សម្ដេចធិបតី ហ៊ុន ម៉ាណែត ឯកភាពឲ្យក្រសួងរៀបចំដែនដីប្រាស់កម្លាំងសរុប ចុះវាស់វែងដីធ្លីជូនពលរដ្ឋ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឯកភាពជាគោលការណ៍ឲ្យក្រសួងរៀបចំដែនដី នគរូបនីយកម្ម និងសំណង់ ប្រាស់កម្លាំងសរុប ដើម្បីចុះវាស់វែងដីធ្លីជូនប្រជាពលរដ្ឋ ឲ្យទទួលបានកម្មសិទ្ធិយកទៅប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឲ្យដឹងនេះ បានធ្វើឡើងក្នុងពិធីជួបសំណេះសំណាល ជាមួយកម្មករ-និយោជិតចំនួន ១៥១៨៤នាក់ នៅតាមបណ្តា​រោងចក្រ សហគ្រាស ដែលមានមូលដ្ឋានក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ខេត្តព្រះសីហនុ នាថ្ងៃទី ៧ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា កាលពីឆ្នាំ ២០១១ សម្ដេចតេជោ ហ៊ុន សែន​ អតីតនាយករដ្ឋមន្ត្រី បានដាក់ចេញគោលនយោបាយវាស់វែងដីធ្លីជូនប្រជាពលរដ្ឋ គឺគោលនយោបាយចាស់សកម្មភាពថ្មី ដោយបានវាស់វែងដីធ្លីជូនប្រជាពលរដ្ឋជាច្រើនក្បាលដី។ ក្នុងនោះ រាជរដ្ឋាភិបាល អាណត្តិទី ៧ នឹងបន្តធ្វើសកម្មភាពនេះបន្តទៀត។

សម្ដេចធីបតី ហ៊ុន ម៉ាណែត មានប្រសាសន៍បន្តថា «ឥឡូវនៅសល់ដែលយើងវាស់ហើយជាង ៧លានក្បាលដី ដោយសារយើងចាប់ផ្ដើមបញ្ចេញក្បាលដី ដែលត្រូវវាស់បន្ថែម យើងបញ្ចេញ ២លាន នៅសល់ ៥លានក្បាលដីទៀត ដែលត្រូវចាត់វិធានការ ដើម្បីចេញធ្វើយ៉ាងម៉េចជំរុញកិច្ចការនេះ ឥឡូវនេះក្រសួងដែនដី ឯកឧត្ដម សាយ សំអាល់ បានដាក់ចេញគោលការណ៍យុទ្ធសាស្រ្ដ ខ្ញុំបានចារឯកភាពផ្ដល់គោលការណ៍ ប្រើប្រាស់កម្លាំងសរុប ទាំងពីថ្នាក់កណ្ដាល និងថ្នាក់ខេត្ត ដើម្បីធ្វើយ៉ាងណាចុះមក បែងចែងឲ្យបងប្អូន ឆាប់បានកម្មសិទ្ធិគាត់យកទៅប្រើប្រាស់ ឲ្យលឿន កុំឲ្យកកស្ទះ»៕