យុវជនម្នាក់ជីកមើមល្មៀតក្នុងចម្ការ ចំគ្រាប់មីន ផ្ទុះត្រូវភ្នែកម្ខាង

យុវជនម្នាក់បានរងរបួសចំគ្រាប់ភ្នែកម្ខាង ខណ:ដែលយុវជនរូបនេះបានចូលទៅជីកមើមល្មៀតនៅក្នុងចម្ការក្រោយផ្ទះ តែជាអកុសលក៏បានប៉ះចំគ្រាប់មីន បណ្តាលឱ្យផ្ទុះឡើងតែម្តង។

ហេតុការណ៍ដ៏រន្ធត់នេះ បានកើតឡើងនៅវេលាម៉ោង១១:០០នាទី នៅថ្ងៃទី៣០ ខែធ្នូ ឆ្នាំ២០២៣នេះ នៅក្នុងដីចម្ការមួយកន្លែង ស្ថិតនៅចំណុចអូរឆ្នាំងធ្លុះ ក្នុងភូមិឆករកា ឃុំសំឡូត ស្រុកសំឡូត ខេត្តបាត់ដំបង។

យោងតាមសាច់ញាតិនៃក្រុមគ្រួសារជនរងគ្រោះ បានរៀបរាប់ថា មុនពេលកើតហេតុ គឺយុវជនឈ្មោះ មេង សៀវលីន អាយុ១៧ឆ្នាំ រស់នៅក្នុងភូមិឃុំ កើតហេតុខាងលើ បានចូលទៅក្នុងចម្ការរបស់ខ្លួន ដើម្បីជីកល្មៀតលក់ ហើយបានជីកប៉ះគ្រាប់មីន (មិនស្គាល់ឈ្មោះមីន) បានផ្ទុះឡើងបណ្តាលឱ្យរបួសភ្នែកឆ្វេងម្ខាង និងលើផ្ទៃមុខបន្តិចបន្ដួច។

ភ្លាមៗនោះ ជនរងគ្រោះ ត្រូវបានក្រុមគ្រួសារយកទៅព្យាបាលនៅមណ្ឌលសុខភាពឆករកា ចំណែកគ្រាប់មីនដែលផ្ទុះ សមត្ថកិច្ចមិនទាន់សន្និដ្ឋានថា ជាប្រភេទមីនអ្វីនៅឡើយទេ ប៉ុន្តែជាសំណាងដែលមិនប៉ះពាល់ដល់អាយុជីវិត៕

អត្ថបទ : សោ និយមរ័ត្ន