តំណាងរាស្ត្រ​​​ទើប​ជាប់ឆ្នោត​ខេត្ត​បាត់ដំបង​​ ចេញមុខ​​ធានា​តម្លៃស្រូវ​ស្រាល​កសិករមិនឲ្យ​ធ្លាក់​ថ្លៃ​

លោក ភួ ពុយ ដែលទើបទទួលបាន​តួនាទីជាតំណាងរាស្ត្រមណ្ឌលខេត្ត​បាត់ដំបង រួមលោក ឈឹម វជិរា ប្រធានមន្ទីរកសិកម្មខេត្ត បានចុះជួបសំណេះសំណាលស្វែងរកយន្តការដោះស្រាយពាក់ព័ន្ធតម្លៃស្រូវកសិករក្នុង​ខេត្ត​បាត់ដំបង​ធ្លាក់ចុះយ៉ាងឆាប់រហ័ស។

ក្នុង​ពេល​ជួប​កសិករ​ តំណាងរាស្រ្ត​​លោក ភូ ពុយ និងប្រធាន​​មន្ទីរកសិកម្ម​ខេត្ត​បាត់ដំបង បានប្រកាស​សន្យា​​ទប់​តម្លៃ​ស្រូវ​មិន​ឲ្យ​ធ្លាក់​ថ្លៃ​ដើម្បីធានា​ជីវភាព​ប្រជាកសិករ។

ប្រជាកសិករនៅស្រុកបវេលបានបង្ហោះវីដេអូ ពាក់ព័ន្ធតម្លៃស្រូវធ្លាក់ចុះយ៉ាងឆាប់រហ័ស ដោយ​បង្ហាញ​ក្តីបារម្មណ៍យ៉ាង​ខ្លាំង ខណៈដែលពួកគាត់​បាន​ចំណាយ​យ៉ាង​ច្រើនទៅលើជីដែលមានតម្លៃខ្ពស់រួមទាំងសម្ភារ:ក្នុងការថែទាំផ្សេងៗផង ហើយស្នើ​សុំឲ្យមន្ត្រីពាក់ព័ន្ធជួយអន្តរាគមន៍។

ដោយឡែក​ប្រជាកសិករនៅតាមបណ្តាស្រុកមួយចំនួន​ទៀត​ដូចជាស្រុកឯកភ្នំ និងស្រុកសង្កែ ក៏​នាំគ្នាព្រួយបារម្មណ៍ថាឆ្នាំនេះនឹងមិនរួចថ្លៃដើមនោះទេ និង​ត្រូវជំពាក់គេវ័ន្តករមិនខានបើសិនជាមន្ត្រីជំនាញពាក់ព័ន្ធមិនជួយសម្របសម្រួលតម្លៃឲ្យបានសមរម្យទេនោះ​។

ពាក់ព័ន្ធក្តីបារម្មណ៍របស់ប្រជាកសិករ កាលពីពេលថ្មីៗនេះ​មន្ត្រីកសិកម្មខេត្តបាត់ដំបង​បាន​​ចុះសហការ​ជាមួយអាជ្ញាធរឃុំកំពុងព្រៀង និងឃុំរាំងកេសី ក្នុងស្រុកសង្កែ ដើម្បីរកដំណោះស្រាយទប់ស្កាត់ការធ្លាក់ចុះតម្លៃស្រូវរបស់ប្រជាកសិករ។

ការសម្របសម្រួលទប់ស្កាត់តម្លៃស្រូវធ្លាក់ចុះនេះ បានធ្វើឡើងនៅទីតាំងសាលាឃុំកំពុងព្រៀង និងឃុំរាំងកេសី ក្នុងស្រុកសង្កែ ក្នុងនោះលោក ភួ ពុយ ដែលទើបបានទទួលតួនាទីជាអ្នកតំណាងរាស្ត្រមណ្ឌលបាត់ដំបង​រួមលោក ឈឹម វជិរា ប្រធានមន្ទីរកសិកម្មខេត្ត បានចុះជួបសំណេះសំណាលស្វែងរកយន្តការដោះស្រាយបញ្ហាធ្លាក់ថ្លៃស្រូវស្រាលដេីមរដូវ ដោយ​ធានា​មិន​ឲ្យ​ក្រោម​តម្លៃ ១ ១៥០ ០០០ រៀល​ក្នុងមួយតោន។

តំណាងកសិករដែល​បាន​ចូលរួម​ជាមួយអាជ្ញាធរមូលដ្ឋានឃុំកំពង់ព្រៀង និងឃុំរាំងកេសី ស្រុកស្រុកសង្កែ ក្រោយ​ទទួល​ការ​ធានា​​ចំពោះ​ដំណោះស្រាយទប់ស្កាត់ដើម្បីរក្សាលំនឹងតម្លៃ ធ្វើឲ្យប្រជាកសិករបានធូរស្រាលក្នុងចិត្ត ហើយ​ពួកគាត់អាចទទួលយកបាន​តាមរយះការអន្តរាគមន៍លើទីផ្សារដែលត្រូវបានកំណត់នេះ៕

អត្ថបទ៖ សៅ សារិទ្ធ