លោក ឡុង ឌីម៉ង់ ៖ តំបន់សេដ្ឋកិច្ចពិសេសក្រុងព្រះសីហនុ​បង្កើតការងារជាង ៣ម៉ឺននាក់ ស្មើ ១០% នៃពលរដ្ឋក្នុងខេត្ត

សព្វថ្ងៃតំបន់សេដ្ឋកិច្ចពិសេសក្រុងព្រះសីហនុ បានផ្ដល់ការងារដល់ប្រជាពលរដ្ឋក្នុងខេត្តចំនួនប្រមាណជាង ៣ម៉ឺននាក់ ស្មើនឹង ១០% នៃប្រជាជនក្នុងខេត្តសីហនុទាំងមូល។ នេះជាការបញ្ជាក់របស់លោក ឡុង ឌីម៉ង់ អភិបាលរងខេត្តព្រះ​សីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលរងខេត្ត បង្ហាញបែបនេះ នៅក្នុងជំនួបពិភាក្សាការងារជាមួយលោក CHEN JIANGANG និងលោកស្រីអគ្គនាយកក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ (SSEZ) កាលពីថ្ងៃទី ២០ វិច្ឆិកា។

បើតាមលោក ឡុង ឌីម៉ង់ សមិទ្ធផលទាំងនេះជាភស្តុតាង សបញ្ជាក់អំពីការចូលរួមយ៉ាងសកម្មនៃវិនិយោគិន​ចិននៅក្នុងការអភិវឌ្ឍសេដ្ឋកិច្ចខេត្ត និងជាឧទាហរណ៍បង្ហាញពីការអនុវត្តយ៉ាងជោគជ័យនៃគំនិតផ្តួចផ្ដើមខ្សែក្រវ៉ាត់ និងផ្លូវ (BRI)។

លោកអភិបាលរងខេត្ត បានគូសបញ្ជាក់អំពីសារៈសំខាន់ របស់មន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្ត ក្នុងការរួមចំណែកអភិវឌ្ឍសេដ្ឋកិច្ច សង្គម និងការការពារផលប្រយោជន៍ជាតិ ក៏ដូចជាការ​ទាក់ទាញវិនិយោគិនមកវិនិយោគក្នុងខេត្តផងដែរ។

សូមបញ្ជាក់ថា តំបន់សេដ្ឋកិច្ចពិសេសខេត្តព្រះសីហនុ (SSEZ) បង្កើតឡើងនៅខែកុម្ភៈ ឆ្នាំ២០០៨ មានទីស្នាក់ការ​នៅក្នុងស្រុកព្រៃនប់ ខេត្តព្រះសីហនុ ផ្ទៃដីសរុប ១១,១៣ គីឡូម៉ែត្រការ៉េ។ សព្វថ្ងៃ នៅក្នុងតំបន់សេដ្ឋកិច្ចពិសេស​ខេត្តព្រះសីហនុ មានក្រុមហ៊ុនចំនួន១៧៥ ដោយពេលសាងសង់ចប់សព្វគ្រប់ SSEZ គ្រោងនឹងទទួលក្រុមហ៊ុន ចំនួនជាង១០០ក្រុមហ៊ុន បន្ថែមទៀត ដែលក្រុមហ៊ុនសរុបនឹងកើនដល់៣០០ក្រុមហ៊ុន ព្រមទាំងមានលទ្ធភាព​ផ្តល់ឱកាសការងារជូនប្រជាពលរដ្ឋខ្មែរ បានចន្លោះពី ៨០.០០០ ទៅ ១០០.០០០នាក់៕