កម្ពុជា សង្ឃឹមថា អាម៉េរិកបន្តជួយអាស៊ានលើកិច្ចការពាណិជ្ជកម្ម ដើម្បីជាប្រយោជន៍ដល់ជនមានពិការភាព

រដ្ឋលេខាធិការក្រសួងសង្គមកិច្ចកម្ពុជា  លោក ឯម ច័ន្ទមករា បានដាក់ក្ដីសង្ឃឹមថា សហរដ្ឋអាមេរិក តាមរយៈក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន នឹងបន្តជួយជ្រោមជ្រែងដល់អាស៊ានលើកិច្ចការពាណិជ្ជកម្ម ដើម្បីសំដៅធ្វើយ៉ាងណាឱ្យជនមានពិការភាពទទួល បាននូវការរស់នៅដោយឯករាជ្យ។ លោក​ ឯម ច័ន្ទមករា សង្ឃឹមបែបនេះនៅក្នុងកិច្ចសន្ទនាជាន់ខ្ពស់អាស៊ាន-អាមេរិកស្ដីពី “អភិវឌ្ឍន៍បរិយាបន្នពិការភាព និងភាពជាដៃគូលើសពីឆ្នាំ២០២៥”  ដែលប្រទេសឥណ្ឌូនេស៊ីធ្វើជាម្ចាស់ផ្ទះចាប់ពីថ្ងៃទី១០ ដល់ថ្ងៃទី ១២ ខែតុលា​ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឯម ច័ន្ទមករា ក្នុងនាមប្រតិភូក្រសួងសង្គមកិច្ចកម្ពុជាបានសង្ឃឹមថា អាម៉េរិកនឹងបន្តជួយដល់អាស៊ាន តាមរយៈ ក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន ដែលដើរតួនាទីសំខាន់ ក្នុងការជំរុញ និងលើកកម្ពស់សកម្មភាពពាណិជ្ជកម្មរវាងអាស៊ាន- អាម៉េរិក ដើម្បីឱ្យជនមានពិការភាពទទួល បានការរស់នៅដោយឯករាជ្យ និងការចូលរួមគ្រប់ទិដ្ឋភាពនៃជីវិត ដែលរួមបញ្ចូលនូវបរិយាកាសរូបវន្ត ការដឹកជញ្ជូន ពត៌មាន និងទំនាក់ទំនង។ រួមទាំងបច្ចេកវិទ្យាព័ត៌មាន និងប្រព័ន្ធទំនាក់ទំនង និងមធ្យោបាយ និងសេវាកម្មផ្សេងទៀតដែលបើក ឬផ្តល់ជូនសាធារណៈជនទាំងនៅក្នុងទីក្រុង និងនៅតំបន់ជនបទទាក់ទងនឹងហេដ្ឋារចនាសម្ព័ន្ធរូបវន្ត ការដឹកជញ្ជូន និងទំនាក់ទំនង រួមទាំង អគារ ផ្លូវថ្នល់ មធ្យោបាយធ្វើដំណើរ និងសម្ភារៈបរិក្ខារក្នុងផ្ទះ និងខាងក្រៅផ្សេងទៀត រួមទាំងសាលារៀន លំនៅដ្ឋាន បរិក្ខារពេទ្យ និងកន្លែងធ្វើការ។

រដ្ឋលេខាធិការរូបនេះ បានសង្កត់ធ្ងន់ថា  “ក្នុងបរិការណ៍នេះ យើងសង្ឃឹមថា សហរដ្ឋអាម៉េរិកនឹងផ្តល់ការគាំទ្រក្នុងការអភិវឌ្ឍហេដ្ឋារចនាសម្ព័ន្ធបៃតង និងថាមពលកកើតឡើងវិញ ដើម្បីលើកកម្ពស់កំណើនប្រកបដោយចីរភាពក្នុងតំបន់អាស៊ាន ពិសេសសម្រាប់ជនមានពិការភាព និងផ្តល់ការបណ្តុះបណ្តាលសម្រាប់អ្នកពាក់ព័ន្ធលើបញ្ហាលទ្ធភាពប្រើប្រាស់ដែលប្រឈមមុខនឹងជនមានពិការភាព”។

 ប្រតិភូសង្គមកិច្ចកម្ពុជាបានចាត់ទុក ការលើកកម្ពស់ទម្រង់ជំនួយ និងជំនួយសមស្របផ្សេងទៀតដល់ជនមានពិការភាព ដើម្បីធានាការទទួលបានព័ត៌មានរបស់ពួកគេគឺពិតជាមានការចាំបាច់។ ការលើកកម្ពស់ការប្រើបច្ចេកវិទ្យាព័ត៌មាន និងទំនាក់ទំនងថ្មីៗ រួមទាំងប្រព័ន្ធអ៊ីនធឺណិតដែលធ្វើឱ្យជនមានពិការភាពទទួលនូវបានការបង្កលប្រើប្រាស់នាពេលបច្ចុប្បន្ន គឺជាការឆ្លើយតបយ៉ាងសំខាន់ក្នុងការឈានទៅសម្រេចឱ្យខាងតែបាននូវដំណើរការអភិវឌ្ឍន៍ប្រកបដោយបរិយាបន្ន ជាពិសេសកិច្ចខិតខំប្រឹងប្រែងបង្កើនឯករាជ្យភាពសង្គម-សេដ្ឋកិច្ចសម្រាប់ជនមានពិការភាព។

តាមរយៈកិច្ចសន្ទនាជាន់ខ្ពស់អាស៊ាន-អាមេរិកស្តីពី សិទ្ធិជនមានពិការភាព លោក ឯម ច័ន្ទមករា រំពឹងថា  នឹងមានការផ្លាស់ប្ដូរមតិយោបល់ល្អៗ ហើយលោកក៏ជឿជាក់ថាស្មារតី «រួមគ្នាធ្វើ» របស់យើងនឹងអាចនាំមកនូវលទ្ធផលជាក់ស្ដែង សម្រាប់ការពង្រឹងបន្ថែមទៀតនូវចំណងមិត្តភាពអាស៊ាន-សហរដ្ឋអាម៉េរិក ក្នុងរយៈពេលជាច្រើនឆ្នាំទៅមុខដើម្បីសម្រេចបាននូវសក្តានុពលចំពោះកិច្ចសហប្រតិបត្តិការអាស៊ាន-សហរដ្ឋអាម៉េរិក ក្នុង វិស័យសង្គមកិច្ច ពិសេសផ្តោតលើកពិការភាព៕

ដោយ៖ ង៉ិល ណារ៉ាត់