លំនៅឋានជាង ៧០០ ខ្នងក្នុងក្រុងបាត់ដំបងកំពុង​រង​ផលប៉ះពាល់ដោយទឹកជំនន់

សន្ទុះទឹកស្ទឹងសង្កែមិនទាន់មានការថមថយនៅឡើយទេ ខណៈមេឃនៅតែបន្តធ្លាក់ភ្លៀងឥតឈប់ឈរ ដែលបង្កអោយមានការលិចលង់លំនៅឋានរាប់រយខ្នង ដែលស្ថិតនៅយតាមបណ្តោយដងស្ទឹងសង្កែ។   

នៅរសៀលថ្ងៃទី ២៩ ខែកញ្ញា នេះ ទឹកស្ទឹងសង្កែបានជោរជន់រហូតដល់កម្ពស់ជិត ១៤ ម៉ែត្រ ដែលបង្កឲ្យមានការប៉ះពាល់ដល់ផ្ទះប្រជាពលរដ្ឋជាច្រើនខ្នងដែលស្ថិតនៅតាមបណ្ដោយដងស្ទឹងសង្កែដោយឡែកនៅកណ្ដាលក្រុងទឹកក៏បានហូរចូលតាមប្រព័ន្ធលូលេចផ្លូវស្ទើរគ្រប់កន្លែងផងដែរ។

យោងតាមរបាយការណ៍របស់សមត្ថកិច្ចបានបញ្ជាក់ថា សម្រាប់ក្រុងបាត់ដំបងទាំងមូលដែលមាន ១០ សង្កាត់គឺមាន ៦ សង្កាត់កំពុងរងការប៉ះពាល់ដោយទឹកជំនន់ គឺលំនៅឋានពលរដ្ឋសរុបចំនួន ៧១២ ខ្នងផ្ទះ គឺស្ថិតក្នុងសង្កាត់វត្តគរ ស្វាយប៉ោ ព្រែកព្រះស្ដេច រតនៈ ជ្រៃកោង និងសង្កាត់ក្តុលដួងទាវ។

នៅព្រឹកនេះដែរអាជ្ញាធរក្រុងបានដឹកនាំកម្លាំងសមត្ថកិច្ចក្នុងនោះមាននគរបាល កងរាជវុធហត្ថ និងកម្លាំងយោធាបានចេញប្រតិបត្តិការទប់ទឹកតាមបណ្ដោយដងស្ទឹងត្រង់តំបន់ទំនាបដើម្បីទប់ស្កាត់ទឹកជំនន់មិនឲ្យហូរចូលទៅក្នុងក្រុងនា​ប៉ែខាកខាងកើតស្ទឹង ដែលកម្រិតទឹកស្ទឹងនៅពេលនេះគឺមិនទាន់មានការថមថយនៅឡើយទេដោយគ្រាន់តែសន្ទុះទឹកឡើងយឺតៗតែប៉ុណ្ណោះ។

ដោយបច្ចុប្បន្នកម្លាំងចម្រុះនៅតែបន្តចុះពិនិត្យតាមមូលដ្ឋានដែលនៅតាមបណ្តោយដងស្ទឹងដើម្បីអន្តរាគមន៍នៅពេលដែលមានបញ្ហាកើតឡើង៕

អត្ថបទ៖ សោ និយមរ័ត្ន