យន្តហោះខ្នាតធំ Boeing នឹងដឹកអ្នកដំណើរ​ជាង ២៣០​នាក់ពីអូស្រ្តាលី ចូលខេត្តសៀមរាប ស្អែកនេះ

លោក ស៊ីន ចាន់សេរីវុត្ថា អ្នកនាំពាក្យអាកាសចរស៊ីវិលកម្ពុជា បានឱ្យដឹងថា ជើងហោះហើរដឹកអ្នកដំណើរ​ដែលប្រើប្រាស់យន្តហោះប្រភេទ Boeing 777-200 នឹងដឹកអ្នកដំណើរចំនួន ២៣០ នាក់ ពីទីក្រុងស៊ីដនី ប្រទេសអូស្ត្រាលី ចុះចតនៅអាកាសយានដ្ឋានអន្តរជាតិសៀមរាបអង្គរ (SAI) នៅថ្ងៃទី ២៤ ខែវិច្ឆិកា ឆ្នាំ ២០២៣ វេលាម៉ោង ៦:៤០ល្ងាច។

បើតាមអ្នកនាំពាក្យអាកាសចរស៊ីវិល កម្ពុជា នឹងរៀបចំពិធីស្វាគមន៍ ដោយមានបាច់ផ្កា និងក្រមា ដើម្បីសម្តែង​ការអបអរសាទរ ចំពោះការអញ្ជើញមកដល់របស់ភ្ញៀវទេសចរអូស្ត្រីលីទាំងអស់ ចូលមកកម្ពុជា។

លោក ស៊ីន ចាន់សេរីវុត្ថា បានគូសបញ្ជាក់ថា វត្តមាននៃយន្តហោះខ្នាតធំ Boeing ហោះចូលមកកម្ពុជា មិនមែនជា​លើកទីមួយទេ ប៉ុន្តែសម្រាប់ការហោះចូលទៅកាន់អាកាសយានដ្ឋានអន្តរជាតិសៀមរាបអង្គរ គឺជាលើកដំបូង ក្រោយពី​អាកាសយានដ្ឋាននេះ បានដាក់ឱ្យដំណើរមក។

លោកបានបន្តថា បើទោះបីជាយន្តហោះ Boeing 777 ដឹកអ្នកដំណើរ ២៣០នាក់ មកពីអូស្រ្តាលី មិនអចិន្ត្រៃយ៍យ៉ាង​ណាក្តី ក៏បានឆ្លុះបញ្ចាំងពីសមត្ថភាពដែលកម្ពុជា អាចទទួលបានយន្តហោះខ្នាតធំ ជាពិសេសចូលទៅ​កាន់អាកាស​យានដ្ឋានអន្តរជាតិថ្មីនេះ។

ការអភិវឌ្ឍព្រលានយន្តហោះបាននិងកំពុងជួយដល់វិស័យដឹកជញ្ជូន​តាមផ្លូវអាកាស ទាក់ទាញកំណើនភ្ញៀវទេសចរ​អន្តរជាតិ បង្កើតឱកាសការងារក្នុងស្រុក បង្កើនការផលិតសម្រាប់​ផ្គត់ផ្គង់តម្រូវការ ជាពិសេសបានចូលរួម​ចំណែក​ក្នុងការជំរុញកំណើនសេដ្ឋកិច្ចជាតិដ៏សំខាន់។ នេះជាការបញ្ជាក់របស់លោកស្រី ឆាយ ស៊ីវលីន ប្រធានសមាគមទេស​ចរណ៍កម្ពុជា(CATA)។

សូមបញ្ជាក់ថា បច្ចុប្បន្នមានក្រុមហ៊ុនអាកាសចរណ៍ចំនួន៩ ធ្វើការហោះហើរចរញ-ចូល អាកាសយានដ្ឋាន​អន្តរជាតិសៀម​រាបអង្គរ ក្នុងនោះ មានក្រុមហ៊ុនអាកាសចរណ៍អន្តរជាតិចំនួន៨ និងក្រុមហ៊ុនអាកាស​ចរណ៍​ក្នុងស្រុកចំនួនមួយ៕