រាជរដ្ឋរដ្ឋាភិបាលបន្តអាណត្តិ​ឧត្តម​ក្រុមប្រឹក្សាពិគ្រោះយោបល់បើកឱ្យគណបក្សមិនបានចូលរួមបោះឆ្នោតអាចចូលរួមបាន

សម្ដេចតេជោ ហ៊ុន សែន ​នាយករដ្ឋមន្ត្រីកម្ពុជា ​មានប្រសាសន៍នៅថ្ងៃទី ៣០ ខែកក្កដា ឆ្នាំ ២០២៣នេះថា ​សម្រាប់​អាណត្តិ​ទី ៧ នៃរដ្ឋសភានេះ ​រាជរដ្ឋាភិបាល​អាណត្តិទី ៧ ថ្មី ​សម្រេចបន្ត​ឱ្យមាន ​«​ឧត្តម​ក្រុមប្រឹក្សាពិគ្រោះ និង​ផ្តល់​យោបល់​»។

សម្ដេចតេជោ ហ៊ុន សែន បន្តថា កម្ពុជាមានតម្រូវការក្នុងការប្រមូលធាតុចូល នៃបណ្ដាគណបក្សនយោបាយទាំងអស់ ដើម្បីចូលរួមក្នុងការកសាងប្រទេស ដែលសម្ដេចអះអាងថា ក្រុមប្រឹក្សាពិគ្រោះ និងផ្ដល់យោបល់ក៏នឹងត្រូវឱ្យមាន ក្នុងនិតិកាលទី៧ ជាបន្តទៀត។

រាជរដ្ឋាភិបាលថ្មី នឹងធ្វើព្រះរាជក្រឹត្យដើម្បីដាក់ឱ្យដំណើរការនូវក្រុមប្រឹក្សា ពិគ្រោះយោបល់ ដូចនិតិកាលទី ៦ ដែលមានប្រធានប្រតិភូ អនុប្រធានប្រតិភូ និងលេខាធិការ។

សម្ដេចតេជោ ហ៊ុន សែន បញ្ជាក់ថា ​គណបក្សនយោបាយមួយនឹងមានឥស្សរជន ៣ រូប ចូលរួម។ សម្ដេចតេជោ បន្តថា នេះក៏អាចជាលទ្ធភាពមួយ បើកឱ្យគណបក្សដែលមិនបានចូលរួមការបោះឆ្នោតអាចចូលរួមបាន ខណៈលទ្ធភាពនេះនាយករដ្ឋមន្ត្រីថ្មីនឹងធ្វើការលើការបង្កើតឧត្តមក្រុមប្រឹក្សាពិគ្រោះយោបល់៕

អត្ថបទ៖ ឡេង ដេត