តម្លៃផ្លែស្វាយកែវមៀតធ្លាក់ចុះនារដូវប្រមូលផលលើកទី២

កាលពីរសៀលថ្ងៃទី ២០ ខែកញា ឆ្នាំ២០២៣នេះ ម្ចាស់ចម្ការបានត្អូញត្អែរនៅរដូវប្រមូលផលនៃតម្លៃស្វាយកែវរមៀតបានធ្លាក់ចុះលើកទី ២ ឆ្នាំនេះ ចាប់ផ្តើមពី១ គីឡូក្រាម តម្លៃ ២.៥០០រៀល ទៅ ៣.០០០រៀល ហើយបានបន្តធ្លាក់ចុះជាបន្តបន្ទាប់ សម្រាប់ស្វាយកែវរមៀតស្រោបលេខ១ នៅសល់តែត្រឹម ១ គីឡូក្រាមនៅតម្លៃ ១.២០០រៀល រីឯស្វាយរមៀតខៀវនៅតែត្រឹម ៥០០ ទៅ៦០០រៀលក្នុង១គឺឡូក្រាម។

បើតាមការលើកឡើងពីម្ចាស់ចម្ការផ្តាល់បានឲ្យដឹងថា​ បើដំណាំស្វាយកែវរមៀតក្នុងតម្លៃនេះ បើសិនបូកដកទៅវានិងស្មើដើម ឬខាតបន្តិចបន្តួច នេះសម្រាប់តែម្ចាស់ចម្ការផ្ទាល់ខ្លួនឯង បើសិនជាអ្នកជួលដីគេធ្វើចម្ការវិញនោះក្នុងការចំណាយដើមផ្សេងៗនិងតម្លៃនេះវាមិនអាចទប់ទល់បាននោះឡើយដោយសារស្វាយធ្លាក់ចុះ។

លោក យង់ ង៉ែត ជាអ្នកម្ចាស់ចម្ការដែលមានចម្ការនៅក្នុងភូមិសាស្រ្តឃុំពងទឹកស្រុកដំណាក់ចង្អើរខាងលើបានឲ្យដឹងថាលោកមានដំណាំស្វាយជិត ១ ពាន់ដើមលោកលើកឡើងថា កន្លងមកយ៉ាងហោចណាស់ស្វាយលេខ ១ បាន១គីឡូក្រាម ក្នុងតម្លៃបាន១,៥០០រៀលឡើងទៅក្នុងមួយគីឡូក្រាមទើបហៅថាបានចំណេញខ្លះៗ។

បើតាមទិន្នន័យរបស់ប្រធានមន្ទីរពាណិជ្ជកម្មខេត្តកែបបានឲ្យដឹងថា​​ ការនាំចេញផ្លែស្វាយទូទាំងខេត្តឆ្នាំ២០២៣នេះដែលប្រជាពលរដ្ឋបានប្រមូលផលស្វាយកែវល្មៀតនៅដើមរដូវស្វាយប្រភេទលេខ ១ ដែលបាននាំចេញទៅកាន់ទីផ្សារប្រទេសវៀតណាមតាមច្រកភ្នំដិនស្ថិតក្នុងខេត្តតាកែវ និងទៅប្រទេសថៃ តាមច្រកព្រំខេត្តប៉ៃលិន។

បើយោងតាមការលើឡើងរបស់លោក អ៊ុង សុភាព អ្នកចម្ការរូបទៀតដែលស្ថិតនៅក្នុងភូមិចំការបី ឃុំពងទឹក ស្រុកដំណាក់ចង្អើរខេត្តកែប បានលើកឡើងឱ្យដឹងថា លោកថា សព្វថ្ងៃមានស្វាយប្រមាណជាង៦០០ដើម ដែលបានប្រមូលផល ៣ឆ្នាំមកហើយ ប៉ុន្តែសម្រាប់ឆ្នាំនេះ ដល់ពេលស្វាយដែលបេះប្រមូលផលដែរនោះ ដោយសារតម្លៃធ្លាក់ទាបពេកទើបលោកទុកបន្តទៀត ក្រែងឈ្មួញឱ្យថ្លៃខ្ពស់ជាងនេះ។

លោកជាម្ចាស់ចម្ការបានលើឡើងថានេះហើយជាការប្រមូលផលជាលើកទី២ហើយសម្រាប់ឆ្នាំនេះ ដោយកាលពីលើកទី១ លោកបានប្រមូលផលស្វាយសរុបបានប្រមាណ ៣០តោន ទាំងស្រោប ទាំងមិនបានស្រោប) ហើយលើកទី២នេះ ទើបតែប្រមូលផលបានប្រមាណ ១០តោនប៉ុណ្ណោះ ដោយសារកត្តាភ្លៀងខ្លាំងពេក។

