អ្នកនាំពាក្យ៖ ការផ្សាយថា រដ្ឋាភិបាលកាត់ខេត្តបួនជាប់បឹងទន្លេសាប​ឱ្យក្រុមហ៊ុនចិនវិនិយោគ​ក្នុងតម្លៃ ១២ពាន់លានដុល្លារ ជាព័ត៌មានក្លែងក្លាយ

ក្រោយពីមានផ្ទុះព័ត៌មានផ្សព្វផ្សាយថា ខេត្តចំនួនបួនជាប់បឹងទន្លេសាប រួមមាន ខេត្តបាត់ដំបង ពោធិ៍សាត់ សៀមរាប និងខេត្តកំពង់ធំ មានផ្ទៃដីសរុប ៧៥ម៉ឺនហិចតា ត្រូវបានរដ្ឋាភិបាល កាត់ឱ្យក្រុមហ៊ុនចិន ឈ្មោះ Danong Agricultural Development Group វិនិយោគក្នុងតម្លៃ ១២ពាន់លានដុល្លារនោះ អ្នកនាំពាក្យក្រសួងកសិកម្ម បានចេញមកអះអាងថា ជារឿងមិនពិតនោះទេ។

កញ្ញា អឹម រចនា អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានឱ្យដឹងនៅរសៀលថ្ងៃទី ១៨ សីហា ថា ទាក់ទិននឹងគម្រោងវិនិយោគរបស់ក្រុមហ៊ុនខាងលើនេះ មិនទាន់មានការអនុញ្ញាតណាមួយពីសំណាក់ក្រសួងកសិកម្ម ជាពិសេសរាជរដ្ឋាភិបាល ពីក្រុមហ៊ុនអំពីការស្នើវិនិយោគវិស័យកសិកម្មនៅកម្ពុជា នៅឡើយទេ។

អ្នកនាំពាក្យក្រសួងកសិកម្ម បានឱ្យដឹងដូច្នេះថា«ជំនួបណាមួយរវាងក្រុមហ៊ុននេះ និងស្ថាបនផ្សេងៗ គឺជារឿងរបស់គាត់ ប៉ុន្តែជាផ្លូវការមិនមានការអនុញ្ញាតឱ្យក្រុមហ៊ុននេះ ធ្វើការវិនិយោគនៅកម្ពុជា នៅឡើយទេ ហើយព័ត៌មានណាមួយ​ដែលផ្ទុយពីការបញ្ជាក់របស់ក្រសួង គឺជាព័ត៌មានក្លែងក្លាយ»។

ជាមួយគ្នានេះ ក្រសួងកសិកម្ម បានអំពាវនាវសូមឱ្យសាធារណជនប្រុងប្រយ័ត្នកុំជឿព័ត៌មាន ឬដំណឹងណាមួយ ដែលមិនបានចេញជាផ្លូវការពីសំណាក់ក្រសួង។

សូមបញ្ជាក់ថា ក្រោយមានការផ្សព្វផ្សាយព័ត៌មាននេះ ដោយហ្វេសប៊ុកឈ្មោះ Sarath Sun ក្នុងខ្លឹមសារដូច្នេះ​ថា«ខេត្តចំនួន4ជាប់បឹងទន្លេសាប រួមមាន បាត់ដំបង ពោធិ៍សាត់ សៀមរាប និងខេត្តកំពង់ធំ ដែលមានផ្ទៃទំហំ 75 ម៉ឺនហិកតា ត្រូវរដ្ឋាភិបាលកាត់ឱ្យក្រុមហ៊ុនចិន ឈ្មោះ Danong Agricultural Development Group វិនិយោគក្នុងតំលៃ 12ពាន់លានដុល្លារ» រដ្ឋមន្រ្តីក្រសួងកសិកម្មលោក ឌិត ទីណា ក៏បានឆ្លើយតបតាមរយៈ​ខមិនភ្លាមៗ ដូច្នេះដែរថា «ជាព័ត៌មានក្លែងក្លាយ»៕

អត្ថបទ៖ ផល ធារិត!