តើក្នុងភូមិសាស្ត្ររាជធានីភ្នំពេញ មានស្ពានឆ្លងកាត់ទន្លេចំនួនប៉ុន្មាន?

គិតត្រឹមខែសីហា ឆ្នាំ២០២៣នេះ ក្នុងភូមិសាស្ត្ររាជធានីភ្នំពេញ មានស្ពានឆ្លងកាត់ទន្លេដែលសាងសង់រួចរាល់ចំនួន៦ស្ពាន និងកំពុងសាងសង់ ១ស្ពាន ហើយត្រៀមសាងសង់ចំនួន៣ស្ពានបន្ថែមទៀត។ ស្ពានទាំងនោះ មានដូចជា៖

១/ស្ពានព្រះមុន្នីវង្សចាស់  

ស្ពានព្រះមុន្នីវង្សចាស់ សាងសង់ឡើងដំបូងឆ្នាំ១៩២៨ ដែលមានប្រវែង២៦៩ម៉ែត្រ សម្ពោធឱ្យប្រើប្រាស់ដោយព្រះបាទមុន្នីវង្ស។ ក្នុងឆ្នាំ១៩៦៤ ស្ពាននេះ មានសភាពទ្រុឌទ្រោមខ្លាំង តម្រូវឱ្យសាងសង់ថ្មីឡើងវិញ។ ស្ពានមុន្នីវង្សចាស់ ត្រូវបានជួសជុលឡើងវិញជាបន្តបន្ទាប់ ដើម្បីបំពេញតម្រូវការប្រើប្រាស់របស់ពលរដ្ឋដែលតែងធ្វើដំណើរពីផ្ទៃម្ខាងនៃទន្លេបាសាក់ចូលមករាជធានីភ្នំពេញ។

២/ស្ពានកម្ពុជា-ជប៉ុនជ្រោយចង្វា

ស្ពានកម្ពុជា-ជប៉ុនជ្រោយចង្វារទី១ ឬ នីហុនបាស៊ី សាងសង់នៅឆ្នាំ១៩៦៣ មានប្រវែង៩៧០ម៉ែត្រ លាតសន្ធឹងកាត់លើទន្លេសាប រាជធានីភ្នំពេញ។ កំឡុងសង្គ្រាមឆ្នាំ១៩៧២ ស្ពាននេះ ត្រូវគេបំផ្ទុះគ្រាប់បែក ដើម្បីកុំឱ្យដឹកស្បៀងចូលរាជធានីភ្នំពេញបាន។ ព្រោះតែជាស្ពាននេះ មានសារៈតភ្ជាប់ពីរាជធានីភ្នំពេញទៅកាន់ខេត្តនានានៃភាគឦសាននៃប្រទេស ហើយជាស្ពានមានអត្ថន័យជានិមិត្តរូបកម្ពុជា-ជប៉ុនផង     នៅឆ្នាំ១៩៩២ ជប៉ុនបានជួសជុលតភ្ជាប់ស្ពានឡើងវិញ និងដាក់ឲ្យដំណើរការនៅឆ្នាំ១៩៩៤។ ដោយសារតែមានអាយុកាលច្រើន នៅឆ្នាំ២០១៧ រដ្ឋាភិបាលជប៉ុន បានផ្ដល់ជំនួយឥតសំណងចំនួន៣០លានដុល្លា ដើម្បីជួសជុលឡើងវិញ។ ក្រោយជួសជុលរយៈពេលជាងមួយឆ្នាំ ស្ពានមិត្តភាពកម្ពុជា-ជប៉ុន បានដាក់ឱ្យប្រើប្រាស់ឡើងវិញនៅពាក់កណ្ដាលខែមេសា ឆ្នាំ២០១៩។

