ព័ត៌មានជាតិ

អ្នកនាំពាក្យ ៖ ខេត្តចំនួន ៥ រងគ្រោះដោយបាតុភូតរន្ទះបាញ់ច្រើនជាងគេ

បានផុស

៣ years មុន

នៅ

ថ្ងៃសុក្រ ៦ តុលា ២០២៣

ដោយ

អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ខេត្តចំនួន ៥ រួមមាន ខេត្តបាត់ដំបង ខេត្តកំពង់ធំ ខេត្តសៀមរាប ខេត្តក្រចេះ និងខេត្តកំពង់ឆ្នាំង បានរងគ្រោះដោយបាតុភូតរន្ទះបាញ់ច្រើនជាងគេក្នុងចំណោម ១៨ រាជធានី-ខេត្ត ដែលមានអ្នកស្លាប់ និងរបួសប្រមាណជិត ១៣០ នាក់។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ០៦ តុលានេះថា ក្នុងរយៈពេល ៩ ខែ ឆ្នាំ ២០២៣ នេះ បាតុភូតរន្ទះបាញ់បានកើតឡើងចំនួន ១២៥ លើក ខូចខាតផ្ទះ ១២ ខ្នង ស្លាប់មនុស្ស ៧៣ នាក់ របួស ៥៥ នាក់ និងងាប់គោក្របី ៩៣ ក្បាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា ក្នុងចំណោមអ្នកស្លាប់ ៧៣ នាក់ ក្នុងនោះនៅខេត្តបាត់ដំបងកើតឡើង ១៦ លើក បណ្តាលឲ្យស្លាប់ចំនួន ៩ នាក់ របួស ៣ នាក់ ខេត្តកំពង់ធំកើតឡើង ១៣ លើក បណ្តាលឲ្យមនុស្សស្លាប់ ៩ នាក់ របួស ៨ នាក់ ខេត្តក្រចេះកើតឡើងចំនួន ១៥ លើក បណ្តាលឲ្យមនុស្សស្លាប់ ៨ នាក់ របួស ១៧ នាក់ ខេត្តសៀមរាបកើតឡើង ១០ លើក បណ្តាលឲ្យមនុស្សស្លាប់ ៦ នាក់ របួស ៦ នាក់ និងខេត្តកំពង់ឆ្នាំងកើតឡើង ៨ លើក បណ្តាលឲ្យមនុស្សស្លាប់ ៦ នាក់ របួស ៨ នាក់។ ក្រៅពីមានខេត្តព្រៃវែងស្លាប់ ៥ នាក់ រតនគីរីស្លាប់ ៣ នាក់ រាជធានីភ្នំពេញស្លាប់ ១ នាក់ កណ្តាលស្លាប់ ៣ នាក់ ឧត្តរមានជ័យ ២ នាក់ តាកែវ ៣ នាក់ ស្វាយរៀង ៤ នាក់ ស្ទឹង ត្រែង ៣ នាក់ ពោធិ៍សាត់ ៤ នាក់ ព្រះវិហារ ២ នាក់ បន្ទាយមានជ័យ ៣ នាក់ ព្រះសីហនុ ១ នាក់ និងខេត្តកំពត ១ នាក់។

លោកបានបន្តថា ចំនួនអ្នករងគ្រោះដោយរន្ទះបាញ់នេះបើធៀបទៅនឹងរយៈពេល ៩ ខែដូចគ្នា ឆ្នាំ ២០២២ ឃើញថា មានការកើនឡើង ដោយ ៩ ខែ ឆ្នាំមុន គ្រោះរន្ទះបាញ់បានកើតឡើងតែ ៩៥ លើក បណ្តាលឲ្យខូចខាតផ្ទះ ២២ ខ្នង ស្លាប់មនុស្ស ៥៣ នាក់ របួស ៤៩ នាក់ និងងាប់គោក្របី ៨៤ ក្បាល ប៉ុណ្ណោះ៕

អត្ថបទ ៖ សំអឿន