ពលរដ្ឋ​ក្រុង​បាត់ដំបង​មិន​ហ៊ាន​ប្រើ​ទឹកស្អាត​ ខណៈទឹក​ប្រែពណ៌​នាំ​ឲ្យមានក្តី​បារម្ភ

នៅថ្ងៃទី០៤ ខែសីហានេះ ប្រជាពលរដ្ឋនៅក្រុង​បាត់ដំបងភ្ញាក់ផ្អើលខណៈ​ទឹកស្អាត​ប្រែពណ៌​ ហើយ​នាំ​គ្នា​ផ្អាកប្រើប្រាស់​ដោយសារ​មានការបារម្ភ។

អ្នកស្រី ចាន់នី រស់នៅភូមិ រំចេក៤ សង្កាត់ រតន: ក្រុងបាត់ដំបង រួមអ្នកភូមិជាច្រើនទៀតបានសួរ​ដេញដោលគ្នាទៅវិញទៅមកទៅលើហេតុផលដែលបង្កឲ្យទឹកស្អាតប្រែពណ៌ដូចប្រេងហើយក៏នាំគ្នាផ្អាកប្រើប្រាស់​។

ពលរដ្ឋ​មួយ​រូប​ទៀត​ឈ្មោះ មុំ រស់នៅក្រុងបាត់ដំបងបាន​បើកទឹកប្រើប្រាស់នៅព្រឹកថ្ងៃទី ០៤ ខែសីហានេះ ស្រាប់តែឃើញមានពណ៌ឡើងដូចប្រេងក៏បានសួរទៅស្វាមី។ តែស្វាមីលោកស្រីក៏មិនដឹងហេតុដូចអ្នកស្រីដែរ។ លោកស្រីក៏ដើរសួរអ្នកក្បែរខាង ហើយអ្នកក្បែរខាងក៏មានករណីបែបនេះបានកើតឡើងដូចគ្នាដែរ ហើយក៏​សម្រេចមិនប្រើប្រាស់មួយ​រយះ​សិន។

ករណីទឹកស្ទឹងសង្កែរងផលប៉ះពាល់ពីសារធាតុគីមីពីក្រុមហ៊ុនចិនមួយកន្លែង បានបង្កការភ្ញាក់ផ្អើលនៅលើបណ្តាញសង្គមហ្វេសប៊ុកយ៉ាងផុសផុល ក្រោយពីប្រជាពលរដ្ឋបានថតពណ៌ទឹកក្នុងស្ទឹងមានសភាពពណ៌ខ្មៅជាមួយសត្វត្រីងាប់ជាច្រើននៅក្នុងស្ទឹង ទើបបង្កឲ្យមានការភ្ញាក់ផ្អើលនិងព្រួយបារម្មណ៍មកដល់ពេលនេះនៅមិនទាន់ស្ងប់នៅឡើយ។

ករណីដែលមានសារធាតុគីមីនៅក្នុងទឹកស្ទឹងសង្កែដែលបង្កដោយក្រុមហ៊ុនចិនមួយកន្លែងនោះ បើតាមការអះអាងរបស់ប្រជាពលរដ្ឋដែលនៅក្បែរក្រុមហ៊ុនបង្កនោះថា មិនមែនជាលើកទីមួយនោះទេ។ តែដោយឡែកលើកនេះបានកើតឡើងខុសពីលើកមុនៗ ព្រោះវាមានទំហ៊ំធំជាងមុននិងបានសម្លាប់សត្វត្រីយ៉ាងច្រើន រហូតបានរីករាលដាលដល់ផ្នែកខាងក្រោមថែមទៀត។

ប្រភពដដែលបញ្ជាក់ថា បើតាមប្រភពពីពលរដ្ឋដែលបានដឹងហេតុការណ៍បានបង្ហើបថា រោងចក្រ​របស់ក្រុមហ៊ុនចិនដែលតែងបង្កគឺក្រុមហ៊ុន (អ៊ឺកាង) ដែលមានទីតាំងនៅខាងក្រោម (ទំនប់ពហុបំណងសេកសក) ស្ថិតក្នុងស្រុករតនមណ្ឌល ខេត្ត​បាត់ដំបង។

