សម្ដេចធិបតី ហ៊ុន ម៉ាណែត ៖ ការតែងតាំងមន្ត្រី ត្រូវឆ្លងកាត់ការវាយតម្លៃឲ្យបានច្បាស់លាស់ ជៀសវាងការអន្តរាគមន៍នានា

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ការចាត់តាំង និងតែង​​តាំងមន្ត្រី គឺជាកិច្ចការដ៏សំខាន់មួយ ដែលប្រធានអង្គភាព-ស្ថាប័ន ដើរតួនាទីសំខាន់ជាអ្នកកំណត់ទិសដៅការ​ងារ និងជាមជ្ឈមណ្ឌលនៃសាមគ្គីផ្ទៃក្នុង។ ការលើកឡើងនេះ ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារថ្មី នៃទីស្តីការក្រសួងមហាផ្ទៃ នាព្រឹកថ្ងៃទី ៦ ខែវិច្ឆិកា ឆ្នាំ ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត មានប្រសាសន៍ថា ការចាត់តាំង និងការតែងតាំងមន្ត្រី ត្រូវឆ្លងកាត់ការវាយតម្លៃឲ្យបានច្បាស់លាស់ ជៀសវាងការអន្តរាគមន៍នានា ដើម្បីដាក់មន្ត្រីឲ្យបំពេញការងារចំគោលដៅ។

សម្ដេចធិបតី ហ៊ុន ម៉ាណែត បានថ្លែងបែបនេះថា «អញ្ចឹង គឺត្រូវមានការវាយតម្លៃ មានយន្ដការវាយតម្លៃ ឲ្យបានច្បាស់លាស់ ជៀសវាងនូវការអន្តរាគមន៍ផ្សេងៗ ដើម្បីរៀបចំមនុស្សឲ្យចំគោលដៅ ផ្អែកលើគុណាធិបតេយ្យ ឆន្ទៈ និងស្នាដៃនៅក្នុងការបម្រើប្រជាពលរដ្ឋ»។

សម្ដេចធិបតី ហ៊ុន ម៉ាណែត បានលើកឡើងថា​ មិនថាតែនៅក្នុងវិស័យអប់រំ សុខាភិបាល រដ្ឋបាលស៊ីវិល និងគ្រប់វិស័យទាំងអស់ ត្រូវធានាទៅលើការចាត់តាំង និងតែងតាំងមន្ត្រី ឲ្យបានចំគោលដៅ៕