ព័ត៌មានជាតិ

ក្បាលដី ជាង ៧០០ កន្លែង នៅឃុំប៉ាក់ខ្លង បានកំណត់វិនិច្ឆ័យរួចរាល់ តែតម្រូវឲ្យមានការពិនិត្យពីម្ចាស់កម្មសិទ្ធិ

បានផុស

៨ ខែ មុន

នៅ

ថ្ងៃសុក្រ ២៧ តុលា ២០២៣

ដោយ

មន្ត្រីជំនាញ បានកំណត់វិនិច្ឆ័យដីធ្លីជូនពលរដ្ឋនៅភូមិ ២ និងភូមិ ៣ ឃុំប៉ាក់ខ្លង ស្រុកមណ្ឌលសីមា រួចរាល់ហើយ ប៉ុន្តែតម្រូវឲ្យពលរដ្ឋម្ចាស់កម្មសិទ្ធិមកផ្ទៀងផ្ទាត់ទិន្នន័យលម្អិតរយៈពេល ១៥ ថ្ងៃ មុននឹងចេញប្លង់ជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ាង ប៊ុណ្ណា អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង បានលើកឡើងនៅថ្ងៃទី ២៧ ខែតុលា ឆ្នាំ ២០២៣ នេះថា វិញ្ញាបនបត្រសម្គាល់ម្ចាស់អចលនវត្ថុ (ដំណាក់កាលទី ៥) ដែលត្រៀមចេញចែកជូនពលរដ្ឋរស់នៅភូមិ ២ និងភូមិ មានក្បាលដីសរុបចំនួន ៧៦៦ ក្បាលដី។

លោក ហ៊ាង ប៊ុណ្ណា បន្ថែមថា ភូមិ ២ មានក្បាលដីសរុបចំនួន ៥៤៨ ក្បាល ក្នុងនោះក្បាលដីមានទិន្នន័យចំនួន ៣៨៣ ក្បាលដី និងគ្មានទិន្នន័យ ចំនួន ១៦៥ ក្បាលដី និងភូមិ ៣ ក្បាលដីសរុបចំនួន ២១៨ ក្បាលដី ក្នុងនោះក្បាលដីមានទិន្នន័យចំនួន ១៨៩ ក្បាលដី និងក្បាលដីគ្មានទិន្នន័យចំនួន ២៩ ក្បាលដី។

ទោះបីជាបែបនេះក្តី មន្ត្រីជំនាញ សូមអំពាវនាវដល់ពលរដ្ឋដែលជាម្ចាស់កម្មសិទ្ធិអចលនវត្ថុនីមួយៗ អញ្ជើញមកពិនិត្យទិន្នន័យដីធ្លីរបស់ខ្លួនឲ្យលម្អិត មុននឹងចេញបណ្ណសម្គាល់នៅថ្ងៃមុខ។ ករណីខុសឈ្មោះ ខុសទំហំទីតាំងដី ឬវាស់វែងជាន់ព្រំប្រទល់គ្នា ពលរដ្ឋតវ៉ាសុំឲ្យកែតម្រូវបានឡើងវិញ កុំចាំចេញប្លង់មកកែតម្រូវនាំចំណាយពេលវេលា និងថវិកាច្រើន។

ក្នុងពិធីប្រកាសផ្សព្វផ្សាយកំណត់វិនិច្ឆ័យដីធ្លីរយៈពេល ១៥ ថ្ងៃ លោក សុខ សុទ្ធី អភិបាលរងខេត្តកោះកុង ថ្លែងថា រដ្ឋបាលខេត្ត និងមន្ទីរជំនាញ បានប្រឹងប្រែងលើការកំណត់វិនិច្ឆ័យ និងចេញបណ្ណសម្គាល់អចលនវត្ថុជូនពលរដ្ឋទូទាំងខេត្តឲ្យបាន ១០០ ភាគរយ។

ការបង្កើនដោះស្រាយការងារវាស់វែងវិនិច្ឆ័យ និងចេញបណ្ណសម្គាល់ដីធ្លីនេះ ធ្វើឡើងដើម្បីផ្តល់ភាពកក់ក្តៅជូនពលរដ្ឋ ខណៈរស់នៅអាស្រ័យលើ និងធ្វើអាជីវកម្មដោយស្របច្បាប់ ចៀសវាងមានការរំលោភបំពានពីបុគ្គលណាម្នាក់។

លោក សុខ សុទ្ធី ក៏សំណូមពរដល់ពលរដ្ឋម្ចាស់កម្មសិទ្ធិដីធ្លីទាំងនេះ ត្រូវធ្វើយ៉ាងណាចូលរួមសហការជាមួយមន្ត្រីជំនាញ គ្រប់នីតិវិធីអនុវត្តដំណាក់កាលទី ៤ រហូតដល់ដំណាក់កាលចេញបណ្ណសម្គាល់កម្មសិទ្ធិបានដោយរលូន។ ទៀតសោត នៅពេលទទួលបានបណ្ណសម្គាល់អចលនវត្ថុហើយ ត្រូវរៀបចំទុកដាក់ឲ្យមានសុវត្ថិភាពល្អ ចៀសវាងបាត់ខូច ឬដាក់បញ្ចាំធនាគារជាដើម។

ការបិទផ្សាយអំពីតំបន់វិនិច្ឆ័យដីធ្លីរួចរាល់ហើយនេះ មានសារៈសំខាន់ ក្នុងន័យមន្ត្រីអាចជួយកែលំអឲ្យជាទិន្នន័យពិត និងត្រឹមត្រូវដែលឈានទៅដល់ការកសាងប្លង់សុរិយោដី និងសៀវភៅគោលបញ្ជីក្បាលដីសុក្រឹត និងការចេញវិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធិ) រក្សាបាននូវប្រយោជន៍ឯកជន និងរដ្ឋក្នុងការបញ្ចប់វិវាទដីធ្លី៕

អត្ថបទ ៖ សិរីវឌ្ឍនៈ