នៅកម្ពុជា ការប្រារព្ធទិវាជនមានពិការភាព គឺដើម្បីរំលឹកអំពីមហាវិនាសកម្ម ដែលកើតឡើងដោយសារសង្រ្គាម

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ការប្រារព្ធទិវាជនមានពិការភាពនៅកម្ពុជា ធ្វើឡើងដើម្បីរំលឹកអំពីមហាវិនាសកម្ម ដែលកើតឡើងដោយសារសង្រ្គាម។ ការលើកឡើងនេះ ធ្វើឡើងក្នុងពិធី «អបអរសាទរទិវាជនមានពិការភាពលើកទី ២៥ និងអន្តរជាតិលើកទី ៤១» នាព្រឹកថ្ងៃទី ៤ ខែធ្នូ ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា នៅកម្ពុជា ការប្រារព្ធទិវាជនមានពិការភាព ធ្វើឡើងដើម្បីរំលឹកអំពីមហាវិនាសកម្ម ដែលកើតឡើងដោយសារសង្រ្គាម ជាពិសេសដោយរបបប្រល័យពូជសាសន៍ ប៉ុល ពត ដែលបានបន្សល់ទុកនូវផលវិបាកជាច្រើន រួមមាន៖ ស្ត្រីមេម៉ាយ, កុមារកំព្រា, ជនមានពិការភាព ព្រមទាំងបន្សល់ទុកនូវគ្រាប់មីន និងកាកសំណល់ជាតិផ្ទុះ រាប់លានតោន។

ប្រមុខរាជរដ្ឋាភិបាល បានប​ន្ថែមថា «​នេះជាសោកនាដកម្មមួយ ដែលបានកើតឡើងចំពោះប្រជាជនកម្ពុជា និងរងគ្រោះពីការទម្លាក់គ្រាប់បែករាប់លានតោន ហើយធ្វើឲ្យរបួសពិការ ស្លាប់ រាប់លាននាក់ ដោយគ្មានការទទួលខុសត្រូវ ហើយបន្ទុកទាំងអស់បានធ្លាក់មកលើរាជរដ្ឋាភិបាលកម្ពុជា នៅក្នុងសម័យនេះ»៕