ខ្យល់កន្ត្រាក់កើតឡើងជាង៣០០លើកបណ្តាលឱ្យមនុស្សស្លាប់ និងរបួសជាង១៨០នាក់នៅឆ្នាំ២០២៣

នៅក្នុងឆ្នាំ២០២៣ ខ្យល់កន្ត្រាក់បានកើតឡើងជាង៣០០លើកបណ្តាលឱ្យមនុស្សស្លាប់ និងរង​របួស​ជាង១៨០នាក់ និងបំផ្លាញផ្ទះសម្បែងជាង១៧០០០ខ្នង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍នៅព្រឹកថ្ងៃទី​០៤​មករា
នេះថា ខ្យល់កន្ត្រាក់នៅឆ្នាំ២០២៣កើតឡើងចំនួន៣០៤លើក បណ្តាលឱ្យរលំផ្ទះ២០៣៤ខ្នងរបើកដំបូលផ្ទះ១៥៤៤៩ខ្នងសាលារៀន៩៥ខ្នងរូបផ្សារ៨០តូបអគាររដ្ឋបាល៤០អគារ ស្លាប់មនុស្ស៩នាក់ និងរបួស១៧៥នាក់។

លោកបានបន្តទៀតថា ចំនួននេះបើធៀបទៅនឹងឆ្នាំ២០២២ឃើញថា មានការកើនឡើងគួរឱ្យគត់សម្គាល់ដោយឆ្នាំ២០២២ខ្យល់កន្ត្រាក់បានកើតឡើងចំនួន២១០លើក បណ្តាលឱ្យរលំផ្ទះចំនួន​១១១០ខ្នង របើកដំបូល៩៥៣៣ខ្នង
ខូចខាតសាលារៀនចំនួន៦៤ខ្នង តូបផ្សារ១៣តូប អគាររដ្ឋបាល២៥កន្លែងរបើក​ដំបូលព្រះវិហារ និងកុដិលោកចំនួន៤​កន្លែងរលំឃ្លាំងកំពុងសាងសង់១កន្លែង មនុស្សស្លាប់ចំនួន៣នាក់ និងរបួស៦៦នាក់ព្រមទាំងសង្គ្រោះចំនួន៥នាក់។

គួរបញ្ជាក់ថា ក្នុងឆ្នាំ២០២៣នេះរន្ទះបាញ់បានកើតឡើងចំនួន១៤៣លើកបណ្តាលឱ្យខូចខាតផ្ទះ១៦ខ្នងស្លាប់មនុស្ស​៨៤នាក់របួស៥៩នាក់និងងាប់គោក្របី១០៧ក្បាលផងដែរ៕

អត្ថបទ៖ សំអឿន