ព័ត៌មានជាតិ

វិស័យចំនួន ៣ រំពឹងមានកំណើនខ្ពស់ឆ្នាំ ២០២៤ ខណៈវិស័យអចលនទ្រព្យបន្តរងវិបត្តិ

បានផុស

២ years មុន

នៅ

ថ្ងៃពុធ ៣១ មករា ២០២៤

ដោយ

ធនាគារជាតិទើបចេញរបាយការណ៍ស្តីពីវឌ្ឍនភាពម៉ាក្រូសេដ្ឋកិច្ចនិងវិស័យធនាគារឆ្នាំ ២០២៣ និងទស្សនវិស័យឆ្នាំ ២០២៤។

ឆ្នាំ ២០២៣ កំណើនសេដ្ឋកិច្ចកម្ពុជាត្រូវបានព្យាករងើបឡើងក្នុងអត្រា ៥,៥% គាំទ្រជាចម្បងដោយកំណើនវិស័យទេសចរណ៍ និងផលិតផលកម្មន្តសាលមិនមែនកាត់ដេរ បើទោះបីជាវិស័យកាត់ដេរ សំណង់ អចលនទ្រព្យ និងកសិកម្មមានកំណើនទាបក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពេលដែលភាពមិនប្រាកដប្រជានៅមានកម្រិតខ្ពស់នៅឡើយ ដោយសារហានិភ័យនៃការបន្តអូសបន្លាយវិបត្តិភូមិសាស្ត្រនយោបាយ និងកំណើនយឺតនៅប្រទេសដែលមានសេដ្ឋកិច្ចធំៗមួយចំនួន ឆ្នាំ ២០២៤ សេដ្ឋកិច្ចពិភពលោកត្រូវបានព្យាករថានឹងបន្តថមថយបន្តិចថែមទៀតធៀបនឹងឆ្នាំ២០២៣។

យ៉ាងណាមិញ បើតាមរបាយការណ៍សេដ្ឋកិច្ចកម្ពុជានឹងបន្តងើបឡើងក្នុងរង្វង់ ៦,៤% នៅឆ្នាំ ២០២៤ គាំទ្រជាចម្បងដោយការកើនឡើងនៃវិស័យទេសចរណ៍និងវិស័យកម្មន្តសាល។

វិស័យទេសចរណ៍ងើបឡើងដោយសារភាពប្រសើរឡើងនៃស្ថានភាពទេសចរណ៍ក្នុងតំបន់ ព្រមទាំងការបន្តអភិវឌ្ឍនិងកែលម្អហេដ្ឋារចនាសម្ព័ន្ធដែលនឹងគាំទ្រដល់វិស័យនេះ។ ការអនុវត្តច្បាប់វិនិយោគថ្មី ក៏នឹងជួយជំរុញវិស័យកម្មន្តសាលសម្រេចបានកំណើនល្អជាងឆ្នាំ២០២៣ ជាពិសេសផលិតផលកម្មន្តសាលមិនមែនកាត់ដេរ ខណៈដែលវិស័យកាត់ដេរក៏រំពឹងថានឹងងើបឡើងជាលំដាប់។

ជាមួយគ្នានេះដែរ វិស័យកសិកម្មក៏នឹងមានកំណើនខ្ពស់ ដោយទទួលបានអត្ថប្រយោជន៍ពីការបន្តធ្វើពិពិធកម្មទីផ្សារទៅកាន់ប្រទេសជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីទ្វេភាគីនានា គួបផ្សំនឹងគោលនយោបាយគាំទ្ររបស់រាជរដ្ឋាភិបាលក្នុងការលើកស្ទួយផលិតកម្ម និងទីផ្សារ។

ផ្ទុយមកវិញ វិស័យសំណង់និងអចលនទ្រព្យនៅតែបន្តទទួលរងឥទ្ធិពលពីវិបត្តិកន្លងមក ហើយត្រូវបានគេព្យាករថានឹងបន្តមានកំណើនទាប។ ការគាំទ្រគម្រោងអភិវឌ្ឍន៍ហេដ្ឋារចនាសម្ព័ន្ធសាធារណៈគួបផ្សំនឹងការងើបឡើងវិញសន្សឹមៗនៃតម្រូវការក្នុងស្រុកដែលផ្តោតលើលំនៅឋានដែលមានតម្លៃសមរម្យ ក្នុងពេលដែលតម្រូវការសំណង់ប្រណីតដែលបម្រើដល់អនិវាសនជននឹងនៅតែបន្តមានភាពទន់ខ្សោយ។

