លោកស្រី ឆាយ ស៊ីវលីន៖ អាកាសយានដ្ឋានអន្តរជាតិសៀមរាប-អង្គរ នឹងក្លាយជាទ្រព្យដ៏សំខាន់​សម្រាប់អនាគតវិស័យទេសចរណ៍កម្ពុជា

ប្រធានសមាគមទេសចរណ៍កម្ពុជា(CATA) លោកស្រី ឆាយ ស៊ីវលីន បានលើកឡើងថា វិសាលភាពអាកាសយានដ្ឋាន​អន្តរជាតិសៀមរាបថ្មីនេះ មានទំហំធំជាងអាកាសយានដ្ឋានចាស់ ដែលអាចទទួលយន្តហោះធុនធ្ងន់-ធំ បានច្រើន ជាពិ​សេស​អាចទទួលបានការហោះហើរដោយត្រង់ពីប្រទេសឆ្ងាយៗ ចូលកមកម្ពុជា កាន់តែកើនឡើង និងអាចមាន​កំណើន​ភ្ញៀវទេសចរកាន់តែច្រើនផងដែរ។ លោកស្រី បានគូសបញ្ជាក់ថា អាកាសយានដ្ឋាននេះ នឹងក្លាយជាទ្រព្យដ៏សំខាន់​សម្រាប់អនាគតវិស័យទេសកម្ពុជា។

ថ្លែងប្រាប់កម្ពុជាថ្មី លោកស្រី ឆាយ ស៊ីវលីន បានឱ្យដឹងដូច្នេះថា« ពាក់ព័ន្ធនឹងវិស័យអាកាសចរណ៍ និងការអភិវឌ្ឍ​ព្រលាន​យន្តហោះថ្មីៗជាបន្តបន្ទាប់នេះ នឹងជួយដល់វិស័យទេសចរណ៍ ព្រោះអាចទទួលបានការហោះហើរចូលបានច្រើន ដូច្នេះយើងនឹងមានកំណើនទេសចរ កាលណាមានកំណើនទេសចរ នឹងជួយផ្តល់ឱកាសការងារដល់​ប្រជាពលរដ្ឋក្នុង​ស្រុកបានច្រើន ពិសេសជួយជំរុញសេដ្ឋកិច្ចជាតិ និងសេដ្ឋកិច្ចមូលដ្ឋានជាដើម»។

បើតាមប្រធានសមាគមទេសចរណ៍កម្ពុជា(CATA) ការអភិវឌ្ឍព្រលានយន្តហោះនេះ នឹងជួយដល់វិស័យដឹកជញ្ជូន​តាមផ្លូវអាកាស ទាក់ទាញកំណើនភ្ញៀវទេសចរអន្តរជាតិ បង្កើតឱកាសការងារក្នុងស្រុក បង្កើនការផលិតសម្រាប់​ផ្គត់ផ្គង់តម្រូវការ ជាពិសេសបានចូលរួមចំណែកក្នុងការជំរុញកំណើនសេដ្ឋកិច្ចជាតិដ៏សំខាន់។

យោងតាមរបាយការណ៍​​ក្រសួង​ទេសចរណ៍​បង្ហាញ​ថា នៅ​ក្នុងឆមាសទី ១ ឆ្នាំ ២០២៣ ចាប់ពីខែមករាដល់ឆ្នាំមិថុនា កម្ពុជា​ទទួលបាន​​​ភ្ញៀវទេសចរអន្តរជាតិប្រមាណ ២.៥៧ លាននាក់ កើនឡើង ៤០៩% ធៀបរយៈពេលដូចគ្នាឆ្នាំ ​២០២២។ ក្នុងនោះផ្លូវអាកាសមានចំនួន ៩១ ម៉ឺននាក់ កើនឡើង ២៧៩% ផ្លូវគោកមានចំនួន ១.៦៣ លាននាក់ កើនឡើង ៥២៦% និងផ្លូវទឹកមានចំនួន ៣ ម៉ឺននាក់ កើនឡើង ៥៨៦%។ អ្នកស្រី ឆាយ ស៊ីវលីន បានគូសបញ្ជាក់ថា ទេសចរអន្តរជាតិចូលមកកម្សាន្តនឹងស្នាក់នៅកម្ពុជា ចន្លោះពី ៥ថ្ងៃ ទៅ ១០ថ្ងៃ។

សូមបញ្ជាក់ថា អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីខែមីនា ឆ្នាំ២០២០ ដោយក្រុមហ៊ុន Angkor International Airport Investment (Cambodia) Co.,Ltd (AIAI) ក្រោមទុនវិនិយោគប្រមាណជិត ១ពាន់លានដុល្លារ។

អាកាសយានដ្ឋានអន្តរជាតិនេះ បានសាងសង់លើផ្ទៃដីជាង ៧០០ហិកតា ស្ថិតនៅក្នុងភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ដែលមានចម្ងាយប្រមាណ៥០គីឡូម៉ែត្រ ពីទីប្រជុំជនក្រុង​សៀមរាប និងចម្ងាយ ៤០គីឡូម៉ែត្រ ពីរមណីយដ្ឋានអង្គរ។

អាកាសយានដ្ឋានអន្តរជាតិសៀមរាប-អង្គរ គឺជាអាកាសយានដ្ឋានអន្តរជាតិលំដាប់ 4E ជាមួយផ្លូវបត់រត់ប្រវែង ៣,៦០០ម៉ែត្រ មានសមត្ថភាពឲ្យយន្តហោះគ្រប់ប្រភេទចុះចតបាន ដោយបំពាក់បច្ចេកវិទ្យាថ្មីបំផុត សម្រាប់សុវត្ថិភាព និងសន្តិសុខដល់អ្នកដំណើរ។ អាកាសយានដ្ឋានមានចំណតយន្តហោះរហូតដល់ទៅ ៣៨ គ្រោងប្រកាសដាក់​ឱ្យដំណើរការនៅពាក់កណ្តាលខែ តុលា ឆ្នាំ ២០២៣ ខាងមុខនេះ ដោយមានសមត្ថភាពទទួលអ្នកដំណើរប្រមាណ ៧លាននាក់ក្នុងមួយឆ្នាំ។ នៅក្នុងដំណាក់កាលទី២ អាចទទួលអ្នកដំណើរដល់ ១០លាននាក់ក្នុងមួយឆ្នាំ ហើយដំណាក់​កាលទី៣ អាចទទួលអ្នកដំណើរបានរហូតដល់ ២០លាននាក់នៅក្នុងមួយឆ្នាំ៕