ក្រុមហ៊ុនជប៉ុន គ្រោងអភិវឌ្ឍផ្ទះបន្តោងដើមឈើ​លំដាប់សណ្ឋាគារផ្កាយ៥ លើភ្នំគូលែន

ក្រុមហ៊ុន TreeFul របស់ប្រទេសជប៉ុន គ្រោងចំណាយទុនវិនិយោគសាងសង់ «ផ្ទះបន្តោងដើមឈើប្រណីតៗ» ដើម្បីបំបែកកំណត់ត្រាថ្មីនៅលើភ្នំគូលែន ក្រោយបំបែកឯតទគ្កកម្មផ្ទះបន្តោង (Tree house) ប្រណីតកម្រិត​សណ្ឋាគារផ្កាយ៥ លំដាប់ពិភពលោក (Guinness World Records) នៅកោះអូគីណាវ៉ា កាលពីដើមខែ សីហា ឆ្នាំ​ ២០២២ កន្លងទៅនេះ។

កាលពីដើមឆ្នាំ ២០២៣ លោក Satoru Kikugawa ជាវិស្វករដ៏ល្បីម្នាក់លំដាប់ពិភពលោក និងជាស្ថាបនិកក្រុមហ៊ុន TreeFul ដែលជាក្រុមហ៊ុនសាងសង់ផ្ទះបន្តោងដើមឈើដ៏ប្រណីតៗនៅលើ កោះអូគីណាវ៉ា បានចុះទៅផ្ទាល់នៅ​តាមទីតាំងមួយចំនួននៃប្រទេសកម្ពុជា ដោយលោកមានចំណាប់អារម្មណ៍ក្នុងការសាងសង់ផ្ទះបន្តោងឈើប្រណីតៗ នៅលើភ្នំប្រវត្តិសាស្ត្រ នៃខេត្តសៀមរាប។

គម្រោងនេះ ^«នឹងផ្តល់ផលចំណេញជាច្រើនដល់កម្ពុជាទាំងផ្នែកសេដ្ឋកិច្ច បរិស្ថាន និងការកាត់បន្ថយភាពក្រីក្ររបស់​ពលរដ្ឋនៅក្នុងតំបន់នោះផងដែរ ព្រោះដោយសារ ផ្ទះបន្តោងឈើ វានឹងក្លាយទៅជាកញ្ចប់ផលិតផលទេសចរណ៍​មួយថ្មីនៅកម្ពុជា  ជាពិសេសវាជានឹងក្លាយ​ឧបករណ៍ជួយទាក់ទាញភ្ញៀវទេសចរដែលមានគុណភាពឲ្យមកលេងកំសាន្ត និងពន្យាពេលស្នាក់នៅ^»។

បន្ថែមពីលើនេះ ក្រុមហ៊ុនបានបញ្ជូនអ្នកជំនាញទាំងផ្នែកកសិកម្ម ផ្នែកបរិស្ថាន និងផ្នែកបច្ចេកទេស ចុះមកត្រួត​ពិនិត្យវាយ​តម្លៃអំពី​សក្តានុពល និងផលប៉ះពាល់នៅក្នុងតំបន់នោះ និងឈានដល់ការកសាងផែនការមេ ដាក់ជូន​ក្រសួងពាក់ព័ន្ធ ដើម្បីស្មើសុំការអនុញ្ញាតសម្រាប់ការវិនិយោគ ខណៈដែលតំបន់ភ្នំគូលែន មានដើមឈើធំៗ មានទឹក មានសត្វព្រៃ និងនៅជិតអតីតរាជធានីបុរាណ ដូច្នេះវាត្រូវនឹងគំនិតនៃការបង្កើតផ្ទះបន្តោងដើមឈើនេះឡើង។

លោក Katsuhito បានលើកឡើងទៀតថា ផ្ទះបន្តោងឈើនេះ នឹងត្រូវរចនាឡើងដោយប្រណីតភាព ហើយជាគម្រោង​មួយដែលមានភាពប្រទាក់ក្រឡាគ្នាជាមួយបរិស្ថាន ខណៈប្រទេសជប៉ុន ជាប្រទេស​ដែលស្រឡាញ់បរិស្ថាន ដោយស្រប​ទៅតាមគោលដៅអភិវឌ្ឍប្រកបដោយចីរភាព (SDG)។

យោងតាមន្ទីរព័ត៌មានខេត្តសៀមរាប បានឱ្យដឹងថា គម្រោងអភិវឌ្ឍរបស់ក្រុមហ៊ុន TreeFul នេះ ជាគំនិតច្នៃប្រឌិតមួយ ដោយផ្សាភ្ជាប់នឹងបរិស្ថាន និងជីវៈចម្រុះ ហើយវាមិនបានបំផ្លាញដើមឈើនោះទេ ផ្ទុយទៅវិញ ជួយការពារដល់ដើម​ឈើពីការកាប់បំផ្លាញផងដែរ៕

អត្ថបទ៖ ផល ធារិត