លោកបន្តថា ស្វាយស្រោបពេលនេះ សម្រាបតែតម្លៃនៅត្រឹម​ ១.០០០​ រៀល ទៅ១.២០០រៀលក្នុង១គឺឡូក្រាម ដោយឡែកស្វាយខៀវ(អត់ស្រោប) នៅតែត្រឹម៥០០ ទៅ៦០០រៀល ក្នុង១គឺឡូក្រាមតម្លៃនេះបានរួចខ្លួន សម្រាប់យើងដែលមានដីខ្លួនឯង និងធ្វើខ្លួនឯងនិងជួលគេខ្លះៗ)នោះ។

លោក បានបញ្ជាក់ថាកាលពីអត់មានស្វាយវាឡើង (ជាង២.០០០រៀលក្នុង១គឺឡូក្រាម) ស្រាបតែពេលមានស្វាយវាធ្លាក់ចុះ នៅសល់តែជាង ១.០០០រៀលតិចតូចប៉ុណ្ណោះ ចំណាយដើមអស់ជាង៤ពាន់ដុល្លារទៅ៥ពាន់ដុល្លារ ទើបតែលក់ឥឡូវយកលុយបានវិញជាង ១០លានរៀលឆ្នាំទៅបានចំណេញខ្លះ ឆ្នាំនេះចប់ហើយ។

លោក ឯម រតន៍មន្នី ប្រធានមន្ទីរពាណិជ្ជកម្មខេត្តកែប បានបញ្ជាក់ថាពាក់ព័ន្ធនិងតម្លៃស្វាយនេះដែល មិនមែនជាការបន្ថោកថ្លៃរបស់ឈ្មួញកណ្តាលនោះទេ វាអាចមកពីគុណភាពស្វាយមិនទាន់ឆ្លើយតបនឹងតម្រូវការទីផ្សារនៅឡើយ ឬបរិមាណផលច្រើនជាងតម្រូវការទីផ្សារ។

លោកបង្ហាញការយល់ឃើញថា កសិករ ឬម្ចាស់ចម្ការ គួរទំនាក់ទំនងពិគ្រោះយោបល់ជាមួយមន្រ្តីជំនាញ(មន្ទីរកសិកម្ម រុក្ខា ប្រមាញ់ និងនេសាទ) ដើម្បីស្វែងយល់បន្ថែមពីបច្ចេកទេសដាំដុះ ថែទាំដើម្បីលើកកម្ពស់គុណភាពស្វាយ និងចៀសវាងពង្រីកការដាំដុះច្រើនហួសពីតម្រូវការទីផ្សារ។

លោកបញ្ជាក់ថា ទោះជាយ៉ាងណាក្តី មន្ទីរជំនាញពាក់ព័ន្ធបាន​និងកំពុងសិក្សាស្រាវជ្រាវបន្ថែមពីបញ្ហានេះ។

ទោះជាយ៉ាងណា អ្នកចម្ការដែលស្ថិតនៅភូមិសាស្រ្តតំបន់ភូមិចំការបី ឃុំពងទឹកស្រុកដំណាក់ចង្អើរខេត្តកែប បានសំណូមពរដល់អ្នកពាក់ព័ន្ធទាំងអស់ សូមជួយធ្វើយ៉ាងណា រក្សាតម្លៃណាមួយដែលអាចផ្តល់ឱកាសដល់ អ្នកចម្ការបានសល់លុយខ្លះ ក្រោយតែពីការលក់ចេញនូវផលិតផលកសិកម្ម ជាពិសេសស្វាយកែវល្មៀតនេះតែម្តង។

បើយោងតាមទិន្នន័យរបស់ ប្រធានមន្ទីរពាណិជ្ជកម្មខេត្តកែប បានឱ្យដឹងថាក្នុងរយៈពេល៩ខែឆ្នាំ២០២៣នេះ នៅទូទាំងខេត្ត​ បាននាំចេញផ្លែស្វាយទៅកានទីផ្សារប្រទេសវៀតណាម​ មានទៅតាមច្រកភ្នំដិន ខេត្តតាកែវ) និងមានការនាំចេញទៅប្រទេសថៃតាម(ច្រកព្រំ ដែនខេត្តប៉ៃលិន) បានប្រមាណ​១៤.៨០០តោន៕

អត្ថបទ​ :សឹង រ៉ាត់