ព័ត៌មានជាតិ

តំណាងក្រសួងវប្បធម៌ ប្រគល់ថវិកាសប្បុរសធម៌ជាង ២០០ លានរៀល ដល់មន្ទីរពេទ្យ ចំនួន ០២ នៅសៀមរាប-អង្គរ

បានផុស

៣ years មុន

នៅ

ថ្ងៃអាទិត្យ ២៤ ធ្នូ ២០២៣

ដោយ

កាលពីពេលថ្មីៗ នេះ លោក ទិត ថាវរិទ្ធ រដ្ឋលេខាធិការ តំណាងដ៏ខ្ពង់ខ្ពស់ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បាននាំយកថវិកាសប្បុរសធម៌សរុបចំនួន ២០២ លានរៀល ទៅប្រគល់ជូនមន្ទីរពេទ្យគន្ធបុប្ផាសៀមរាប ចំនួន ១៥២ លានរៀល និងមន្ទីរពេទ្យកុមារអង្គរ ខេត្តសៀមរាប ចំនួន ៥០ លានរៀល ដើម្បីជួយសម្រាលបន្ទុកដល់មន្ទីរពេទ្យទាំងពីរ សម្រាប់ការព្យាបាលដល់អ្នកជំងឺកុមារា កុមារី ជនក្រីក្រ អ្នកមានផ្ទៃពោះ និងអ្នកជំងឺទូទៅ ដែលចូលសម្រាកព្យាបាលនៅមន្ទីរពេទ្យខាងលើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការនាំយកថវិកាសប្បុរសធម៌ទៅប្រគល់ជូនមន្ទីរពេទ្យទាំងពីរនេះ ជាកាយវិការដ៏ប្រពៃ កើតចេញពីគំនិតផ្ដួចផ្ដើមរបស់ថ្នាក់ដឹកនាំក្រសួងវប្បធម៌ និងវិចិត្រសិល្បៈ ដែលតែងចូលរួមយ៉ាងសកម្មក្នុងការចែករំលែកក្ដីស្រឡាញ់ និងយកចិត្តទុកដាក់ខ្ពស់ដល់ពលរដ្ឋស្របតាមគោលនយោបាយគាំពារសង្គម ត្រូវបានរាជរដ្ឋាភិបាលដាក់ចេញជាបន្តបន្ទាប់ ដើម្បីសុខុមាលភាពប្រជាពលរដ្ឋកម្ពុជា។

គួររំលឹកថា កាលពីថ្ងៃទី ១៣ ខែធ្នូ ឆ្នាំ ២០២៣ កន្លងទៅ ក្រសួងវប្បធម៌ និងវិចិត្រសិល្បៈ បានរៀបចំព្រឹត្តិការណ៍«រាត្រីសមោសរសប្បុរសធម៌» និងទទួលបានការបរិច្ចាគពីសប្បុរសជន ឯកឧត្ដម លោកជំទាវ ឧកញ៉ា អ្នកឧកញ៉ា អស់លោក លោកស្រី ដែលអញ្ជើញចូលរួមក្នុងព្រឹត្តិការណ៍ដ៏មានសារៈសំខាន់នោះ៕