លោក វង្សី វិស្សុត ៖ ការធ្វើទំនើបកម្មភាសា និងការធ្វើទំនើបកម្មសូរនៃភាសា គឺជារឿងមួយដែលត្រូវតែធ្វើ

លោក វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្ដីការគណៈរដ្ឋមន្រ្តី ក្នុងកម្មវីធីសម្ពោធដាក់ឱ្យប្រើប្រាស់ “វចនានុក្រមខ្មែរថ្មី” របស់ក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា កាលពីព្រឹកថ្ងៃទី ២៥ ខែកញ្ញា ឆ្នាំ ២០២៣ បានមានប្រសាសន៍ថា ការធ្វើទំនើបកម្មភាសាខ្មែរ និងការធ្វើទំនើបកម្មសូរនៃភាសា គឺជារឿងមួយដែលត្រូវតែធ្វើ មិនសម្រាប់តែក្នុងក្របខណ្ឌប្រទេសកម្ពុជាឡើយ។  

ផ្ទុយទៅវិញ ប្រទេសជាច្រើននៅលើសកលលោក គេបាននាំគ្នាធ្វើទំនើបកម្មទាំងអស់នេះរួចមកហើយដែរ។ អ្វីដែលសំខាន់នោះគឺ “សូមកុំភ្លេចអត្តសញ្ញាណជាតិខ្មែរ” នេះគឺជារឿងដែលអ្នកសិក្សា ស្រាវ​ជ្រាវគ្រប់រូប ត្រូវតែនាំគ្នាគិត និងត្រូវតែនាំគ្នាធ្វើវាឡើងវិញ។

លោក វង្សី វិស្សុត បានលើកឡើងទៀតថា កត្តាចម្បងដែលនាំឱ្យមានការធ្វើទំនើបកម្មភាសា នោះគឺដោយសារតែភាសា មានការវិវត្តទៅតាមសម័យកាលឥតឈប់ឈរ។ ក្រៅពីនេះទៀត ភាសាមានការរស់រវើក ប្រៀបដូចជាជីវិតមួយ ដែលគេហៅថា “ភាសារស់”។ ដូចនេះហើយ ទើបបានជាកម្ពុជាត្រូវតែធ្វើបច្ចុប្បន្នភាពភាសា និងសូរឱ្យបានត្រឹមត្រូវ ដើម្បីធ្វើយ៉ាងណាឱ្យឆ្លើយតបទៅនឹងតម្រូវការ ប្រើប្រាស់របស់សង្គមជាក់ស្ដែង។

លោក វង្សី វិស្សុត បានបន្ថែមទៀតថា សម្រាប់ការយល់ឃើញរបស់លោក ចំពោះពាក្យដែលកម្ចីពីបរទេស គួរតែបង្កើតឡើងឱ្យបានច្រើន ដើម្បីងាយស្រួលក្នុងការប្រើប្រាស់ប្រចាំថ្ងៃ និងទំនាក់ទំនងផ្សេងៗទៀត។ ជាក់ស្ដែង ដូចជាពាក្យ Innovation បកប្រែមកភាសាខ្មែរថា នវានុវត្តន៍ ហើយត្រូវពន្យល់បន្ថែមទៀតទើបអាចយល់ន័យ ឬសេចក្តី នោះបាន។

លោក វង្សី វិស្សុត បានបន្តទៀតថា តើអាចទេប្រសិនបើយកពាក្យបរទេសមកប្រើប្រាស់តែម្ដង ដើម្បីភាពងាយស្រួល និងទាន់ពេលវេលា ដោយកុំគិតថាជាភាសាបរទេស តែត្រូវគិតថា វាជាភាសាសកល ដែលពិភពលោកកំពុងប្រើប្រាស់ជាផ្លូវការ រួចស្រេចទៅហើយ។ ការលើកឡើងនេះដោយសារ លោកយល់ឃើញថា ភាសាបាលី និងភាសាសំស្រ្កឹត ក៏ជាភាសាបរទេស ដែលខ្មែរកំពុងប្រើប្រាស់ នៅក្នុងភាសាខ្មែរបច្ចុប្បន្នដែរនោះ អ្វីដែលយើងចង់បានគ្រប់គ្នា គឺភាសាមានការសម្បូរបែប សម្រាប់ជាតិសាសន៍មួយ៕

អត្ថបទ៖ សួស សិត