សាយ ចាប់ផ្តើមកម្មវិធី “បេះដូងអច្ឆរិយ” ដើម្បីបង្ហាញក្តីស្រលាញ់ជូនកុមារកម្ពុជា

“បេះដូងអច្ឆរិយ” ដើម្បីបង្ហាញក្តីស្រលាញ់ជូនកុមារកម្ពុជា ដែលជាគំនិតផ្តួចផ្តើមឡើងពីសំណាក់តារាចម្រៀង Original Song លោកអ៊ួន បឋម ហៅសាយ បានចាប់ផ្តើមហើយ ចាប់ពីព្រឹកថ្ងៃទី១៩ ខែធ្នូ ឆ្នាំ២០២៤ ដែលគោលដៅចេញពី “រាជធានីភ្នំពេញ-ខេត្តកំពង់ឆ្នាំង”។ នេះបើតាមការឱ្យដឹង ពីលោក សាយ ។

សាយ បានឱ្យដឹងទៀតថា “បេះដូងអច្ឆរិយ” គឺជាកម្មវិធីបង្ហាញក្ដីស្រលាញ់ជូនកុមារនៅកម្ពុជា ដោយការជិះកង់ចេញដំណើរពីរាជធានីភ្នំពេញទៅកាន់ខេត្តកំពង់ឆ្នាំង។ លោកថា “ពួកយើងក្រុមការងារ RUN WITH SAI ស្វាគមន៍ការចូលរួមពីពុកម៉ែបងប្អូនទាំងអស់ មកចូលរួមជិះកង់ជូនដំណើរជាមួយគ្នាព្រមទាំងបរិច្ចាគជាមួយយើង ដើម្បីបង្ហាញក្ដីស្រលាញ់ជូនកុមារនៅកម្ពុជា”។

សាយ បន្ថែមទៀតថា “បេះដូងអច្ឆរិយ” បង្ហាញក្ដីស្រលាញ់ជូនកុមារនៅកម្ពុជា ខ្ញុំបាទសាយ នឹងជិះកង់ ,រត់ ,និងហែលទឹកជុំវិញបឹងទន្លេសាប ចាប់ពីថ្ងៃទី១៩ ដល់ ថ្ងៃទី ២៧ខែធ្នូ ឆ្នាំ២០២៤ ដើម្បីរៃអង្គាសថវិកាជួយដល់មន្ទីរពេទ្យគន្ធបុប្ផានិង មន្ទីរពេទ្យកុមារអង្គរខេត្តសៀមរាប ខណៈនេះក៏ជាកម្មវិធីអមព្រឹត្តិការណ៍សាទរកម្ពុជា Celebrating Cambodia ក្នុងមោទនភាពជាតិ អត្តសញ្ញាណជាតិ និងការរួបរួមក្រោមទង់ជាតិតែមួយផងដែរ។

ទន្ទឹមនេះ លោកក៏បានអំពាវនាវដល់បងប្អូនមហាជន និងសប្បុរសជន ដើម្បីចូលរួមបរិច្ចាគទាំងអស់គ្នា ដើម្បីបង្ហាញក្ដីស្រលាញ់ជូនកុមារនៅកម្ពុជា។ តារាចម្រៀង Original Song លោក អ៊ួន បឋម ហៅ សាយ ត្រូវបានមហាជនអ្នកគាំទ្រចាត់ទុកថា លោកគឺជាសិល្បករខ្មែរមួយរូប ដែលលេចធ្លោតាមរយ:កិច្ចការងារចូលរួមសង្គម ពិសេស កន្លងមក លោកក៏បានបង្កើតកម្មវិធីរត់ដើម្បីប្រមូលថវិកាជួនដល់មន្ទីពេទ្យគន្ធបុប្ផា និងមន្ទីពេទ្យកុមារអង្គរជាដើម៕ អត្ថបទ៖ ចាន់រ៉ា