នៅព្រឹកថ្ងៃទី៤ ខែនេះ អាជ្ញាធរ​ខេត្ត​បាន​បើក​កិច្ចប្រជុំបន្ទាន់មួយ ដែលក្នុងនោះសុទ្ធសឹងជាមន្ត្រីមកពីអង្គភាពជំនាញ និងបណ្តាស្រុកមួយចំនួនដែលស្ថិតនៅជាប់ដងស្ទឹងសង្កែ។ ក្រោយ​ចប់ការ​ប្រជុំ ក្រុមការងារ​បានបន្តចុះ​ទៅកាន់ទីតាំងរោងចក្រចិនផ្ទាល់តែម្តង ដើម្បីពិនិត្យលើករណីទឹកកខ្វក់នេះ។ ប៉ុន្តែលទ្ធផលមិនទាន់ដឹងថា តើរដ្ឋបាលខេត្តនឹងមានវិធានការបែបណានោះឡើយទេ។

​​កាលពីថ្ងៃ ០៣ សីហា ម្សិលមិញនេះ អង្កភាព​រដ្ឋាករទឹក​បាត់ដំបង​ក៏​បាន​​ចេញ​សេចក្តី​ជូនដំណឹង​ ក្រោយ​ទទួលបា​ន​ព័ត៌មានតាមបណ្តាញ​សង្គមចែករំលែកតៗគ្នាលើការប្រែពណ៌ទឹកស្ទឹងសង្កែ។

បើ​តាមការ​​បញ្ជាក់របស់​​អង្គភាព​រដ្ឋាករទឹក​ ថ្នាក់ដឹកនាំមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
ខេត្ត​​​បាត់ដំបង និងថ្នាក់ដឹកនាំអង្គភាពរដ្ឋាករទឹកបាត់ដំបង រួមទាំងមន្ត្រីជំនាញបានចុះទៅពិនិត្យពីស្ថានភាពប្រភពទឹកពិនិត្យឃើញថា ទឹកពិតជាមានការប្រែប្រួលខុសប្លែកពីធម្មតានិងគួរឲ្យសង្ស័យពិតមែន។

ដើម្បីគ្រប់គ្រងនិងធានាគុណភាពទឹកស្អាតជូនដល់អតិថិជន អង្គភាពរដ្ឋាករទឹកបាត់ដំបងបានដុតដៃដុតជើងចុះទៅ ពិនិត្យស្ថានភាពជាក់ស្តែងនៃប្រភពទឹកធ្វើផលិតកម្មនៅស្ទឹងសង្កែ។

ជាលទ្ធផលបានពិនិត្យឃើញថា ទឹកស្ទឹងសង្កែពិតជាមានការប្រែប្រួលឡើងពណ៏ខុសប្លែងពីធម្មតា។ ដើម្បីដោះស្រាយបញ្ហាប្រឈមនៃបម្រែបម្រួលស្ថានភាពទឹកខាងលើ អង្គភាពរដ្ឋាករទឹកបាត់ដំបងបានចាត់តាំងក្រុមអ្នកបច្ចេកទេសផ្នែកត្រួតពិនិត្យគុណភាពទឹកនៅតាមបន្ទប់ពិសោធន៍ឲ្យនៅប្រចាំការតាមដានត្រួតពិនិត្យគុណភាពទឹកជាប្រចាំ។

យ៉ាងណា​ស្ថានភាពគុណភាពទឹកមិនមានអ្វីប្រែប្រួលគួរឲ្យកត់សម្គាល់ឡើង ពោលគឺគុណភាពទឹកស្អាតនៅតែរក្សាបានគុណភាពល្អ អនុលោមតាមស្ដង់ដារគុណភាពទឹកស្អាតរបស់អង្គភាពនៅឡើយ៕

បើតាមការបញ្ជាក់ពីអង្គភាពរដ្ឋាករទឹកបាត់ដំបង គិតត្រឹមម៉ោងនេះស្ថានភាពគុណភាពទឹកមានការប្រែពណ៌ប្លែកខុសពីធម្មតា ប៉ុន្តែចំពោះគុណភាពទឹកស្អាតវិញនៅតែរក្សាបានគុណភាពល្អអនុលោមតាមស្តង់ដារគុណភាពទឹកស្អាតរបស់អង្គភាពនៅឡើយ៕

អត្ថបទ៖ សៅ សារិទ្ធ