៣/ស្ពានព្រះមុន្នីវង្សថ្មី

ស្ពានព្រះមុន្នីវង្សថ្មី ឬស្ពានច្បារអំពៅ  ជាស្ពានដែលមានប្រវែង២៦៨ម៉ែត្រ ទទឹង ១៤ម៉ែត្រលាងសន្ធឹងឆ្លងកាត់ផ្ទៃទន្លេបាសាក់។ ស្ពាននេះ បើកការដ្ឋានសាងសង់ថ្ងៃទី២៣ ខែធ្នូ ឆ្នាំ២០០៦  និងបានបើកសម្ពោធប្រកាសឲ្យប្រើប្រាស់ជាផ្លូវការ នៅថ្ងៃទី២៧ ខែឧសភា ឆ្នាំ២០០៩។

៤/ស្ពានព្រែកព្នៅ

ស្ពានព្រែកព្នៅ ជាប្រភេទស្ពានបេតុងលាតសន្ធឹងឆ្លងកាត់ទន្លេសាបប្រវែង ៩៩៦ម៉ែត្រ ទទឹង១៤ម៉ែត្រ វិនិយោគ និងសាងសង់ដោយក្រុមហ៊ុន លីយ៉ុងផាត់គ្រុប។ ស្ពាននេះ ត្រូវបានដាក់សម្ពោធឱ្យប្រើប្រាស់ជាផ្លូវការនៅឆ្នាំ២០១០ ក្រោមលក្ខខណ្ឌគិតប្រាក់ពីអ្នកធ្វើដំណើរឆ្លងកាត់។ ដើម្បីលើកស្ទួយជីវភាពប្រជាជន រដ្ឋាភិបាលកម្ពុជាបានទិញស្ពាននេះ ហើយដាក់ឱ្យធ្វើដំណើរដោយឥតគិតថ្លៃចាប់ពីថ្ងៃទី១៥ ខែតុលាឆ្នាំ២០១៧ រហូតមក។

៥/ស្ពានមិត្តភាពកម្ពុជា-ចិន ជ្រោយចង្វារ

ស្ពានមិត្តភាពកម្ពុជា-ចិន ឬ ស្ពានជ្រោយចង្វារទី២ បានសម្ពោធដាក់ឱ្យប្រើប្រាស់ជាផ្លូវការនៅខែតុលា ឆ្នាំ២០១៥ ក្រោយត្រូវបានបើកការដ្ឋានសាងសង់រយៈពេល៣៨ខែ គឺក្នុងឆ្នាំ២០១១។ ស្ពានជ្រោយចង្វារទី២ ដែលមានប្រវែង ៧១៩ម៉ែត្រ បានចំណាយថវិកាសាងសង់ប្រមាណជាង ២៧លានដុល្លារ ជាកម្ចីឥណទានរបស់រដ្ឋាភិបាលចិន។

៦/ស្ពានបេតុងខ្សែកាបឬស្សីកែវ

ស្ពានបេតុងខ្សែកាបឬស្សីកែវ ជាប្រភេទស្ពានបេតុងប្រវែង៦៤២ម៉ែត្រ ទទឹង២០.៥ម៉ែត្រ។ ស្ពាននេះសាងសង់ដោយក្រុមហ៊ុនOCIC ប្រើរយៈពេលសាងសង់ចំនួន៦៨ខែ ចំណាយថវិកាសាងសង់ចំនួន ៣៥លានដុល្លាអាមេរិក។ ស្ពានបេតុងខ្សែកាបឆ្លងកាត់ទន្លេសាបដែលតភ្ជាប់ពីខណ្ឌឬស្សីកែវទៅតំបន់អភិវឌ្ឍន៍ទីក្រុងរណបជ្រោយចង្វារនេះ ត្រូវបានដាក់សម្ពោធឱ្យប្រើប្រាស់ជាផ្លូវការនៅថ្ងៃទី៣១ ខែឧសភា ឆ្នាំ២០២៣។

