្រជាពលរដ្ឋទូទៅអញ្ជើញទៅបោះឆ្នោតឱ្យគណបក្សប្រជាជន នៅថ្ងៃទី២៣ ខែកក្កដា ឆ្នាំ២០២៣ ដើម្បីពង្រឹងសាមគ្គីជាតិ ទប់ស្កាត់ក្រុមប្រឆាំងនឹងសន្តិភាព ទើបកម្ពុជារក្សាបាននូវសន្តិភាព ស្ថិរភាព ប្រជាធិបតេយ្យ និងការអភិវឌ្ឍជាតិជានិរន្តរ៍។ លោក គឹម សន្តិភាព បានបញ្ជាក់ថា ក្នុងនាមជាសមាជិក-សមាជិការគណបក្សប្រជាជនកម្ពុជា ត្រូវប្តេជ្ញាចិត្តក្នុងកិច្ចការថែរក្សាសន្តិភាព ប្រជាធិបតេយ្យ និងការអភិវឌ្ឍជាតិ ក្រោមម្លប់សន្តិភាពរបស់សម្តេចតេជោឱ្យខានតែបានជាដាច់ខាត។

ដើម្បីរក្សាភាពឈ្នះភ្លូកទឹកភ្លូកដីជូនគណបក្សប្រជាជនកម្ពុជា លោក គឹម សន្តិភាព បានជំរុញដល់សមាជិក-សមាជិកាគណបក្សគ្រប់រូបត្រូវតែអនុវត្តតួនាទីភារកិច្ចរបស់ខ្លួនឱ្យអស់ពីកម្លាំងកាយកម្លាំងចិត្ត ប្រាជ្ញាស្មារតី និងត្រូវហ៊ានចំណាយធនធានផ្ទាល់ខ្លួនលើសកម្មភាពគណបក្ស ដើម្បីផ្សព្វផ្សាយឱ្យបានទូលំទូលាយអំពីគោលនយោបាយគណបក្ស អំពីច្បាប់បោះឆ្នោត និងសមិទ្ធផលរបស់រាជរដ្ឋាភិបាលនាពេលបច្ចុប្បន្ន។

ទន្ទឹមនេះដែរ លោក ក៏ណែនាំឱ្យឃោសនិកគណបក្សត្រូវរំលឹកពីគុណូបការៈដ៏ធំធេងរបស់គណបក្សប្រជាជនចំពោះប្រទេសជាតិ និងប្រជាជនកម្ពុជា ព្រោះមានតែគណបក្សប្រជាជនតែមួយគត់ ដែលបានសង្គ្រោះជាតិ ការពារជាតិ និងអភិវឌ្ឍប្រទេសជាតិរហូតមានថ្ងៃនេះ។

លើសពីនេះ លោក គឹម សន្តិភាព ក៏បានស្នើសុំសមាជិក-សមាជិកាទាំងអស់ត្រូវខិតខំប្រឹងប្រែងបញ្ចេញសកម្មភាពស្របច្បាប់សម្រាប់ឃោសនារកសន្លឹកឆ្នោតជូនគណបក្សប្រជាជនកម្ពុជា ដោយត្រូវណែនាំប្រជាពលរដ្ឋឱ្យចាំច្បាស់លេខរៀង រូបសញ្ញារបស់គណបក្សប្រជាជនកម្ពុជា បង្រៀនពលរដ្ឋគូសសន្លឹកឆ្នោតឱ្យបានត្រឹមត្រូវ ជាពិសេស ត្រូវហ៊ានទប់ស្កាត់ និងរាយការណ៍រាល់សកម្មភាពទុច្ចរិតរបស់ជនអគតិ ដែលមានបំណងចង់បំផ្លាញការបោះឆ្នោត ឬបង្កអស្ថិរភាពសង្គម ជាដើម៕