លោក វង្សី វិស្សុត លើកទឹកចិត្តប្រជាជនខ្មែរទាំងអស់ នាំគ្នាប្រើប្រាស់ “វចនានុក្រមខ្មែរ” ថ្មី ឱ្យអស់លទ្ធភាព

លោក វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្ដីការគណៈរដ្ឋមន្រ្តី នៅក្នុងកម្មវីធីសម្ពោធដាក់ឱ្យប្រើប្រាស់ “វចនានុក្រមខ្មែរ”ថ្មី នៃរាជបណ្ឌិត្យសភាកម្ពុជា កាលពីព្រឹកថ្ងៃចន្ទ ទី ២៥ ខែកញ្ញា ឆ្នាំ ២០២៣នេះ បានលើកទឹកចិត្តប្រជាជនខ្មែរទាំងអស់ នាំគ្នាប្រើប្រាស់វចនានុក្រមខ្មែរថ្មី ឱ្យបានគ្រប់ៗគ្នា និងឱ្យអស់ពីលទ្ធភាព ទៅក្រសួង-ស្ថាប័ន អង្គភាព និងការងារផ្សេងៗទៀត។

លោក វង្សី វិស្សុត បានបន្ថែមទៀតថា វចនានុក្រមខ្មែរថ្មីមួយនេះ គឺសក្ខីកម្ម និងជាប្រវត្តិសាស្រ្តរបស់ប្រជាជនខ្មែរទាំងអស់គ្នា នាសម័យថ្មីនេះ។ ដូចច្នេះហើយ សូមប្រជាជនខ្មែរទាំងអស់ នាំគ្នាប្រើប្រាស់ និងចេះរិះគន់ដើម្បីការស្ថាបនា ធ្វើយ៉ាងណាឱ្យភាសាជាតិមានការរីកចម្រើន ឆ្លើយតបទៅនឹងការវិវត្តរបស់សង្គមជាតិ និងសកលភាវូបនីយកម្ម នៃពិភព លោកទាំងមូល។

ក្រៅពីនេះ លោកឧបនាយរដ្ឋមន្រ្តី វង្សី វិស្សុត បានបន្តទៀតថា ភាសាគឺជាយាន សម្រាប់ទំនាក់ទំនង ទៅលើកិច្ចការ នយោបាយ សេដ្ឋកិច្ច សង្គម សាសនា នានា ហើយការចងក្រមវចនានុក្រមថ្មីនេះ ពិតជាមានសារៈសំខាន់យ៉ាងក្រៃលែង ក្នុងការជួយចងក្រង កត់ត្រា អភិរក្ស និងអភិវឌ្ឍ ភាសា និងអក្សរខ្មែរ ឱ្យបានគង់វង្សប្រកបដោយសុកតភាព របស់ប្រជាជាតិខ្មែរទាំងមូល។

សូមជម្រាបជូនថា “វចនានុក្រមខ្មែរថ្មី” គឺជាសមទ្ធិផលថ្មីមួយ ដែលកើតចេញពីការស្រាវជ្រាវចងក្រង របស់ក្រុមប្រឹក្សាជាតិភាសាខ្មែរ ហៅកាត់ថា (ក.ជ.ភ.ខ.) ដោយរក្សាពាក្យពេចន៍ទាំងស្រុង នៃវចនានុ​ក្រមខ្មែរចាស់ របស់សម្ដេចព្រះសង្ឃរាជ ជួន ណាត និងបូកបញ្ចូលពាក្យថ្មី ដែលចេញពីការស្រាវជ្រាវរបស់ ក្រុមប្រឹក្សាជាតិភាសាខ្មែរ នៃរាជបណ្ឌិតសភាកម្ពុជា៕

អត្ថបទ៖ សួស សិត