ក្រសួងពាណិជ្ជកម្ម កំពុងស្វែងរកដៃគូវិនិយោគចម្រាញ់​ប្រេងនៅកម្ពុជា

កម្ពុជា បានកំពុងស្វះស្វែងរកដៃគូវិនិយោគចម្រាញ់ប្រេង បន្ទាប់ពីក្រុមហ៊ុនមួយបានក្ស័យធន និងបោះបង់ការវិនិយោគ​លើវិស័យនេះ។

កាលពីចុងឆ្នាំ២០២០ កម្ពុជាបានចាប់ផ្តើមទទួលតំណក់ប្រេង ជាលើកដំបូង ស្ថិតនៅតំបន់ប្លុក A នៃឈូងសមុទ្រកម្ពុជា ដោយក្រុមហ៊ុន Kris Energy ដែលបានខួងប្រេងចេញពីបាតសមុទ្រ ក្នុងខេត្តព្រះសីហនុ។ ប៉ុន្តែក្រោយមកក្រុម​ហ៊ុននេះ បានជួបបញ្ហាហិរញ្ញវត្ថុក៏បានដួលរលំទៅវិញ។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានលើកឡើងថា ក្រុមហ៊ុន Kris Energy បានក្ស័យធនធ្វើ​ឱ្យតំណក់ប្រេងដំបូងរបស់កម្ពុជា ក៏ស្ថិតនៅក្នុងសារមន្ទីរ។ ប៉ុន្តែទោះយ៉ាងណា លោក ប៉ែន សុវិជាតិ អះអាងថា ក្រសួង​ពាក់ព័ន្ធ មិននៅស្ងៀមនោះទេ គឺកំពុងបន្តស្វះស្វែងរកដៃគូវិនិយោគថ្មីៗឱ្យចូលមក​អភិវឌ្ឍនៅក្នុងប្លុកប្រេង​របស់កម្ពុជា​តទៅទៀត។

ជាក់ស្តែងនៅពេលកម្ពុជា ធ្វើកិច្ចព្រមព្រៀងពាណិជ្ជកម្មសេរីជាមួយអេមីរ៉ាត់អារ៉ាប់រួម ពេលនោះ កម្ពុជា ក៏បានស្នើឱ្យ​អ្នកវិនិយោគអារ៉ាប់​សម្លឹងមើលលទ្ធភាពក្នុងការវិនិយោគវិស័យប្រេងនៅកម្ពុជាផងដែរ​។ នេះបើតាមអ្នក​នាំពាក្យក្រសួង​ពាណិជ្ជកម្ម។

អ្នកនាំពាក្យបន្តថា សព្វថ្ងៃនេះ កម្ពុជា ពឹងផ្អែកលើការនាំចូលប្រេងពីបរទេសសុទ្ធសាធ ដែលធ្វើឱ្យតម្លៃប្រេងលក់​រាយនៅលើទីផ្សារកម្ពុជា ប្រែប្រួលឡើងចុះទៅតាមតម្លៃទីផ្សារអន្តរជាតិ។​

អ្នកជំនាញរំពឹងថា អនាគតនៅពេលកម្ពុជា អាចទាក់ទាញបានវិនិយោគបង្កើតក្រុមហ៊ុនចម្រាញ់ប្រេងនៅក្នុងស្រុក តម្លៃប្រេងលក់រាយនឹងធ្លាក់ចុះមកត្រឹមកម្រិតមួយសមរម្យ ជាពិសេសជួយដល់កំណើនសេដ្ឋកិច្ចជាតិផងដែរ៕