សក្តានុពលកម្លាំងជំនាញមានកំណើនទាក់ទាញបានក្រុមហ៊ុនប្រេនធំៗ ចូលមកវិនិយោគកម្ពុជា

កាលពីជាង ២០ឆ្នាំមុន កម្ពុជា មានតែរោងចក្រកាត់ដេរកម្រិតទាបប៉ុណ្ណោះ ដោយឡែកក្រុមហ៊ុនប្រេនធំៗ មិនចាប់អារម្មណ៍ចូលមកវិនិយោគនោះទេ ដោយសារកម្ពុជា មិនទាន់មានលទ្ធភាព និងកម្លាំងជំនាញនៅទាប។ ប៉ុន្តែបច្ចុប្បន្ននេះ កម្ពុជា មានសក្តានុពល ដោយក្រុមហ៊ុនប្រេនធំៗជាច្រើន បានចូលមកវិនិយោគ មិនត្រឹមតែរោង​ចក្រកាត់ដេរសម្លៀកបំពាក់នោះទេ រួមមាន ស្បែកជើង ​កាបូប កាតាប គ្រឿងអលង្ការ ជាដើម។ នេះជាការលើក​ឡើងរបស់សម្តេច ហ៊ុន ម៉ាណែត នាយករដ្ឋមន្រ្តីកម្ពុជា នៅក្នុងជំនួបសំណេះសំណាលជាមួយកម្មករ និយោជិត​ ចំនួនជិត ២ម៉ឺននាក់ មកពីបណ្តារោងចក្រ សហគ្រាស ដែលមានមូលដ្ឋានក្នុងខណ្ឌកំបូល រាជធានីភ្នំពេញ ថ្ងៃទី ២១ វិច្ឆិកា ឆ្នាំ ២០២៣។

សម្តេចនាយករដ្ឋមន្រ្តី បានសង្កត់ធ្ងន់ថា ប្រសិនបើកូនខ្មែរគ្មានសមត្ថភាពជំនាញ ក្រុមហ៊ុនធំៗទាំងនោះ មិនចូលមកវិនិយោគនៅកម្ពុជានោះទេ។ តាមរយៈកម្លាំងជំនាញនេះ សម្តេចបានបញ្ជាក់ថា រាជរដ្ឋាភិបាល ជំរុញរោងចក្រផលិតកង់ឡាន ដំឡើងរថយន្ត រោងចក្រផលិតសម្ភារផ្គត់ផ្គង់អគ្គិសនី ជាដើម ដើម្បីបង្កើនប្រាក់​បៀវត្សរ៍កាន់តែខ្ពស់សម្រាប់ប្រជាពលរដ្ឋក្នុងស្រុក។

ទន្ទឹមនឹងនេះ ដើម្បីជំរុញបន្ថែមលើធនធានជំនាញនៅកម្ពុជា រាជរដ្ឋាភិបាល បានចាប់ផ្តើមបណ្តុះបណ្តាលជំនាញវិជ្ជាជីវៈ​ដល់យុវជន​មកពីគ្រួសារក្រីក្រ និងងាយរងគ្រោះប្រមាណ ១លាន៥ សែននាក់ នាដំណាច់ខែវិច្ឆិកា ឆ្នាំ ២០២៣ ខាងមុខ។

ផែនការយុទ្ធសាស្ត្រអភិវឌ្ឍន៍ជំនាញដល់យុវជនចេញពីគ្រួសារក្រីក្រនិងងាយរងគ្រោះប្រមាន១​លាន៥លាននាក់នេះ បានដាក់ចេញដោយសម្តេចតេជោ ហ៊ុន សែន ដើម្បីចូលរួមដោះស្រាយបញ្ហាកង្វះកម្លាំងពលកម្មផង ក៏ដូចជាឱ្យយុវជន​មានជំនាញវិជ្ជាជីវៈមួយច្បាស់លាស់សម្រាប់ចិញ្ចឹមជីវិតប្រចាំថ្ងៃ និងចូលរួមដោះស្រាយជីវភាព​ក្រុមគ្រួសារបាន​កាន់តែប្រសើរថែមទៀត៕

​