ព័ត៌មានជាតិ

គណបក្សប្រជាជនកម្ពុជាខេត្តកំពង់ធំ ដង្ហែក្បួនបិទយុទ្ធនាការឃោសនាបោះឆ្នោត មានសមាជិកបក្សចូលរួម ជិត ១ ម៉ឺននាក់

បានផុស

៤ ខែ មុន

នៅ

ថ្ងៃសុក្រ ២១ កក្កដា ២០២៣

ដោយ

នៅព្រឹកថ្ងៃទី ២១ ខែកក្កដា ឆ្នាំ ២០២៣ លោកបណ្ឌិត ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងប្រធានក្រុមការងារមូលដ្ឋានចុះជួយ ខេត្តកំពង់ធំ និងលោក ងួន រតនៈ សមាជិកគណៈកម្មាធិការកណ្ដាលគណបក្សប្រជាជនកម្ពុជា និងប្រធានគណៈកម្មាធិការគណបក្សប្រជាជនកម្ពុជាខេត្តកំពង់ធំ ដឹកនាំសមាជិក សមាជិកា គណបក្សប្រជាជនកម្ពុជា ជិត ១០,០០០ នាក់ នៅក្រុងស្ទឹងសែន ខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីបិទយុទ្ធនាការឃោសនាបោះឆ្នោត ធ្វើឡើងនៅសួនកុមារ ក្រុងស្ទឹងសែន ដែលមានសមាជិកគណបក្សប្រជាជនកម្ពុជា ជិត ១០,០០០ នាក់ មកពីស្រុកកំពង់ស្វាយ ស្រុកសន្ទុក និងក្រុងស្ទឹងសែន ដោយចេញដំណើររួមគ្នាទៅកាន់ស្រុករបស់ខ្លួន ដែលកំពុងតែរង់ចាំដើម្បីបិទយុទ្ធនាការឃោសនារកសំឡេងឆ្នោត។ សម្រាប់ស្រុក ៦ ទៀត បានរៀបចំដង្ហែក្បួននៅទីប្រជុំជនក្នុងស្រុករៀងៗខ្លួន ដោយប្រមូលផ្ដុំសមាជិកយកពីឃុំរបស់ខ្លួន ហើយក្នុងការហែក្បួនយុទ្ធនាការឃោសនាបោះឆ្នោតជ្រើសរើសតំណាងរាស្ត្រនីតិកាលទី ៧ បានប្រព្រឹត្តិទៅតាមស្រុករបស់ខ្លួនយ៉ាងអធិកអធមតាមរថយន្ត តូច ធំ ម៉ូតូ ជាច្រើនគ្រឿង មានការលាយឡំសំឡេងឃោសនាសព្ទ និងសម្រែកឃោសនាផងដែរ។

តាមការបញ្ជាក់ពីលោក ប្រែង សាវុធ ប្រធានគណៈកម្មាធិការរៀបចំការបោះឆ្នោតខេត្តកំពង់ធំ បានឲ្យដឹងថា ការដង្ហែក្បួនឃោសនារកសំឡេងឆ្នោតនៅថ្ងៃទី ២១ កក្កដានេះ មានតែគណបក្សប្រជាជនកម្ពុជា ១ ប៉ុណ្ណោះ ដែលបានដង្ហែក្បួនឃោសនា។ សម្រាប់យុទ្ធនាការឃោសនាបោះឆ្នោត ជ្រើសរើសតំណាងរាស្ត្រ អាណត្តិទី ៧ រយៈពេល ២១ ថ្ងៃ ដែលបានចាប់ផ្ដើមកាលពីថ្ងៃទី ១ ខែកក្កដា ឆ្នាំ ២០២៣ ត្រូវបិទបញ្ចប់នៅថ្ងៃទី ២១ ខែកក្កដា ឆ្នាំ ២០២៣ នេះ ដោយយុទ្ធនាការជាង ២០ ថ្ងៃ កន្លងទៅនេះ បានប្រព្រឹត្តិទៅក្រោមបរិយាកាសល្អប្រសើរ គ្មានអំពើហិង្សាកើតឡើងនោះទេ។

លោកបន្តថា នៅខេត្តកំពង់ធំ មាន ១៥ គណបក្សនយោបាយ ដែលបានចូលរួមប្រកួតប្រជែងក្នុងការបោះឆ្នោតអាណត្តិទី ៧ មានប្រជាពលរដ្ឋក្នុងបញ្ជីឈ្មោះបោះឆ្នោតសរុប ៤៥៦,៧០៥ នាក់ និងមានការិយាល័យបោះឆ្នោតសរុបចំនួន ១,១៥២ ការិយាល័យបោះឆ្នោត៕

អត្ថបទ ៖ ឈាង មករា