លោក ស ថេត ចង្អុលបង្ហាញដល់មន្ត្រីចំណុះស្នងការដ្ឋាននគរបាលជាតិ រួមគ្នាការពារពលរដ្ឋ និងរាជរដ្ឋាភិបាល

លោក ស ថេត អគ្គស្នងការនគរបាលជាតិ បានចង្អុលបង្ហាញដល់មន្ត្រីចំណុះស្នងការដ្ឋាននគរបាលជាតិ រួមគ្នាការពារពលរដ្ឋ និងរាជរដ្ឋាភិបាលកម្ពុជា។ លោកបានចង្អុលបង្ហាញបែបនេះ​កំឡុងពេលជួបសំណេះសំណាលជាមួយមន្ត្រីនគរបាលជាតិ ចំណុះអគ្គស្នងការដ្ឋាននគរបាលជាតិ នាថ្ងៃទី០៥ ខែកញ្ញា ឆ្នាំ២០២៣។

លោក ស ថេត បានបន្តណែនាំឱ្យមន្ត្រីចំណុះឱ្យស្នងការនគរបាលជាតិត្រូវបន្តរួមគ្នាជាធ្លុងមួយ មានសាមគ្គីភាព ឯកភាពផ្ទៃក្នុងរឹងមាំ ដើម្បីបំពេញតួនាទី ភារកិច្ចតាមការកំណត់ ស្របតាមជំនាញ គោរពឋានានុក្រម និងច្បាប់ លិខិតបទដ្ឋានពាក់ព័ន្ធ។ ក្នុងនោះ លោកក៏បានសំណូមពរដល់មន្រ្តីនគរបាលជាតិទាំងអស់​ មេត្តាផ្ដល់ការគាំទ្រ និងកិច្ចសហការយ៉ាងជិតស្និទ្ធរវាងថ្នាក់ដឹកនាំ និងកងកម្លាំងនគរបាលក្រោមឱវាទ និងរវាងអង្គភាព និងអង្គភាព ដើម្បីប្រសិទ្ធភាពការងារ។

ជាមួយគ្នានេះ លោក ស ថេត បានឱ្យមន្ត្រីក្រោមឱវាទ ត្រូវកែទម្រង់កងកម្លាំងនគរបាលជាតិ អភិវឌ្ឍស្ថាប័ន និងកសាងធនធានមនុស្ស យកចិត្តទុកដាក់ខ្ពស់ចំពោះជីវភាព សុខភាពរបស់កងកម្លាំង ជំរុញការអនុវត្តគោលនយោបាយចំពោះមន្ត្រីនគរបាលចូលនិវត្តន៍ និងបាត់បង់ សមត្ថភាព ពលី ពិការដោយសារបុព្វហេតុសន្តិសុខជាតិ។

លោក បានគូសបញ្ជាក់ឱ្យនរគបាលជាតិ ត្រួតពិនិត្យកងកម្លាំងឱ្យបានជាប់ជាប្រចាំ ទាំងបរិមាណ វត្តមាន និងសតិអារម្មណ៍ ដើម្បីលើកកម្ពស់គុណភាពការងារ។ ករណីមានការខ្វះខាតកងកម្លាំង ឬកងកម្លាំងណាមួយជួបការលំបាក ត្រូវធ្វើរបាយការណ៍តាមឋានានុក្រម។ បន្តពង្រឹងវិន័យកងកម្លាំងនគរបាលឲ្យបានម៉ឺងម៉ាត់ ដើម្បីធានាបាននូវសេចក្តី ថ្លៃថ្នូរ សីលធម៌របស់កងកម្លាំងនគរបាលជាតិ ដើរទន្ទឹមនឹងការខិតខំពង្រឹង សមត្ថភាព ការហ្វឹកហ្វាត់បំប៉នជំនាញជាប្រចាំ ព្រមទាំងការពង្រឹងជំនាញបច្ចេក វិទ្យាព័ត៌មាន និង ឌីជីថល ដើម្បីលើកកម្ពស់ការថែរក្សាការពារសន្តិសុខជាតិ សណ្តាប់ធ្នាប់ និងសុវត្ថិភាពក្នុងសង្គមឲ្យបានល្អប្រសើរគ្រប់កាលៈទេសៈ។

បន្ថែមពីនេះ ត្រូវពង្រឹងប្រសិទ្ធភាព និងរបៀបរបបការងារតាមសមត្ថកិច្ច ជំនាញ និងឋានានុក្រម ដើរទន្ទឹមនឹងការគិតគូរលើកទឹកចិត្តកងកម្លាំងនគរបាលដែលមានស្នាដៃល្អ និងធ្វើការដាក់វិន័យកងកម្លាំងនគរបាលដែលប្រព្រឹត្តខុសឆ្គង ប្រកបដោយភាពត្រឹមត្រូវ មានតម្លាភាព។

លោក ស ថេត ក៏បានឱ្យមន្ត្រីចំណុះឱ្យស្នងការដ្ឋាននគរបាលជាតិ រួមគ្នាការពារថែរក្សានូវសមិទ្ធផល ដែលសម្រេចបានយ៉ាងលំបាកលំបិន ហើយនឹងបន្តរួមគ្នាពង្រឹងសមត្ថភាពស្ថាប័ន និងធនធានមនុស្សនៃអគ្គស្នងការដ្ឋាននគរបាលជាតិ ពង្រឹងសាមគ្គីភាព ឯកភាពផ្ទៃក្នុង ពង្រឹង ប្រសិទ្ធភាពការងារ និងខិតខំអនុវត្តការងារនានាក្រោមសមត្ថកិច្ចទទួលខុសត្រូវរបស់អគ្គ ស្នងការដ្ឋាន និងការដឹកនាំរបស់ក្រសួងមហាផ្ទៃ ឲ្យសម្រេចបានសមិទ្ធផលថ្មីៗថែមទៀត៕