ក្រសួងពាណិជ្ជកម្ម ជំរុញម្ចាស់អាជីវកម្មយក ផលិតផលខ្លួនចូលរួមក្នុងពិព័រណ៍បុណ្យសមុទ្រ

ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរក្នុងឱកាសនៃពិធីបុណ្យសមុទ្រលើកទី១០ ជុំទី៣ ចាប់ពីថ្ងៃទី១ ដល់ថ្ងៃទី៣ ខែធ្នូ ឆ្នាំ២០២៣ នៅក្រុងកែប ខេត្តកែប ដើម្បីផ្សារភ្ជាប់នឹងទេសចរណ៍នេះ គឺជាយុទ្ធសាស្ត្រជួយជំរុញ និងលើកកម្ពស់ផលិតផលក្នុងស្រុកឱ្យមានការទទួលស្គាល់ និងចូលរួមប្រើប្រាស់កាន់តែទូលំទូលាយនៅទូទាំងប្រទេស។

បើតាមក្រសួងពាណិជ្ជកម្ម ផលិតករ សិប្បករ ម្ចាស់ក្រុមហ៊ុន សហគ្រាសក្នុងស្រុក អាចនាំយកផលិតផលខ្មែរដែល មានគុណភាពខ្ពស់ មានសុវត្ថិភាពសម្រាប់អ្នកប្រើប្រាស់ និងមានការវេចខ្ចប់ល្អត្រឹមត្រូវអនុលោមតាមស្តង់ដារ ផលិតកម្ម មកពីគ្រប់ទិសទីនៅទូទាំងប្រទេស ដាក់តាំងបង្ហាញផ្សព្វផ្សាយ និងស្វែងរកដៃគូពាណិជ្ជកម្មក្នុងព្រឹត្តិការណ៍នេះបាន។

ដោយក្នុងនោះ ក្រសួងពាណិជ្ជកម្ម បានផ្តល់អាទិភាពខ្ពស់លើផលិតផល និងសេវាទើបនឹងបង្កើតថ្មី មានគំនិត ច្នៃប្រឌិត ខ្ពស់ ដែលម្ចាស់អាជីវកម្មមានបំណងចូលរួមតាំងបង្ហាញស្នាដៃរបស់ខ្លួនបានផងដែរ។

ទន្ទឹមនេះ ក្រសួងពាណិជ្ជកម្ម ក៏បានជំរុញដល់សាធារណជនទូទៅ ចូលរួមទស្សនា និងគាំទ្រព្រឹត្តិការណ៍ដ៏មានសារៈ សំខាន់នេះកុំបីខកខានឡើយ៕

អត្ថបទ៖ ផល ធារិត