​កម្ពុជាបានចំណូល ៣,៥ ពាន់លានដុល្លារពីការនាំចេញផលិតផលកសិកម្ម​

គិតត្រឹមខែវិច្ឆិកា ឆ្នាំ ២០២៣ ការដាំដុះស្រូវ សម្រេចបាន​ជាង​ ៣,៦ លានហិកតា ​និងទទួលបានទិន្នផល ​៦,២ លាន​តោន​ ជាមួយ​នឹងការរំពឹងទុកថា ​នឹងទទួលបានលទ្ធផលបន្ថែម​៦,៣ លានតោននៅខែវិច្ឆិកា និងខែធ្នូខាងមុខនេះ។ ​

​របាយការណ៍របស់ក្រសួង កសិកម្ម រុក្ខាប្រមាញ់ និងនេសាទ បង្ហាញថា នៅក្នុងរយៈពេល ១០ ខែ ការនាំចេញផលិត​ផលកសិកម្ម​នៅបន្តទទួលបានតួលេខខ្ពស់ ៦, ២ លានតោន គិតជាទឹកប្រាក់ ៣,៥ ពាន់លានដុល្លារ ទៅកាន់ទិសដៅ ៧៥ ប្រទេស។

​​ការនាំចេញអង្ករក៏សម្រេចបានជាទឹកប្រាក់​ ៥៥៨ លានដុល្លារ រួមទាំងការនាំចេញទៅឥណ្ឌូនេស៊ី ដែលជាគោលដៅថ្មី​។

សម្ដេចធិបតី ហ៊ុន ម៉ាណែត ប្រមុខដឹកនាំរាជរដ្ឋាភិបាលនៅថ្ងៃទី ២០ ខែវិច្ឆិកា ឆ្នាំ ២០២៣ ​បានប្រកាសដាក់ឱ្យអនុវត្តជាផ្លូវការ នូវកម្មវិធីនយោបាយអាទិភាពទី ៥ និងទី ៦ ការលើកស្ទួយផលិតផលកសិកម្ម រកទីផ្សារ និងរក្សាលំនឹងថ្លៃកសិផលតាមរយៈកម្មវិធីហិរញ្ញប្បទាន ការដាក់ពង្រាយមន្ត្រីកសិកម្មឃុំ សង្កាត់ និងការអភិវឌ្ឍសហគមន៍កសិកម្មទំនើប។

កម្មវិធីនេះ គឺជាការជំរុញអភិវឌ្ឍវិស័យកសិកម្ម​ឱ្យក្លាយទៅជាកម្លាំងចលករ ធានាសន្តិសុខស្បៀង លើកស្ទួយសេដ្ឋកិច្ចគ្រួសារកសិករ និងចូលរួមលើកកម្ពស់កំណើនសេដ្ឋកិច្ចជាតិ៕

​