៧/ស្ពានបេតុងខ្សែកាបកោះពេជ្រ កោះនរា

ស្ពានបេតុងខ្សែកាបកោះពេជ្រ-កោះនរា ស្ថិតក្នុងដំណាក់កាលកំពុងសាងសង់។ ស្ពាននេះ មានប្រវែង ៨២៤ ម៉ែត្រ កម្ពស់ ៧០ម៉ែត្រ ជាស្ពានបេតុងខ្សែកាប លាតសន្ធឹងឆ្លងកាត់ទន្លេបាសាក់ ពីតំបន់កោះពេជ្រទៅកាន់តំបន់អភិវឌ្ឍន៍កោះនរា ចំណាយទុនវិនិយោគ ៣៨លានដុល្លារអាមេរិក សាងសង់ដោយក្រុមហ៊ុនOCIC ក្រោមការគ្រប់គ្រងរបស់រដ្ឋបាលរាជធានីភ្នំពេញ។ កន្លងមក លោក កើត ឆែ អភិបាលរងរាជធានីភ្នំពេញធ្លាប់បានឡើងថា ក្រុមការងារសាងសង់ស្ពានកំពុងពន្លឿនការសាងសង់ស្ពាននេះឱ្យរួចរាល់ ដើម្បីឱ្យពលរដ្ឋបានប្រើប្រាស់មុនព្រះរាជពិធីបុណ្យអុំទូក។

ក្រៅពីស្ពានដែលសាងសង់រួចរាល់ និងកំពុងសាងសង់ចំនួន៧ខាងលើ រដ្ឋាភិបាលបានរៀបចំគម្រោងសាងសង់ស្ពានមិត្តភាពកម្ពុជា-កូរ៉េខាងត្បូង ដែលនឹងចំណាយថវិកាជិត២៥០លានដុល្លារ។ បើតាមគម្រោងសាងសង់ ស្ពានមិត្តភាពកម្ពុជា-កូរ៉េ នឹងត្រូវសាងសង់ជា២ស្ពាន។ ស្ពានទី១ ឆ្លងកាត់ទន្លេសាប ចាប់ផ្តើមពីចំណុចម្តុំសួនផ្សាររាត្រី ឆ្លងទៅត្រើយម្ខាងជ្រោយចង្វារ ក្បែរសណ្ឋាគារសុខា និងស្ពានទី ២  ចាប់ផ្តើមពីចំណុចត្រើយម្ខាងជ្រោយចង្វារ ក្បែរសណ្ឋាគារសុខា ឆ្លងកាត់ទន្លេមេគង្គទៅអរិយក្សត្រ ។ ចំពោះគម្រោងសាងសង់ស្ពានទាំង២នេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់បានលើកឡើងថា នៅមិនទាន់កំណត់ថ្ងៃបើកការដ្ឋានសាងសង់នៅឡើយទេ ពីព្រោះតែត្រូវដោះស្រាយផលប៉ះពាល់ជូនប្រជាពលរដ្ឋ និងស្វែងរកក្រុមហ៊ុនសាងសង់។

បន្ថែមពីនេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់លើកឡើងថា រដ្ឋាភិបាល មានគម្រោងអាទិភាពសាងសង់ស្ពានឆ្លងកាត់ទន្លេបាសាក់ប្រវែង៨៤៥ម៉ែត្រ ភ្ជាប់ពីតំបន់ចាក់អង្រែទៅកាន់តំបន់ព្រែកប្រា ដែលនឹងចំណាយថវិការសាងសង់ប្រមាណ ៦០លានដុល្លាអាមេរិក។

ជាការគត់សម្គាល់ ស្ពានឆ្លងកាត់ទន្លេ បានក្លាយជាមធ្យោបាយដ៏សំខាន់មិនអាចខ្វះបានសម្រាប់សម្រួលដល់ការធ្វើដំណើររបស់ពលរដ្ឋ ដែលរស់នៅតាមបណ្ដាខេត្តផ្ទៃម្ខាងនៃទន្លេសាប និងទន្លេបាសាក់ចូលមកភ្នំពេញ និងចេញពីភ្នំពេញទៅវិញយ៉ាងមានសុវត្ថិភាព ចំណេញពេលវេលា ព្រមទាំង ចំណេញថវិកា៕

ដោយ៖ ង៉ិល ណារ៉ាត់