ក្រុមហ៊ុន Royal Railway Cambodia សម្រេចបន្ថែមម៉ោងជិះរថភ្លើងកម្សាន្ត ភ្នំពេញ-សំរោង ៤ខ្សែរថទៀត

ដោយសង្កេតឃើញមានកំណើននៃការគាំទ្រ លើសពីការរំពឹងទុក ក្រុមហ៊ុន Royal Railway Cambodia បានសម្រេចបន្ថែមម៉ោងពេលធ្វើដំណើរ សម្រាប់រថភ្លើងចុងសប្តាហ៍ភ្នំពេញ-សំរោង ៤ខ្សែរថទៀត ដើម្បីឱ្យសាធារណជន មានឱកាសចូលរួមកម្សាន្តកាន់តែច្រើន នៅរៀងរាល់ចុងសប្តាហ៍។

បើតាមការបញ្ជាក់របស់ក្រុមហ៊ុន Royal Railway Cambodia ម៉ោងពេលដែលអាចចេញដំណើរបាន គឺនៅម៉ោង ០៩:០០ព្រឹក, ១០:០០ព្រឹក, ១១:០០ថ្ងៃត្រង់, ០១:០០រសៀល, ០២:០០រសៀល និងម៉ោង ០៣:០០រសៀល ដោយដំណើរការសម្រាប់តែថ្ងៃសៅរ៍-អាទិត្យ ប៉ុណ្ណោះ។

សម្រាប់ការជិះរថភ្លើងទៅវិញទៅមក ពីស្ថានីយរថភ្លើងភ្នំពេញ ទៅចំណតសំរោង (ពោធិ៍ចិនតុង) និងវិលត្រលប់មកចំណតភ្នំពេញវិញ សាធារណជនអាចជិះរថភ្លើងចុងសប្តាហ៍នេះបាន ដោយចំណាយត្រឹមតែ ២០០០រៀលសម្រាប់ក្មេង និងអ្នកដែលបានទិញភេស្ជជៈពីហាងកាហ្វេរថភ្លើង។ ដោយឡែក សម្រាប់ភ្ញៀវធម្មតា ត្រូវទិញសំបុត្រក្នុងតម្លៃ ៥០០០រៀល (សម្រាប់មនុស្សធំ)។

សូមជម្រាបដែរថា ការដាក់ឱ្យដំណើរការជិះរថភ្លើងពីស្ថានីយរថភ្លើងភ្នំពេញ ទៅចំណតសំរោង (ពោធិ៍ចិនតុង) គឺមានរយៈពេលប្រហែលជា ៤-៥សប្តាហ៍ហើយ។

គួរបញ្ជាក់ថា ចំពោះការទិញ ឬកក់រថភ្លើង អាចទៅទិញផ្ទាល់នៅបញ្ជរ​តាមស្ថានីយ៍រថភ្លើង ឬអាចខលទៅកាន់ភ្នាក់ងាររបស់ស្ថានីយរថភ្លើង តាមរយ:លេខ 078 888 582, 078 888 582 ។ រីឯការកក់សំបុត្រនៅលើអនឡាញវិញ គឺតម្រូវឱ្យអតិថិជនវេរលុយតាមរយ:ធនាគារ Wing តែមួយគត់៕

អត្ថបទ៖ សុធាវី