ស្នងការរង៖ ករណីលោកមេប៉ុស្ដិ៍ស្រែចា ចុះហាមឃាត់ការសម្ដែងល្ខោនបាសាក់ត្រូវបានកោះហៅ​មកសួរនាំនៅស្នងការខេត្ត

លោកឧត្ដមសេនីយ៍ត្រី សើន សុផល ស្នងការរងនៃស្នងការដ្ឋាននគរបាលខេត្តក្រចេះ ទទួលការងារសេនាធិការ បានឲ្យកម្ពុជាថ្មី ដឹងនៅព្រឹកថ្ងៃទី២៣វិច្ឆិកានេះថា ករណីលោកមេប៉ុស្ដិ៍នគរបាលរដ្ឋបាលស្រែចា ចុះហាមឃាត់ និងបញ្ឈប់ការសម្ដែងល្ខោនបាសាក់ក្នុងពិធីបុណ្យកឋិនមួយនៅវត្តអូរលុង ស្ថិតក្នុងភូមិអូរលុង ឃុំស្រែចា ស្រុកស្នួល ខេត្តក្រចេះ ត្រូវបានកោះហៅមកសួរនាំនៅស្នងការដ្ឋាននគរបាលខេត្តហើយនៅព្រឹកថ្ងៃទី២៣វិច្ឆិកានេះ។

បើតាមលោកស្នងការរង ករណីបើរកឃើញកំហុសណាមួយ ស្នងការដ្ឋាននគរបាលខេ្តតនឹងអនុវត្តវិន័យកងកម្លាំងលើមេប៉ុស្ដិ៍រូបនោះ។

គូររំលឹកថា កាលពីយប់ថ្ងៃទី២២ ខែវិច្ឆិកា ឆ្នាំ២០២៣ លោកអនុសេនីយ៍ទោ រស សំអឿន ហៅក្រាវ ដួង ជានាយប៉ុស្ដិ៍នគរបាលរដ្ឋបាលស្រែចា បានចុះទៅហាមឃាត់ និងបញ្ឈប់ការសម្ដែងរបស់ក្រុមអ្នកលេងសិល្បៈល្ខោនបាសាក់ ក្នុងពិធីបុណ្យកឋិនមួយ នៅវត្តអូរលុង ស្ថិតក្នុងភូមិ អូរលុង ឃុំស្រែថា ស្រុកស្នួល ខេត្តក្រចេះ ដែលទង្វើនេះបានធ្វើឲ្យមហាជនជាច្រើន កំពុងផ្ទុះប្រតិកម្មជាខ្លាំង។

បើតាមលោក ជា ច័ន្ទបរិបូណ៍ រដ្ឋលេខាធិការក្រសួងព័ត៌មាន បានលើកឡើងតាមរយ:បណ្តាញសង្គមហ្វេសប៊ុកផ្ទាល់ខ្លួននៅពញរឹកថ្ងៃទី២៣វិច្ឆិកានេះដែរថា មេប៉ុស្តិ៍រូបនេះត្រូវទទួលចំណាត់ការនិងដកចេញនាពេលខាងមុខប្រហែលជាមិនលើស២៤ម៉ោងឡើយ។ ត្រូវដកបុគ្គលរូបនេះមកខេត្តហើយត្រូវទទួលវិធានការវិន័យ និងវិធានការរដ្ឋបាល។

លោក ជា ច័ន្ទបរិបូណ៍ បានបន្ថែមទៀតថា សូមបញ្ជាក់ថា បុគ្គលរូបនេះថ្នាក់លើបានអប់រំច្រើនលើកហើយចំពោះការអនុវត្តន៍ការងារខុសពីគោលការណ៍រាជរដ្ឋាភិបាល៕

អត្ថបទ៖ សុខុម