ទន្ទឹមនឹងការព្យាករដោយសុទិដ្ឋិនិយម របាយការណ៍ដដែលបានលើកពីបញ្ហាប្រឈមមួយចំនួនលើសេដ្ឋកិច្ចកម្ពុជាក្នុងនោះក៏មានកត្តាខាងក្រៅរួមមាន៖

i/-កំណើនទាបជាងការរំពឹងទុកនៃសេដ្ឋកិច្ចប្រទេសជាដៃគូពាណិជ្ជកម្មចម្បងៗរបស់កម្ពុជា ដូចជា ចិន អាមេរិក និងអឺរ៉ុប ដែលអាចប៉ះពាល់ដល់លំហូរវិនិយោគ នាំចេញ និងទេសចរណ៍
ii/-ប្រក្រតីកម្មនយោបាយរូបិយវត្ថុនៃប្រទេសអភិវឌ្ឍន៍ធំៗប្រព្រឹត្តទៅយឺតជាងការរំពឹងទុក ដែលអាចដាក់សម្ពាធលើការខ្ចីពីក្រៅប្រទេស និងអត្រាការប្រាក់នៅកម្ពុជា
iii/-ការកើនឡើងនៃភាពតានតឹង និងការបែងចែកភូមិសាស្ត្រនយោបាយពិភពលោក អាចរាំងស្ទះដល់ខ្សែច្រវាក់ផ្គត់ផ្គង់ និងបង្អាក់សន្ទុះកំណើនការនាំចេញនិងវិនិយោគ
iv/-កត្តាប្រែប្រួលអាកាសធាតុដែលធ្វើឱ្យវិស័យកសិកម្មមានកំណើនទាប ជាពិសេសបាតុភូតអែលនីញ៉ូ ដែលត្រូវបានព្យាករថានឹងមានឥទ្ធិពលខ្លាំងជាងឆ្នាំ២០២៣
v/-លទ្ធភាពកើនឡើងនៃឧក្រិដ្ឋកម្មសាយប័រ អាចប៉ះពាល់ដល់ជំនឿទុកចិត្ត របស់សាធារណជនមកលើប្រព័ន្ធទូទាត់ឌីជីថល និងប្រព័ន្ធហិរញ្ញវត្ថុទាំងមូល។

ហានិភ័យខាងក្នុងរួមមាន៖

i- ការកើនឡើងនៃឥណទានមិនដំណើរការ អាចបន្ថយកំណើនឥណទានសម្រាប់ការប្រើប្រាស់និងការវិនិយោគ
ii-កំណើននៃវិស័យសំណង់និងអចលនទ្រព្យអាចបន្តមានកម្រិតទាប និងអាចមានឥទ្ធិពលបន្តលើវិស័យផ្សេងទៀត ដូចជាវិស័យធនាគារជាដើម។

ជាមួយគ្នានេះ កម្ពុជាក៏នៅប្រឈមនឹងបញ្ហាជារចនាសម្ព័ន្ធចម្បងៗដូចជា៖

i/-ពិពិធកម្មសេដ្ឋកិច្ចនិងការនាំចេញនៅមានសន្ទុះយឺត
ii/-សមត្ថភាពជំនាញ និងផលិតភាពនៅមានកម្រិត
iii/-ថ្លៃដឹកជញ្ជូននិងអគ្គិសនីខ្ពស់ធៀបនឹងប្រទេសជាដៃគូប្រកួតប្រជែងសម្រាប់ការនាំចេញ
iv/-វិស័យកសិកម្មងាយរងគ្រោះពីការប្រែប្រួលអាកាសធាតុ
v/-ដុល្លារូបនីយកម្មនៅមានកម្រិតខ្ពស់៕

Related Topics:ធនាគារជាតិនៃកម្ពុជា