ស្ទះចរាចរណ៍ម្ដុំព្រែកប្រាផ្សារខ្មែរឥស្លាមពលរដ្ឋចង់ឱ្យអាជ្ញាធរចេញចំណាត់ការ

ប្រជាពលរដ្ឋក៏ដូចជាអ្នកធ្វើដំណើរឆ្លងផ្សារខ្មែរឥស្លាម ស្ថិតនៅតាមបណ្តោយផ្លូវលេខ ៣៦៩ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញនាំគ្នាទន្ទឹងរង់ចាំមើលលោកអភិបាលរងខណ្ឌច្បារអំពៅទទួលបន្ទុកសណ្តាប់ធ្នាប់លើការលក់ដូរលើផ្លូវបានដែរឬយ៉ាងណា ព្រោះទីតាំងផ្សារខាងលើនេះគ្មានអាជ្ញាធរណាធ្វើបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋសុំមិនបញ្ចេញឈ្មោះបាននិយាយថា ឲ្យតែធ្វើដំណើរមកដល់ផ្សារខ្មែរឥស្លាមខាងលើនេះគឺស្ទះចរាចរណ៍រាល់ថ្ងៃបើទោះជាមានកម្លាំងប្រជាការពារដាក់ប្រចាំការរាល់ថ្ងៃក៏ដោយ។ មូលហេតុដែលបង្កឲ្យស្ទះចរាចរណ៍ព្រោះតែអ្នកលក់ដូរដាក់កញ្ជ្រែង ចានដែកលក់លើផ្លូវបន្ថែមដាក់ឆត្រ័មកទៀត។

ទាក់ទិននឹងករណីបង្កឲ្យស្ទះចរាចរណ៍នេះដែរ លោក គិត គឹមហ៊ាង នាយករងរដ្ឋបាលសាលាខណ្ឌច្បារអំពៅ ទទួលបន្ទុកសណ្តាប់ធ្នាប់បានប្រាប់ថា លោកធ្លាប់ដឹកនាំកម្លាំងចុះរៀបចំសណ្តាប់នៅផ្សារនេះរាបើភ្លេចប៉ុន្តែបងប្អូនអ្នកលក់ដូរមិនព្រមស្តាប់ឡើយនិយាយរួមដូចវែកចកកណ្តាលបឹង។

ហើយថ្មីៗគេបានដឹងថា លោក កាទើ អះម៉ាត់សទើរ អភិបាលរងខណ្ឌច្បារអំពៅជាជនជាតិខ្មែរឥស្លាមអាចនឹងមានវិធានការណែនាំផ្សព្វផ្សាយទៅលើបងប្អូនជនជាតិឥស្លាមដែលលក់នៅផ្សារនេះបានព្រោះអភិបាលខណ្ឌច្រើនជំនាន់ហើយដែលអសមត្ថភាពក្នុងការរៀបចំទៅលើការលក់ដូរលើផ្លូវនេះ៕

អត្ថបទ៖ នរា