ក្រុមការងារTYDA នាំយកសម្ភារបរិក្ខាពេទ្យ និងសម្ភារប្រើប្រាស់មួយចំនួនប្រគល់ជូនរដ្ឋបាលសាលា​ខេត្តស្វាយរៀង

ដោយមានយកចិត្តទុកដាក់ដ៏ខ្ពង់ខ្ពស់ពីសំណាក់ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី នាព្រឹកថ្ងៃទី២៥ ខែសីហា ឆ្នាំ២០២៣ បានចាត់ក្រុមការងារសមាគមគ្រូពេទ្យស្ម័គ្រចិត្តយុវជនសម្តេចតេជោ TYDA នាំយកសម្ភារបរិក្ខាពេទ្យ និងសម្ភារប្រើប្រាស់មួយចំនួនទៅប្រគល់ជូនរដ្ឋបាលសាលាខេត្តស្វាយរៀង សម្រាប់ប្រើប្រាស់ទៅតាមតម្រូវការជាក់ស្តែង។

លោក តូច ប៉ូលីវ៉ា អភិបាលរងខេត្តស្វាយរៀង តាងនាមឱ្យថ្នាក់ដឹកនាំ មន្រ្តីរាជការគ្រប់លំដាប់ថ្នាក់ នៃរដ្ឋបាលខេត្តស្វាយរៀង បានធ្វើការគោរពថ្លែងអំណរគុណចំពោះ ឯកឧត្ដមកិត្តិទេសាភិបាលបណ្ឌិត និងលោកស្រី ដែលជានិច្ចកាលតែងគិតគូរយកចិត្តទុកដាក់ក្នុងការថែទាំសុខភាពរបស់ប្រជាពលរដ្ឋ។

ទន្ទឹមនឹងនេះ លោកក៏បានគោរពជូនពរលោកទាំងទ្វេ ក្នុងការបន្ដដឹកនាំព្រះរាជាណាចក្រកម្ពុជា ឆ្ពោះទៅកាន់សុខសន្តិភាព វឌ្ឍនភាព និងភាពសម្បូរសប្បាយរុងរឿងជានិច្ចនិរន្តរ៍តរៀងទៅ ។

សូមបញ្ជាក់ថា សម្ភារបរិក្ខាពេទ្យ និងសម្ភារប្រើប្រាស់មួយចំនួន ដែលត្រូវប្រគល់ជូនរួមមាន៖ សម្ភារបរិក្ខារពេទ្យ​(ចម្រុះ)​ចំនួន ២០០កេស ខ្នើយចំនួន ១០០ ខ្នើយ ស្រោមដៃចំនួន ២៥.០០០គូរ អាវការពាររោគកម្រិត២ចំនួន ១៥.០០០ អាវ ឈើច្រត់រៀនដើរចំនួន ៣០ សម្រាប់ និងជើងរៀនដើរមានកង់ចំនួន ១០ សម្រាប់ ៕