ទឹកហូរបុកច្រាំងទន្លេបាក់ច្រោះប្រវែង ៦០០ ម៉ែត្រនៅស្រុកពាមរក៍

ចរន្តទឹកទន្លេមេគង្គបានហូរបុកច្រាំងបណ្ដាលឱ្យច្រាំងទន្លេប្រវែងប្រមាណ ៦០០ ម៉ែត្ររងការបាក់ច្រោះ ស្ថិតនៅភូមិព្រែកខ្សាយ ឃុំព្រែកខ្សាយ ស្រុកពាមរក៍ ខេត្តព្រៃវែង។

ក្រុមការងារបច្ចេកទេសនៃនាយកដ្ឋានជលសាស្ត្រ និងការងារទន្លេ នៃក្រសួងធនធានទឹក​ និងឧតុនិយម​នៅថ្ងែទី ២៩ ខែសីហា ឆ្នាំ២០២៣​ បានចុះពិនិត្យច្រាំងទន្លេ​​ ដែលច្រោះបាក់ ប្រឈមដល់ផ្លូវជាតិលេខ១១ ស្ថិតក្នុងភូមិព្រែកខ្សាយ ឃុំព្រែកខ្សាយ (ក) ស្រុកពាមរក៍ ខេត្តព្រៃវែង។

ទីតាំងច្រាំងទន្លេដែលហូរច្រោះប្រឈមប៉ះពាល់ដល់ផ្លូវជាតិលេខ១១នេះ មានប្រវែងប្រមាណ ៦០០ម៉ែត្រ និងបានបាក់ហូរច្រោះកៀកផ្លូវជាតិប្រមាណ ៤ម៉ែត្រប៉ុណ្ណោះ សម្រាប់ទីតាំងដែលប្រឈមខ្លាំង។

ក្រសួងធនធានទឹក និងឧតុនិយមបញ្ជាក់ថា កត្តាចម្បងនៃការច្រោះបាក់នេះ បណ្តាលមកពីចរន្តទឹកទន្លេមេគង្គហូរបុកច្រាំង។

ក្រុមការងារបច្ចេកទេសនឹងសិក្សាពីវិធានការការពារច្រាំងនេះ​ ដេីម្បីទប់ទល់ការបាក់ដល់ផ្លូវជាតិ និងផ្ទះសម្បែងប្រជាជនតទៅទៀត៕