បេសកកម្មជិះកង់ក្នុងទ្វីបអឺរ៉ុបជិត ៦សប្តាហ៍ លោក ផូ ផល្លា ទៅដល់គោលដៅចុងក្រោយ ប្រទេសអាល្លឺម៉ង់

ក្រោមអ័ព្ទដ៏ក្រាស អាកាសធាតុក៏ត្រជាក់ខ្លាំង លោក ផូ ផល្លា បន្តដំណើរស្ទើរមិនបានសម្រាកចេញពី Koblenz ធ្វើយ៉ាង​ណា​ដើម្បីអាចទៅគោលដៅចុងក្រោយ ទឹកដី Frankfurt ប្រទេសអាល្លឺម៉ង់ ទោះយប់ក៏ដោយ។

មុននេះ (ម៉ោងពេលនៅអាល្លឺម៉ង់ ប្រហែលម៉ោង ១រំលងអាធ្រាត្រ យប់ថ្ងៃទី០៣ កញ្ញា) លោក ផូ ផល្លា បានរៀបរាប់ថា
“Day 40: ផ្លូវចុងក្រោយ​ Koblenz > Frankfurt ទោះបីយប់ត្រូវមកដល់​ Frankfurt បេីមិនដូច្នេះទេអត់កន្លែងសម្រាកហេីយ”។ បើតាមឃ្លីប និងសំណេរនេះ អាចបញ្ជាក់បានថា លោកបានទៅដល់ទឹកដីគោលដៅចុងក្រោយ នៅយប់ថ្ងៃទី០២ កញ្ញា ពោលរយៈពេល ៤០ថ្ងៃ ។

ក្នុងដំណើរដ៏វែងឆ្ងាយនេះ អ្នកស្ម័គ្រចិត្តជិះកង់រៃអង្គាសប្រាក់ដើម្បីកុមារកម្ពុជារូបនេះ បានឆ្លងកាត់ឧបសគ្គជាច្រើន រួមទាំង​អាកាសធាតុថែមទៀត តែទោះយ៉ាងណា លោកនៅតែតស៊ូសម្រេចបេសកកម្មនេះ និងនាំយកថវិកាពីសប្បុរសជន តាមតំបន់ប្រទេសទ្វីបអឺរ៉ុប ពិសេសស្ថានឯកអគ្គរាជទូតកម្ពុជា និងខ្មែរដែលរស់នៅប្រទេសទាំងនោះ ក៏បានចូលរួមបរិច្ចាគផងដែរ។

ក្នុងបេសកកម្មជិះកង់ដើម្បីរៃអង្គាសប្រាក់ជួយកុមារកម្ពុជា មានជំងឺមហារីក និងជំងឺផ្សេងៗ ដែលកំពុងសម្រាកព្យាបាល នៅមន្ទីពេទ្យកុមារអង្គរ លោក ផូ ផល្លា បានជិះកង់ផ្សងព្រេងកាត់ប្រទេសក្នុងទ្វីបអឺរ៉ុបចំនួន៨ រួមមាន បារាំង ស្វីស លុច្សសំបួរ បែលហ្សិច អង់គ្លេស អ៊ីតាលី ហូឡង់ និងអាល្លឺម៉ង់ តាមផែនការ ៤១ថ្ងៃ ចម្ងាយ ៣០០០​គីឡូម៉ែត្រ ហើយចំពោះថវិកា​ដែល​ប្រមូល​បាន គឺ​ផ្ដល់​ជូន​មន្ទីរពេទ្យ​កុមារ​អង្គរ​ខេត្តសៀមរាប​ទាំងអស់។

គួរបញ្ជាក់ថា លោក ផូ ផល្លា ជាអ្នកស័្មគ្រចិត្តជិះកង់សប្បុរស រៃអង្គាសថវិកាមួយរូបផ្សេងទៀត ក្រៅពីលោក ទីវ តារារិទ្ធ ដែលទើបនឹងបញ្ចប់បេសកកម្មថ្ងៃទី២៦ ខែសីហា ថ្មីៗនេះ៕