វិស័យឯកជនគាំទ្រការហាមប្រើឧបករណ៍អេឡិច ត្រូនិកក្នុងថ្នាក់រៀន ឬម៉ោងសិក្សាដែលមិនបម្រើឱ្យសកម្មភាពសិក្សា

វិស័យឯកជនបានគាំទ្រក្រសួងអប់រំយុវជន និងកីឡាដែលបានហាមប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សាដែលមិនបម្រើឱ្យសកម្មភាពសិក្សាហើយសំណូមពរឱ្យសាលាឯកជនអនុវត្តដូចគ្នាផងដែរ។

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានមានប្រសាសន៍នៅរសៀលថ្ងៃទី២៩តុលានេះថា៖ «ជាការពិតហើយបើសកម្មភាពប្រើប្រាស់ឧបករណ៍អេឡេចត្រូនិចនៅក្នុងម៉ោងសិក្សាក្រៅពីសកម្មកភាពបម្រើឱ្យការងារសកម្មភាពសិក្សាគឺហាមឃាត់អាហ្នឹងពិតជាត្រឹមត្រូវ។ យើងគិតថា Stem សំខាន់តែសិស្សនិស្សិតទាំងអស់ចូលទៅបើសិនជាចំទៅមុខវិជ្ជារបស់យើងស្ទែមហ្នឹងត្រូវវាពិតជាផ្តល់ផលប្រយោជន៍តែខ្លាចក្រែងយើងយកគ្រឿងអេឡេចត្រូនិចចូលទៅវាខុសកម្មវិធិសិក្សាហើយនិយាយឱ្យចំវាមិនបម្រើឱ្យវិស័យសិក្សា»។

នៅពេលសួរថាតើគ្រឹះស្ថានសិក្សាឯកជននឹងអនុវត្តតាមក្រសួងអប់រំដែរឬទេ?លោក បានពន្យល់ថា តាមពិតវាមានការណែនាំពីក្រសួងអប់រំរួចជាស្រេចហើយៗយើងក៏ទទួលបាននឹងអនុវត្តតាមដូចគ្នាហ្នឹង។ បើសិនជាសាលាទាំងអស់បានធ្វើអីចឹងវាល្អ។

ក្រសួងលើកឡើងតែរដ្ឋទេមិនសម្រាប់សាលាឯកជនតែឯកជនមើលឃើញល្អយកតាមពិសេសសេចក្តីសម្រេចនានារបស់ក្រសួងគឺរួមគ្នាទាំងអស់ហ្នឹងពួកយើងខ្ញុំទទួលបានអាជ្ញាបណ្ណបណ្តុះបណ្តាលគឺរបស់ក្រសួងអប់រំអីចឹងវាគ្របដណ្តប់ទាំងអស់មែនគ្របដណ្តប់តែរដ្ឋទេបញ្ជាក់ត្រឹមតែរដ្ឋក៏ដោយក៏វិស័យឯកជនដែលមើលឃើញអ្វីដែលល្អយកគំរូតាម។

យោងតាមសេចក្តីណែនាំរបស់ក្រសួងអប់រំចុះថ្ងៃទី២៤តុលា បានហាមឃាត់ការប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា ដែលមិនបម្រើឱ្យសកម្មភាពសិក្សាដោយគ្មានការអនុញ្ញាតពីគ្រូកំពុងបង្រៀន ជាពិសេសការលេងហ្គេម និងបណ្ដាញទំនាក់ទំនងសង្គម ដែលមិនពាក់ព័ន្ធនឹងសកម្មភាពសិក្សា។

ក្រសួងបានណែនាំដល់គ្រូកំពុងបង្រៀនក្នុងថ្នាក់ និងប្រធានថ្នាក់ត្រូវណែនាំសិស្សក្នុងថ្នាក់ ដែលប្រើប្រាស់ទួរសព្ទដៃ ឬឧបករណ៍អេឡិចត្រូនិកនាំឱ្យខាត ឬរំខានដល់ការសិក្សា។

ក្រសួងក៏បានណែនាំបន្ថែមដល់មន្ទីរអប់រំ យុវជន និងកីឡារាជធានី ខេត្ត គណៈគ្រប់គ្រងគ្រឹះស្ថាន សិក្សាសាធារណៈទាំងអស់រួមគ្នាពង្រឹងវិន័យ និងបង្កើនប្រសិទ្ធភាពនៃការប្រើប្រាស់ឧបករណ៍អេឡិចត្រូនិច ក្នុងបរិវណគ្រឹះស្ថានសិក្សាសាធារណៈរបស់ខ្លួន។

ចំណែកគណៈគ្រប់គ្រងគ្រឹះស្ថានសិក្សា ត្រូវណែនាំជាប្រចាំអំពីវិន័យនិងបទបញ្ជាផ្ទៃក្នុងរបស់សាលារៀន ដល់សិស្សានុសិស្ស ពាក់ព័ន្ធនឹងការប្រើប្រាស់ទូរសព្ទដៃនិងឧបករណ៍អេឡិចត្រូនិកឱ្យស្របនឹង គោលបំណងនៃការអប់រំ ។ ក្រុមប្រឹក្សាកុមារ និងក្រុមប្រឹក្សាយុវជនត្រូវចូលរួមណែនាំសមាជិក ឱ្យផ្តោតលើការសិក្សារៀនសូត ជាជាងការចំណាយពេលលើការលេងហ្គេមនិងការប្រើប្រាស់បណ្តាញទំនាក់ទំនងសង្គម ដែលមិនពាក់ព័ន្ធនឹងសកម្មភាពសិក្សា។

គណៈគ្រប់គ្រងគ្រឹះស្ថានសិក្សា ត្រូវជំរុញនិងលើកទឹកចិត្តឱ្យសិស្សមានទម្លាប់ធ្វើស្វ័យសិក្សា អាន និងស្រាវជ្រាវក្នុងបណ្ណាល័យ។ បង្កើតនិងអនុវត្តការអប់រំក្រៅម៉ោងសិក្សា ដូចជាក្លិបសិក្សាតាមកម្រិតថ្នាក់ និងតាមមុខវិជ្ជា៕

អត្ថបទ៖ សំអឿន