មិនពិបាកទៅមកច្រើនដង មានចម្ងល់រឿងលិខិតស្នាមផ្សេងៗ អាចសួរតាមកម្មវិធី អគ្គនាយកដ្ឋានអត្តសញ្ញាណកម្ម

GDI eServices ជាកម្មវិធីតាមទូរស័ព្ទដៃ របស់អគ្គនាយកដ្ឋានអត្តសញ្ញាណកម្ម សម្រាប់ឆ្លើយតបនូវសំណួរ សំណូមពរ និងដោះស្រាយបញ្ហាប្រឈមរបស់ប្រជាពលរដ្ឋ ពាក់ព័ន្ធនឹងការផ្តល់សេវេាអត្តសញ្ញាណកម្មគ្រប់ប្រភេទ ដូចជា អត្រានុកូលដ្ឋាន អត្តសញ្ញាណបណ្ណ ស្ថិតិប្រជាពលរដ្ឋ និងលិខិតឆ្លងដែន។

ដើម្បីងាយស្រួលដល់បងប្អូនប្រជាពលរដ្ឋ លែងពិបាកទៅមក សង្កាត់-ខណ្ឌច្រើនដង ដើម្បីគ្រាន់តែសួរពីចម្ងល់ខ្លះៗ ទាក់ទងនឹងសេវាកម្មអត្តសញ្ញាណកម្មគ្រប់ប្រភេទ នូវលក្ខខណ្ឌស្នើសុំ ឬកែតម្រូវ អគ្គនាយកដ្ឋានអត្តសញ្ញាណកម្ម បានដំណើរការកម្មវិធីលើប្រព័ន្ធទូរស័ព្ទដៃ តាំងពីថ្ងៃទី០៣ សីហា ឆ្នាំ២០២០ និងទទួលបានសំណួរជាច្រើន។

ក្នុងដំណើរការប្រមាណ ៣ឆ្នាំមកនេះ ក្រុមប្រចាំការសេវាកម្មអត្តសញ្ញាណកម្ម និងប្រតិកម្មរហ័ស បានបំពេញកិច្ចការបាន យ៉ាងល្អ ក្នុងការឆ្លើយតបរាល់ចម្ងល់របស់បងប្អូនប្រជាពលរដ្ឋខ្មែរ ដែលភាគច្រើន ទាក់ទងនឹងធ្វើស្នើសុំ ធ្វើសំបុត្រអាពាហ៍ពិពាហ៍ អត្តសញ្ញាណបណ្ណ និងសំណួរទាក់ទងនឹងការកែតម្រូវឈ្មោះជាដើម។

បើតាមអគ្គនាយកដ្ឋានអត្តសញ្ញាណកម្ម ក្រៅពីសួរនាំពីបញ្ហា ឬចម្ងល់ផ្សេងៗ ពាក់ព័ន្ធសេវាកម្មអត្តសញ្ញាណកម្ម កម្មវិធីតាមប្រព័ន្ធទូរស័ព្ទដៃនេះ អាចប្រើដើម្បីតាមដានដំណើរការឯកសារបន្ទាប់ពីស្នើសុំ ស្វែងរកទីតាំងផ្តល់សេវាអត្តសញ្ញាណកម្ម រួមទាំងប្រកាសផ្សាយឯកសារ អត្តសញ្ញាណកម្ម ដែលបាត់បង់ ឬរើសបាន ផងដែរ។

សូមជម្រាបថា អគ្គនាយកដ្ឋានអត្តសញ្ញាណកម្ម ​ជា​សេនាធិការ​ជូន​ក្រសួងមហាផ្ទៃ​ អនុវត្តលើការងារ​អត្តសញ្ញាណកម្ម​ ប្រជាពលរដ្ឋ​ និង​មាន​ភារកិច្ច សិក្សារៀបចំតាក់តែងសេចក្តីព្រាងច្បាប់ អនុក្រឹត លិខិតបទដ្ឋានគតិយុត្តនានា ដែលទាក់ទងនឹងការងារអត្រានុកូលដ្ឋាន ស្ថិតិប្រជាពលរដ្ឋ ស្នាក់នៅ អត្តសញ្ញាណប័ណ្ណសញ្ជាតិខ្មែរ លិខិតឆ្លងដែន និងសញ្ជាតិ។

សម្រាប់អ្នកដែលមានចម្ងល់ទាក់ទងនឹងបញ្ហាដែលបានរៀបរាប់ខាងលើ អាចទាញយកម្មវិធីនេះ ដាក់ក្នុងប្រព័ន្ធទូរស័ព្ទដៃ និងចូលទៅកន្លែង «សំណួរ ឬចម្ងល់» ដើម្បីសួរពីអ្វីដែលចង់ដឹង នៅរៀងរាល់ម៉ោងធ្វើការ ចាប់ពីចន្ទ ដល់ថ្ងៃសុក្រ ហើយក្រុមការងារប្រចាំការរបស់ អគ្គនាយកដ្ឋានអត្តសញ្ញាណកម្ម នឹងឆ្លើយតបតាមសំណួរ៕

អត្ថបទ៖ សុធាវី