ព័ត៌មានជាតិ

ឯកឧត្ដម ហ៊ុន ម៉ានី លើកទឹកចិត្តសមាជិក-សមាជិកាគណបក្សស្រុកឱរ៉ាល់ ឲ្យខិតខំដោះស្រាយកិច្ចការបន្ត ដោយរក្សាគោលជំហរគណបក្សប្រជាជន

បានផុស

២ years មុន

នៅ

ថ្ងៃសៅរ៍ ១១ វិច្ឆិកា ២០២៣

ដោយ

ឯកឧត្ដម ហ៊ុន ម៉ានី អនុប្រធានទី ១ ក្រុមការងារគណបក្សចុះជួយខេត្តកំពង់ស្ពឺ បានលើកទឹកចិត្តដល់សមាជិក-សមាជិកាគណបក្សស្រុកឱរ៉ាល់ ឲ្យខិតខំប្រឹងប្រែងដោះស្រាយកិច្ចការបន្ត ដោយថែរក្សានូវសាមគ្គីឯកភាពផ្ទៃក្នុង ទាំងទស្សនៈ និងគោលជំហររបស់គណបក្សប្រជាជនកម្ពុជា។

ការលើកទឹកចិត្តនេះ ក្នុងឱកាស ឯកឧត្ដម ហ៊ុន ម៉ានី អនុប្រធានទី ១ ក្រុមការងារគណបក្សចុះជួយខេត្តកំពង់ស្ពឺ បានដឹកនាំកិច្ចប្រជុំជាមួយក្រុមការងារចុះជួយ ស្រុក ឃុំ គណៈកម្មាធិការគណបក្ស សមាជិក-សមាជិកាគណបក្សស្រុកឱរ៉ាល់ ដើម្បីតាមដានវឌ្ឍនភាពការងារ និងស្តាប់នូវសំណូមពរ ក៏ដូចជាបញ្ហាប្រឈមដែលក្រុមការងារជួបប្រទះ នៅស្នាក់ការគណបក្សស្រុកឱរ៉ាល់ កាលពីព្រឹកថ្ងៃសៅរ៍ ទី ១១ ខែវិច្ឆិកា ឆ្នាំ ២០២៣។

នាឱកាសនោះដែរ ឯកឧត្ដម ហ៊ុន ម៉ានី បានកោតសរសើរចំពោះកិច្ចខិតខំប្រឹងប្រែង និងការសហការយ៉ាងសកម្មរបស់ក្រុមការងារចុះជួយ ស្រុក ឃុំ គណៈកម្មាធិការគណបក្ស សមាជិក សមាជិកា ដែលរួមគ្នានាំមកនូវភាពជោគជ័យនាពេលកន្លងមក ជាពិសេសលទ្ធផលការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។ ទន្ទឹមនោះ ឯកឧត្ដម ក៏បានលើកទឹកចិត្តដល់ សមាជិក-សមាជិកា ឲ្យខិតខំប្រឹងប្រែងដោះស្រាយកិច្ចការបន្ត ដោយថែរក្សានូវសាមគ្គីឯកភាពផ្ទៃក្នុង ទាំងទស្សនៈ និងគោលជំហររបស់គណបក្សប្រជាជនកម្ពុជា ផងដែរ។

ជាមួយគ្នានោះ ឯកឧត្ដម ហ៊ុន ម៉ានី បានអរគុណចំពោះថ្នាក់ដឹកនាំ ក្រុមការងារចុះជួយ ស្រុក ឃុំ គណៈកម្មាធិការគណបក្ស សមាជិក សមាជិកា ដែលបានចំណាយពេលវេលាមកចូលរួមប្រជុំ និងចូលរួមផ្តល់មតិយោបល់ ចែករំលែកបទពិសោធន៍មកកាន់អង្គប្រជុំ។ បន្ថែមនោះ ឯកឧត្ដម ក៏បានគូសបញ្ជាក់ថា ការចែករំលែកទាំងនេះ ជាមូលដ្ឋាន នៃការកំណត់ភាពឈ្នះតទៅមុខរបស់ស្រុកឱរ៉ាល់ផ្ទាល់ ក៏ដូចជាមេរៀន និងបទពិសោធន៍ល្អៗ ដែលអាចចែករំលែកទៅកាន់ស្រុក-ឃុំ ដទៃទៀត ផងដែរ៕

អត្ថបទ ៖ ពិសី