IOC ដាក់បំរាមអតីតប្រធានអូឡាំពិកអាស៊ីរយៈពេល៣ឆ្នាំ

លោក Sheikh Ahmad Al-Fahad Al-Sabah ដែលបានព្យួរដោយខ្លួនឯងជាសមាជិកនៃគណៈកម្មាធិការអូឡាំពិកអន្តរជាតិ (IOC) ត្រូវបានហាមឃាត់ចាប់ពីថ្ងៃទី​២៧ ខែ​កក្កដា ឆ្នាំ​២០២៣​ទៅ រយៈពេល៣ឆ្នាំ បន្ទាប់ពីតួនាទីរបស់ខ្លួននៅក្នុងការបោះឆ្នោតក្រុមប្រឹក្សាអូឡាំពិកអាស៊ី (OCA) ដ៏ចម្រូងចម្រាសកាលពីដើមខែនេះ។

IOC ក៏បានប្រកាសថា ពួកគេបដិសេធទទួលស្គាល់ការបោះឆ្នោតប្អូនប្រុស​​របស់​លោក Sheikh Ahmad គឺលោក Sheikh Talal Fahad Al-Saba ធ្វើ​ជា​ប្រធាន IOC រហូតដល់មាន​ការស៊ើបអង្កេតត្រឹមត្រូវត្រូវ។ 

លោក Sheikh Talal Fahad បានជំនួសបងប្រុសរបស់ខ្លួន លោក Sheikh Ahmad ដែលបានដឹក​នាំ​ OCA អស់រយៈពេល ៣០ឆ្នាំរហូតដល់ឆ្នាំ២០២១ នៅពេលលោកត្រូវបានបង្ខំឱ្យចុះចេញពីតំណែង បន្ទាប់ពីត្រូវបានគេរកឃើញថា មានទោសពីបទក្លែងបន្លំ​ក្នុងតុលាការ នៅទីក្រុងហ្សឺណែវ ហើយត្រូវបានកាត់ទោសឱ្យជាប់ពន្ធនាគារយ៉ាងហោចណាស់ ១៣ខែ។

រឿងរបស់ លោក Sheikh Talal អាយុ ៥៨ឆ្នាំវិញ ថ្មីៗនេះលោកបានផ្តួលមិត្តរួមជាតិគុយវ៉ែត លោក Husain Al-Musallam ដែលជាអគ្គនាយកអង្គការ និងជាប្រធាន World Aquatics នៅមហាសន្និបាត OCA ក្នុងទីក្រុងបាងកក ដោយសំឡេង ២៤ ទល់នឹង ២០។

មុនពេលការបោះឆ្នោតនៅទីក្រុងបាងកកចាប់ផ្តើម ប្រធានគណៈកម្មការ​សីលធម៌របស់ OCA លោក Wei Jizhong បានព្រមានថា ពួកគេបាន​រក​ឃើញសញ្ញានៃ “ភាពមិនប្រក្រតី” ដែលពួកគេគ្រោងនឹងស៊ើបអង្កេតបន្ទាប់ពីការបោះឆ្នោត។

OCA ត្រូវបានបង្កើតឡើងក្នុងឆ្នាំ១៩៨២ ដោយឪពុករបស់លោក Fahad Al-Ahmed Al-Jaber Al-Sabah ដែលបានដឹកនាំ​រហូតដល់ឆ្នាំ១៩៩០ នៅពេល​លោក​ត្រូវបានសម្លាប់​នៅ​វិមាន Dasman ជា​ថ្ងៃដំបូងនៃការលុកលុយរបស់អ៊ីរ៉ាក់ លើគុយវ៉ែត។

លោក Sheikh Ahmad បានស្នងតំណែងពីគាត់នៅឆ្នាំបន្ទាប់ ហើយបានដឹកនាំអង្គការរហូតដល់គាត់ត្រូវបានបង្ខំឱ្យចុះចេញពីតំណែង ហើយត្រូវបានជំនួសដោយលោក Randhir Singh ដែលមានសញ្ជាតិឥណ្ឌា ជាបណ្តោះអាសន្ន៕

ប្រែសម្រួល៖ មន្នីរ័ត្ន
ប្រភព៖ insidethegames.biz